留位
Xanga
Xanga is a weblog of my daily life.
Saturday January 28, 2006 Xanga
楊氏宗親恭喜發財，子女口材訓練大賽，棋王三舅公，林海峰是但嗡發花癲，八小時的卡啦OK，小寶聆聽我的心，六時正的晨曦。
大年初一，小丰恭祝大家
新年進步！龍馬精神！財源廣進！桃花盛開！
(詳情，心情好再補)
Saturday January 28, 2006 Xanga
二時正的醒覺，雨濛濛的銅鑼灣，新形象之誕生，占士的維園聯宜活動，旺角波鞋大清貨，花墟中的花墟，腳底的悲嗚。
今朝起身己經係二點正，補番尋日篇日記，眨下眼就去到四點，於是同姿姿出街買新衫過新年。
食完南記之後，我地就開始掃貨。今次買左二件新衫同二條新褲，仲買左一件新褸。收穫豐富，不過銀包就……
之後陪占士同佢個朋友去行年宵，不過我覺得似係占士既聯宜活動。因為佢行一陣就見到熟人，行一陣就同人傾偈。發覺維園花市有好多Poly同學仔開檔。
然後，去左間茶餐廳，食左個又貴又唔飽既晚餐，就去旺角搵阿科。
搵左好耐，我地終於都見面。
旺角真係好旺，零晨時分仲係咁多人行街，睇鞋就好似睇花市一樣，人山人海，周圍都係人。最後，我又買左一對新波鞋過新年。
跟著，我地就去行旺角花市，但係我行左成日，又拎著好多新野，隻腳已經開始無力。行到去花市，發現依度真係一個花市，周圍都係賣花，完全同維園係另一個世界，感覺好似俾人呃左一樣。
最後，五點左右先返到屋企，腳隻好支力啊！！
Saturday January 28, 2006 Xanga
Friday, January 27, 2006
今日係一個大開心既日子，玩得好疲倦，但係好耐都無似過咁開心咁過一日！\(^o^)/ YEAH!
雖然今日朝早要返八半，但係都好精神，上堂好留心，練習又識做，一個唔錯既C++開始！之後就上Circuit堂，我好鐘意依個阿Sir，因為我覺得佢教書好有Heart，所以我好俾心機抄筆記！
跟著就係EIE籃球大賽，開始我地打3on3，慢慢就有好多同學仔加入，於是我地打完場。雖然大家既球技唔精湛，但係就攪出好多大笑話！發覺自己真係好鐘意陽光，好享受係陽光之下運動既樂趣！
同阿菜佢地去完海港城之後，就上第一堂既AMA。
聽同學仔講，AMA個阿Sir講英文又快，而且仲好嚴，好黑人憎。不過，我覺得佢都唔係咁差姐，雖然佢英文講得真係好快，但係留心少少就聽得明。而且，我發覺坐前排真係專心好多，以後都要繼續！
雖然係要留心上堂，不過我地都有時忙裡偷閒。上堂果時不時整蠱同學仔，今次對象就係小白，我地用一條銅線綁住佢個袋同張凳，哈哈哈！其實我地仲有整蠱Connie，不過佢發現唔到！=P
之後，我同James就去搵C++阿Sir，探下Test.2既成績。點知大開房門，就發現已經有十幾個同學仔迫係阿Sir間房仔裡面。阿Sir睇左我地Test2既Code同Lib，都話好大機會Pass！好野！>V<
團年飯之後，楊氏宗親就去維園行花市，而且發生左好多攪笑趣事…
姊弟戀！？
S：「買個公仔俾女朋友啦！」
T：「佢係我細路黎嫁。」
S：「哦，唔好意思……」
姊弟戀二！？
B：「喂，咁岩既！」
L：「喂！買個公仔俾女朋友啦！」
B：「唔係啊！」
L：「買左就係嫁喇！」
B：「都話唔係！」
L：「咁你要努力ｄ喇！買個公仔追下佢啦！」
B：「佢係我家姐……」
L：「無所謂啦！買個公仔俾家姐啦！」
女朋友仔的可愛小狗！
B：「隻狗仔幾多錢啊？」
G：「一百五十蚊。」
B：「下！？頭先我黎睇都係九十蚊，你問下依個哥哥！」
M：「係啊！頭先九十蚊既時候你又唔買，而家老細話要加價。」
B：「點會嫁…平ｄ啦！頭先我女朋友見到隻狗仔，覺得好可愛，好鐘意啊！佢覺得太貴，所以唔想買。但係佢而家好唔開心啊。幫幫手，平少少，大家開心啦！」
M：「唔得啊！老細話得番幾隻，無得平啊！」
B：「平少少啦！我九十蚊買番啦！」
M：「老細話無得平啊！得番幾隻，百五蚊都有人買。」
B：「實在大貴喇！」
G：「買野俾女朋友係要落下本嫁喇！」
B心想：「……無奈，依句實在太有威力喇……」
開心指數：☆★☆★（五粒為最高）
p.s.好長，不過每一件都係今日發生既開心大事！
Thursday January 26, 2006 Xanga
近幾日聽到有幾個同學仔要quit既消息，雖然同佢地識左唔係好耐，但係不知不覺間，我覺得到大家已經建立左一份真摯既友誼。
夕陽無限好，只是近黃昏。大家相處既時間真係好短暫，但係往往因為短暫，所以我地先會覺得係美好而去珍惜。
不過，我並無因為quit左既同學仔而感到可惜。因為我知道，佢地正向著另一個目標而努力！雖然大家行既路唔同左，但係我相信，總有一日，大家會係路既盡頭再次見面！
無論JUPAS又好，NON-JUPAS又好……
God will bless hardworking students!!!
聽日要返八半，都係去訓覺先，唔係就好似今日咁走晒上晝所有堂…
Thursday January 26, 2006 Xanga
想知主角點樣瞞天過海，繼續睇啦！
第六話：八月尾發功
我選擇了自修重考。
在八月尾，我已躲在自修室裡。空空蕩蕩的自修室，空位很多，怪人也很多。中年婦女的咀巴不時地響，西裝先生的手機不時地響，還有退休老伯的屁股也不時地響……
太約六時半，我便回家了。
晚上，我收到一封e-mail及一首不知是誰人唱的Rap歌歌詞……
唔知你仲記唔記得
李白小時很懶惰
天天不願去上課
街上看見一個老婆婆拿著鐵棒慢慢磨
李白心裡很驚奇 Why!? 走上前去問仔細
婆婆話她說要磨一根針
李白聽了 What are nonsense!
李白佢心裡咁諗 鐵棒粗壯針而小
嘩 一輩子也磨不了
但婆婆話只要你有恆心 鐵棒定能磨成針！
李白聽了很感動 從此讀書很用功
後來成為一個大詩人
多虧婆婆的好教訓
一首偉大 一首世人傳頌 一首警世o既詩
過o左咁多年 依然係街知巷聞 係中國人都會知
每次背起上0黎個個都啷啷上口
記得小時候 陸陸續續 一句一句 將佢背到滾瓜爛熟
但係首詩既寓意教訓就從來都唔入肉
我係咁背我係咁讀
呢個教育制度不斷向我地落毒
最緊要知道考試題目答中Model Answer
就會被取錄 答錯就會被foul出局
搞到雙失青年 邊緣青年 每年五六萬個
傑出青年每年最多咪係又0個十個
我俾佢玩到傻 唔係我諗多0左
你同我我同你你同我我同你你同我我同你你同我我同你
都俾呢個大染缸荼毒過
俾你餵0左咁多歲月我食Mom Mom 我食到嘔血
我唔再係你0既小寶寶
唔好撥煽情太老土，0係呢個世界度要怪就要怪呢個無情0既制度
不斷倒模製造痴線佬~
我地唯一可以做0既就係嗌唔好！
俾人取錄、俾人foul出局
劇情發展人人會有唔同0既結局
你地哩班鴨仔前途是否光明就視乎你地哩班鴨仔0既消化系統
係咪老馮 係咪0趙完鬆 係咪成日食札肉檬……
望著電腦的螢光幕，心想何解有人能如此聰明，作出一首好歌曲。
如果小學課文也譜上了Rap的歌詞，雖然不知是否動聽，但若旋律吸引，肯定對學生們背書有很大的幫助。
如果有人能把中四、中五的中國語文譜上Rap詞，Rap著會考的課文，一定能啷啷上口，更加有趣味！
我試圖在google內，搜尋「會考課文與歌詞」，看看有沒有有心人把會考課文改為歌詞。結果，出現了811項符合「中學會考課文 歌詞」的查詢，可借並沒有我想找的東西，反之找到了很多中學會考課文的不雅改編文章！
………天呀！
幾篇課文，兩年內也背不上四句，改了「咸文」我竟然可以即時啷啷上口！！
待續…
p.s.稍後會提供這首Rap歌給大家下載。
Thursday January 26, 2006 Xanga
好！經過我一番思量！我終於決定唔練仙！因為我感覺到人生係充滿好多意義，有好多心願我係未達成！=]
好～計劃一下先！
我決定重溫日文50音，要練習到看字識讀，聽音識寫！之後Sem.2加入SCU，狂Sit日文堂。目標係識得用日文寫日記！
第二個目標就係學識睇琴譜，完成15堂既初階班！目標係識得完完整整睇譜彈一首好歌。
至於運動方面，每星期起碼要練兩次波，練好遠射同傳球！仲要去做GYM增磅，操體能。目標係列入好景隊正選名單！
新年假期內，要睇番幾本贏，包括The Intelligent Investor, Parallel Thinking, The Photoreading Whole Mind System…
仲有，農曆新年之後要俾心機上堂聽書，坐前排，抄筆記！目標係Sem.2爆過3.5！
好！加油！衝啊！我要完成所有目標心願先可以上天堂！.\_/.
Wednesday January 25, 2006 Xanga
十七歲的第五回！精采！
第五話：謊話，由十七歲說起
回憶中二那年，我喜歡了一個同班的女同學，在那時，已有很多緋聞發生在那女孩身上，可惜，男主角永遠不是我。或許是我的眼神出賣了自己，當時我已盡力掩飾，但最終也被聰明的她發現了。
有一天，她主動走進有蓋操場下的長凳前，主動跟我說：「我是基督徒，牧師不鼓勵我們說謊，神也不喜歡我們說謊，我問你一個問題，你要老實回答，你是不是喜歡了我？」
當她拿了神、耶穌和牧師出來要我回答這個問題，我該不能逃過、跳過吧！我猶疑半響，然后點頭：「係！」
………自始之後，我開始明白謊話的必然性。
人，原來需要講大話，尤其是面對自己喜歡的人！要不是，就不會發生有很多麻煩的事……被同學嘲笑作玩、班主任輔導、見社工、見家長……
我喜歡我媽媽，所以我決定向她說了一個我也不知自己能否承擔的謊話！
因為我深信她承擔不起我的實話，若我說了：「阿媽，我會考得三分，A有五分，B有四分，C三分，我有三個E，總共三分，其餘五科全部不合格，其中當然包括中國語文同英國語文啦！讀理科既我，可惜Phy,Chem,Bio都失了手，但唔緊要，我相信日後見工唔會問MC²=咩，也唔會問六國滅亡(1)、弊在那裡啦！媽……媽、你拎著把刀做咩啊！？阿媽…你醒啦！」
所以，我簡略地告訴媽媽，我的成績……
我騙了她，我尚算順利原校升讀中六，而成績單也順理成章給學校收了。
「成績突出固然係好，但係日後仲有其他重要既野既學！你問下Daddy，佢見工都無俾人問會考題目啦！」媽媽輕鬆地說。
「老豆，當年見工有冇問漿聲燈影裡係未真係有秦淮河(2)？」
媽媽笑說。
爸爸也傻傻一笑。
因為一個大話，我在放榜當晚，我和爸爸媽媽出外吃了一頓一千元的夜飯！而且他們也很開心，一切也很順利！
*註：
(1)《六國論》蘇洵；中國語文會考課程內的長青課文，由八十年代到現在仍見此課文，屬於熱門課文。
(2)《漿聲燈影裡的秦淮河》朱自清；八十年代香港中學會考中國語文課程內的課文，同屬熱門課文。
待續…
Wednesday January 25, 2006 Xanga
學嘉豪話齋，係未就黎死，定係練成仙！點解可以日日唔洗訓覺，唔洗食野，對著部電腦就可以過一日！？咩事！
阿仙奴班球員又發生咩事！？點解班後防咁唔集中，中場咁唔硬淨，前鋒咁唔勤力！雲加點解會毫無對策！
後記：忘記過去，邁向將來！
我諗我俾【剎那之光輝】擔誤時間得大耐喇！由今日起，我要重要振作起黎！完成番暑假前承諾過既目標！！衝啊！！
睇完無線個節目，真係好想去一次高貝利，嗦一嗦金爺件波衫！我諗感覺一定好似陶傑咁講，非常亢奮！！
雖然今年既阿仙奴的確令我好失望，不過球隊總有高低起伏，我係會唔咁易就放棄阿仙奴！希望下屆轉左新球場，加入左新球員，成隊波精精神神，踢好波，贏好多波！！
Tuesday January 24, 2006 Xanga
今朝個鬧鐘好煩啊！響左幾十次，破壞晒我個好夢！大可惡！
起身之後，幫我部電話大變身，加入左好多新相，以後接電話會見到大家個靚樣，哈哈！
好開心既同時，我突然記得…………IT.Lab!!
死喇！我仲當自己放緊假，竟然唔記得要上堂！可惜一切已經太遲！我望一望大鐘……九點二十分。
唉，心中慨嘆……算啦，就當今日day-off 啦
見今日day-off，我就諗著出街剪頭髮，不過一出門口之後，我就立即返番入屋。因為我個頭話俾我聽，佢好怕凍，老實講，我都好怕凍，於是我地決定一齊跳入被窩裡面，享受人世間最溫暖既感覺。
除此之外，我發現原來用Ｌ既坐姿黎玩電腦，隻腳係無咁凍嫁！實在太幸福啦！！＝ｖ＝
另外，自從有xanga之後，開始遺棄A&B Forum，我諗我都要開始投入番，付番一個會員、一個版主應有既責任！
p.s. B-s…secret…=X
阿閃，希望下年Poly再見！加油！