七‧一‧乘風航
今次水上歷奇，充滿著好多人生既第一次體驗。第一次跳海、第一次無爐燒烤、第一次訓夾舨、第一次救人逃生、第一次享受海風……
多種指定任務之中，我覺得棄船逃生演集係最深刻難忘！我地有紅火、綠火兩組，分別由歡號（船名）既左右棄船跳海，每組靠五個水泡，游到附近一個安全既沙灘上岸。
最刺激既地方就係當中有幾位組員唔識游水，所以我地要好好利用個五個水泡。我屬於紅火組之中既第五組，共五位組員，而當中有一個完全唔識游水既組員，兩個識識地游水既組員，而我同阿傑兩個識得游水既就要負擔起先鋒既角色。
我同阿傑二個負擔拉著水泡既前方，而其餘三位係水泡後面推。
一開始我地游得好快好順，大家都有氣有力。不過游到中途既時間就出現問題，我地開始乏力，每位都飲左唔少海水。加上一個接一個既浪湧埋黎，個感覺真係好「鹹」。而且我地又游錯方向，浪費左唔少氣力。
本來覺得好辛苦，但係我到游過左一堆遊艇之後，終於見到個沙灘，真係非常鼓舞。我地用盡最後一點氣，安全著陸……個一刻真係振奮！！
記得船長講過，中國既五千年歷史係由黃河孕育出黎，但點解唔係資源豐盛既長江呢？原因係黃河經常泛濫……
意味著，人類其實不斷從困難中成長，而不斷樂得強壯、勇敢。溫室長大既兒童係經唔起海浪，反而受苦令我地變得更強！！
我真係好鐘意集體遊戲，因為每一次都令到我感受到團隊精神既威力，我好享受一班一齊完成一樣任務個一刻既喜悅！！依一種喜悅比起自己榮譽更加值得亢奮！！
Leave a Reply to Bergkampho Cancel reply