今朝明明已經訓醒左，但係，因為上次教班魔獸既慘痛經驗而唔想起身教波。不過，好彩最後我都戰勝心魔，前往鴨利洲魔獸小學進行我既降魔大行動！
我發現班魔獸原來個個都係受硬唔受軟，所以我上次對佢地太好人，反而班魔獸唔會驚我！有見及此，今日我借左黑面神個面具，擺出一幅地獄教練既款，不停鬧班魔獸，不停恐嚇佢地，結果班魔獸感受到我既威力後一一馴服於我！
另外，今日Claire萬歲請食飯，不過我掛住玩MSN而遲左出門口，對唔住啊！我地本來諗著去「陶源」食鮑魚大餐，但係結果去左附近果間「桃園」食【一流】、【正】、【好】，哈哈。我、阿蚊、Claire三個傾左一陣偈，再約埋阿蚊個朋友仔之後就去白宮篤波。
今次係我香港既第一次篤波，雖然只係入左兩球，但係玩得好開心。Claire好搞笑啊，成日都篤起個波或者篤空氣，不過最後幾經鍛鍊，打到個波已經好犀利嫁喇！
之後，就同阿蚊班朋友仔去維園踢波，去到竟然俾我撞見番三個好耐無聯絡舊同學仔。今日真係一個舊同學仔同樂日啊！哈哈！雖然我著長褲白鞋踢波，而且個場超級悶熱，球感又未番黎，成日交失波，但係最後都拎到兩個士哥，表現不過不失啦！
今日真係玩得開心啊！大快樂啊！
Leave a Reply to ericny6527 Cancel reply