Friday October 7, 2005

今日係足球教練實習既第一堂。本來希望見到既係十幾位天真可愛、聽教聽話既小朋友，點知被我見到既竟然係二十隻糊亂放肆、不守紀律既魔獸~~!!!!!!

教授其間發生既事情非常混亂，叫班魔獸集隊佢地就走黎走去，叫班魔獸踩定個波佢地就踢到周圍都係，叫班魔獸鬥波佢地就去打交。總之班魔獸就曳到爆炸，詳細內容不能盡錄！如果大家有興趣就問我啦！

另外，今日係Poly.I-day，我就做helper派下EIE傳單，教下人去聽講座。記得上年同多多一齊黎參觀，人生路不熟。點知今年竟然帶其他人去參觀，教佢地點樣行去演講廳，哈！

今日第一個任務係派傳單。目標係兩個鐘頭之內派完。跟著我同阿正環繞Poly咁派，唔洗半個鐘，好快就派晒所有傳單。之後見到阿科，佢介紹左個兩新朋友俾我識。

大約去到三點半，我同阿正返總部接受第二個任務，都係派傳單。博士話派完傳單就去大本營駐守，不過我地同左兩個字極速秒殺晒所有傳單，就去搵阿科佢地。

然後，阿正就帶我地去hall參觀。本來諗著租場篤波，點知每位要$20/hr。於是我地就決定去黃埔打波。去到球場，我地見到有一個小朋友自己練緊射波。跟著我地五個就走過去叫佢鬥波。

打完幾場之後就休息左一陣，其後我地吹下水，講下學校野又繼續鬥波。不過今次就同班勁人打，我地好似俾佢地凌辱一樣，其中一個fake人好勁，好彩最後我地都入番幾球，但係都玩得幾開心！

自從上年學期初同同學仔打波之後，好耐都無接觸過籃球。加上，今朝班魔獸搗亂，近期又無咩做運動，所以打完波之後好疲倦。返到屋企一陣就訓左覺．．．

p.s.妹子耀今日牛一，雖然無同你一齊去慶祝生日，但係透過EMwave同你講一聲：生日快樂！唔好再咁妹喇！