今日，我又一次硬膠膠地過日子。一朝早起身，呆呆滯滯咁上網，死死板板咁睇一次個幾個網頁。之後去新聞組，睇下有咩新事物，然後就打機。見打到悶就會同人玩MSN。跟著就訓個晏覺，醒左之後就食飯。食完之後，就睇電視同上網，又係上番一朝頭早上過既網頁，睇下有冇咩特別更新。然後就睇日劇，如果睇晒就打機。打到眼訓就去訓。一日既光陰就係咁樣度過。依個狀況，足足維持左一個星期。
我好清楚如果我再係咁繼續落去，我見到我既將來只會係一片漆黑。因為我到而家仲係講得出，做不到。其實良心一直都責備自己，一直叫自己唔好再係咁。不過，永遠都係過左一陣之後，就當無左依一回事，繼續咁過日子。
究竟點樣先可以有衝勁，積積極極咁去做計劃好既事呢？係未真係要去到最後關頭先會去努力、先會動手去做呢？係未真係要撞過板先識得痛，失敗左先識得後悔呢？係未真係要有奚落你、睇死你先會燃點鬥志呢？
其實講多無為，行動最實際！
可惜，我永遠都係講完要做咩，就當左自己真係有做到。就好似前幾日，口口聲聲話要點要點，但係結果都係無做。
究竟我欠缺左邊一種元素黎推動我呢？
我好明白，我要點樣做先會成功。但係，我唔明白，點解我唔會去咁樣做。有時真係好希望有一個人可以監督我、管束我、鞭撻我。而且，更想依個人可以點醒我，甚至蹊落我、鬧醒我！只有係咁，我先會唔甘心被人睇死，發奮向上！可惜，依一個人未曾出現過。
我真係好羨慕其他人，特別係小寶。我真係好想知點解佢可以咁努力。我真係唔想硬膠膠地過日子．．．
我同你差唔多咋…..嗯….唔係….我諗我仲衰過你……….=.=”
我依家仲未有一個明確的目標……
但係你既然係有計劃…而且已經計劃好…點解唔做….??
係咪冇自信做到….或者冇自信做得好….??
我又唔係無信心，我係無恆心同動力囉！簡單一個字，「懶」！
真係好希望可以改善我依個惡習！
你都未落手落腳做過…點知自己係冇恆心呢…….=.=”
好明顯係懶啦……….
無錯，我真係好懶．．．而家唯有寫張紙仔，貼係書檯，叫自己唔好咁懶啦。
*random props*
very nice xanga~
thx yr props~^^
跟我學結他喇XDDDDDDDDDDDDDDD
我想學打鼓~不過又無錢買個鼓黎學 orz