一朝早，四點半就俾隻死人蚊搞醒左，終是就開電視睇下波啦。點知一轉去亞視，剛剛好完場，結果只係睇番精華…場波雙方都無咩攻勢，大家互交自卷，簡直就係悶戰一場。睇完歐聯之後，就開始整理下電腦裡面既檔案。因為考高考之前d/l左勁多野留番考完試之後黎娛樂。於是搞搞下，太陽都出來了。 
計計下我個80GB.hdd而家只係得番3GB，其中有成80%都係動畫、日劇，真係有d變態。係咁多套日劇之中，揀左H2黎睇。第一集都唔錯，都幾搞笑下。睇睇下，話咁快就九點鐘喇。
之後落去表弟屋企打機，由於唔係成日打勝利十一，搞到技術生疏晒。唔洗問我緊係揀阿仙奴啦，咁巧合第一場就對宿敵曼聯，點知唔夠十分鐘就俾佢入左兩粒。好彩期後寶寶同皮皮追番成平手，至可以力保不敗，唔係就真係無面喇…跟住用阿記黎玩聯賽隊，不過勁虧啊！打左六、七場，竟然輸左一場同和兩場。差唔多場場都只係入得果一兩球，玩玩下都無癮 lu ~ 於是就番屋企食過晏先。
臨走之前拎左隻「變相怪B」DVD番屋企睇，點知隻DVD既質素仲屎過VCD又窒機、又有格仔；又話有獎門人配音，結果又無既。睇睇下仲要停鬼埋，一個STOP制就唔鬼睇 lu ~不過由於部43″實在太過、太過正喇，唔好好咁用盡佢又好似好徙。於是就上網搵下有咩軟件可以張rmvb轉VCD，結果搵到隻WinAVI既software，然後張H2既第二集同第三集轉左做VCD，留番聽日慢慢欣賞。
大約去三點半左右，又落番表弟屋企。因為之前借左佢部計數機，咁我第一次落去又唔記得帶，所以未拎番落去還俾佢囉，仲幫佢入左幾條勁既方程式。如果個時有而家依幾部新計數機用就正喇！超方便，禁幾個制就出晒d答案。
落到去之後，無無聊聊又打下WE啦，不過今次表現超勁啊~~狂大抄對手！可能係俾左柏金做隊長，當堂成隊波唔同晒。寶寶同皮皮繼續狂入波助攻，而法比仔成長率又升得超快，所以打得好爽啊！但係玩得大耐，搞到患左任天堂手指症，於是就轉玩鬼武者3。個主角變左城武哥真係型好多，可惜唔係0係部43″度玩，無咩好正既視覺享受。
不經不覺都玩到已經到夜晚九點半，之後阿媽打黎叫我返去食飯。食完飯之後見無野就拎左今日燒果隻H2第二集黎睇。嘩~!!43″果然係唔同d既~~第二集個劇情都幾緊張，唔錯唔錯 。
其實今日原本諗著去打機同踢波，不過表哥唔得閒，結果無去到踢波。依個高考完結第一天就係咁樣度過。好~~!!暫定聽日溫日文、覆診同買書~~