2025年就喺寒冷又比較安靜嘅冬天開始。呢一季，大部分時間我都係喺屋企做嘢，生活節奏偏慢，但好有規律。英國冬天嘅天空成日都灰灰藍藍，日照時間短，屋企就變成咗一個可以專心同沉澱嘅地方。
二月份，屋企人由遠方嚟英國探我，為本身比較平靜嘅生活增添咗溫度。表姐一家和舅父一齊嚟到 London， 約埋波仔，再次相聚。表姐請我哋去 Duck & Waffle 食飯，喺高處望住城市夜景，又一齊食過 Japanese cuisine。呢啲圍住張枱傾偈嘅時光，唔單止係食物嘅記憶，更係親情喺異地繼續延伸嘅感覺。
之後，到家姐嚟英國探我，一齊去咗 Windsor 行下，喺一個古老又莊嚴嘅小鎮慢慢行，感受英國歷史同日常生活交織嘅氣氛。對佢哋嚟講，呢次係了解我喺英國點樣生活；對我嚟講，就好似重新用另一個角度，望返自己已經開始習慣嘅地方。
同一季入面，我同阿怡開始嘗試做市集生意，為生活開多一條可能性。我哋參加咗 London DIY 同 Bedford Craft & Flea Market，由準備、擺檔，到同陌生人傾計，每一步都新鮮又有少少不確定，但亦令我哋有機會去到英國唔同嘅地方，見到唔同嘅人和事。
工作方面，我第一次去到位於 London 嘅辦公室，亦係今年唯一一次同同事喺Office一齊返工。諗返起上一次真真正正喺Office工作，已經係 COVID‑19 疫情未發生之前。經過呢次體驗，感恩自己可以有彈性同自由嘅工作模式，擺脫每日搭車返工放工嘅壓迫生活。Can’t complain.
生活嘅另一邊，我都多咗參與教會嘅活動，慢慢建立更多屬靈同社交上嘅連結。有一次同教會朋友一齊行山，行到由 Cadbury 捐贈嘅 Beacon Hill Toposcope。企喺高處，遠遠望到 Birmingham 嘅城市景色，視野好開揚，個人亦好平靜。嗰一刻，感受到身體嘅勞動、朋友嘅陪伴，同埋一種由內而外嘅安穩。
第一季，就係喺寒冷之中慢慢展開，冇乜轟轟烈烈，但一步一步累積返人與人之間嘅溫度，亦為成個年度，鋪咗一個溫和而踏實嘅開始。