由於訓唔慣張床，所以今日六點半鐘就起左身。見阿爸仲未起身，無無聊電視就開電視黎睇啦。電視做緊張衛健既天下無雙，今次唔係普通話配音，而係粵語。不過張衛健把聲唔係佢本人。套戲都幾搞笑既。可能係因為太早起身，又見肚餓，所以不經不覺係張梳化訓埋左。
大約八點幾，阿爸醒左，於是就起程去書城。出發之前去左一個叫明珠既茶餐廳食早餐，係餐廳窗口望出去，見到一個係香港好少見，但係大陸就好常見既現象，就係成班人”蹲”係街。佢地圍埋一齊好似開緊賭，到我走既時候仲愈黎愈多人tim
跟著我地就搭公交車去書城。上到車發現又無入錢箱，又無拍卡機，以為唔洗俾錢，原來佢係有個女仔賣票既。格車行下行下就愈黎愈多人上車，格車迫爆晒人。我見到賣票果個女仔好厲害，左串右插，不停向人收錢。不過咁樣收錢法，有人唔買票落左車都唔知，但係佢地又幾好公民意識，好多個都主動去俾錢買票。
掛著欣賞車箱裡面既情景，發現原來我地遲左兩個站，於是拿拿聲落車。由於深圳起左條新地下鐵，所以就試下搭啦。落到去地下鐵站，發現個度都算幾乾淨，冷氣都幾夠，而且指示都幾清晰，仲有好多服務員指引乘客。於是阿爸就去買飛啦，嚴格黎講應該係買「幣」。因為佢地過過閘口唔係入飛，係做下面個d綠色「銀仔」。
開頭我以為係會有個窿俾我入個銀落去，原來係好似八達通咁「嘟」一「嘟」，對閘就會自動打開。落到去月堂，四週同香港地下鐵都無咩分別，不過無香港咁好多人人來人往。
但係原來只係果個站特別少人，當格地鐵黎到既時候，發現列車上黎都有相當多既乘客。不過格車裡面就唔多夠冷氣。
到左書城，發現果度係一本英文書都無既，連我唯一想買果本中文書都無得買。唯有週圍行下，睇下有咩書吸引到我啦。但係最吸人到我唔係書，而係人。佢地好搞笑嫁，係班人坐係書架旁邊睇書，有d就企係度，有d就蹲係度，個個都當依度係圖書館。不過，正所謂入鄉隨俗，見佢地睇得咁過癮，我都拎本書蹲係度睇。今次睇左幾本講足球理論既書，不過佢地引用佢班球星都係過晒氣。但係無理由專程黎到書城唔買書就去人嫁麻，所以就買一本教人點樣防守既書。
去完書城後就去食野，入到一間叫「萬象城」既商場，個度同一般大型商場無咩分別，仲有個溜冰場，班溜冰既細路都好多水準。不過可能讚壞左，即刻有個細路PK。上到最上個層食野，個度買野食好搞笑嫁！要先買左張智能卡，然後儲錢入張卡度，跟著就去間食肆度嘟錢。
到左依度，北上尋歡之旅快要進入尾聲，我地就入到巴士站搭車啦。沿途見到d日資商店都閂晒門，仲見間味千俾人拆晒招牌。
係返到火車站既途中，發生左一段小插曲。就係俾我地見到有個扒手跟著個女仔，諗著想偷佢後面個袋既野。當時仲有兩個途人發現左佢行為古古怪怪，但係個扒手仲好似好惡咁叫佢地唔好嘈。之後係女仔點，我就唔知喇，祝佢好運啦！
由於今日係五一黃金週假期既第一日，加上聽日又係紅日，所以過關都唔係好多人。我地行秘密通道，好快過到關。今次終於都用到「e道」喇！真係幾方便，不過打手指毛就失敗左一次
返到屋企已經無晒力，終是訓左一陣。起身就睇大長今結局，之後上下網。見有時間就睇H2第五集，今集更加精采。千川終於都打入決賽喇！不過對方既奸細好以已經有所行動，比呂仲受左傷…唔知會點呢？直覺覺得千川仲係入唔到甲子園。
咁就係我北上發生過既事情了。
。
