Blog

六點半起左身，成身黐淋淋，所以沖左個靚涼。跟著就睇「小飛俠」，等到三姨返工後，就繼續打機，又買左幾個新血。點知又俾人大抄，仲有場和波，搞到升唔到班。

之後唯有爭聯賽盃，場波超緊湊，一開波無幾耐就俾人入左粒，然後猛烈逛攻，終於都係完場前迫和。到加時階段，巴迪斯達壓入禁區，點知俾個後衛一剷，球証直指十二碼。因為依球好關鍵，所以諗著射中間地波，就算撲到都可以保射。點知咁唔好彩，真係被龍門救到，連保射都唔入，簡直超級無奈！

大難不死必有後福，客隊立即入左一球，好彩係銀球制，仲可以追翻。之後又逛攻，終於都入翻一球！但係最後都要互射十二碼，諗著有必殺技加希迪布蘭把關，應該無咩問題既，點知班射手球球都同我飛晒機 =口=，真係O晒咀！最後捉到路都俾佢射入，搞到輸埋。好彩有得load.save玩多次，今次大抄佢六蛋捧盃。可惜升唔到班，唯有重整旗鼓，下屆繼續努力啦！

打完機，就返好景，今日生意都幾淡，於是聽收音機，講既話題都幾搞笑，又週不時播下正唱，所以依日都唔係幾悶。記得FAMA既”bown”技筆大師真係好鬼正。

然後就去踢波，景熙話有五個人踢，但係去到得左仔同肥滔，不過都無所謂啦，我去志在練下波姐。都有成個月無踢過波，但係上次係書城睇左幾本足球理論書，所以踢得都唔錯，發覺裡面既知識真係用得著，不過自己就唔係幾夠氣。有一球出波，隻重心踩到塊樹葉，搞到拉一拉，而家都痛痛地。大約踢左一鐘左右就返屋企lu…

ps.阿仙奴好勁啊！大抄拖肥糖七蛋！柏金緊加表演超卓，三記助攻加一個入球。雲加你仲考慮咩啊？快手續金爺約啦！

今日繼續返好景看鋪，大約到六點半，我表哥就黎搵我。一路傾計，講下波經，然後好有興致想整番隊西維爾，不停傾下有咩好球員。講講下好快又放工喇。

之後去完新輝食飯，就去表哥屋企打機，進行實況足球之西維爾計畫。一開波買左法比仔同辛仔，跟著頭果幾隊都打得唔錯，巴迪斯達超勁，神射手加助攻王。不過打到零晨就有少少眼訓，和左幾場，仲俾禾夫斯堡打抄。玩到四點幾就係埋佢屋企訓。

Tuesday, May 10. 2005 7:30am
  
等車果陣又落大雨，過一陣又停番，個天都唔知搞咩鬼既。等左都多耐，部94黎到喇，但係個冷氣超凍，半訓半醒既情況下終於番到屋企。一入門口就立即撻上床訓。真係好眼訓，一訓就二點喇。

落床見到書檯有幾封信，原來係UST, Poly, City都叫我去聽講座。我仲意為無間大學會搵我添。跟著就打左陣西遊記，睇下香港直播。不過玩左一陣又覺得眼訓，又再去訓過。訓到六點半，起身就睇下珠珠，之後就食晚飯。然後就打西遊記，今次打爆左蛇魔王，但係佢又係殺死左之後走人。跟著無玩喇，就上網。

見肥鍵上網，就叫佢玩AOC，佢今次又整左個硬膠場。根本佢次次整出黎既劇情都係有利佢既，以後都係唔好同佢硬膠喇，玩番正常武力征服仲好。過無幾耐又覺得眼訓，終是再訓過。依兩日玩得太興奮喇！聽日要做番大計內既事先。

ps.今日係荷蘭超級巨星阿仙奴靈魂人物柏金大爺既三十六歲生日。祝你生日快樂，繼續踢好波俾大家踢。唔好咁快退休住啊，要等我飛過黎睇你踢一場波先啊！
    
Monday, May 09, 2005 11:00am

由於一班同學仔都考晒所有高考科目，所以我地約左去英武間私人會所打機。

我、王錦熙、旦旦鏗、梁志勤、阿達一行五人出發去英武會所，但係勤竟然唔知醒，於是出發時間延遲。大約去到十二點半，我地去到新會所喇。波波、嘉豪、虧佬都已經到左，仲打緊高達。咁我地就不停食英武係日本買番黎既手信。會所度仲有張按摩椅，咁我就試下啦。嘩！個按摩轆一碌埋黎痛到扒街，都唔好坐既！不過後黎坐坐下又幾過癮、幾痛快。

然後其他人就打牌，我就打實況，又係用阿仙奴啦。照舊係慢熱，但係打打下就上晒身，加上熙教左幾招新招，而家打Winning超強啊！一直玩到九點半左右，就叫Pizza，食得都幾飽。其後嘉豪佢地就打無雙同高達，我就打PSP賽車，不加好易玩，仲有氮氣加速，好勁啊！

玩到十一點半就準備走人，點知落晒大雨，而得我有帶遮，咁我地就決定上番會所打通宵。番到上去，繼續打機，一直打到第二日六點。其間我打左高達同實況，打到發晒任天堂手指痛症就唔玩喇。跟著就去訓番一陣，但係梳化熙同達都訓緊，所以就係按摩椅訓左一陣。而波波同嘉豪就走人。

過左無耐，佢地又上番黎。原來又係落屎狗！再等多陣落雨，我地就索性番屋企訓。

今日唔洗幫四姨丈手，可以係屋企盡情咁玩！一朝早起身黃雨(令我諗番起阿豐果個黃乳)，之後就係度玩極速下載。今次下載左《踢出我天地》同《龍珠》動畫版。不過搞到部機處理同上網都好慢。

跟著就玩MSN，吹下水。然後上載尋日影既相(here)，由於又要相既改番大小，加上BT緊動畫，所以都搞左個粒幾鐘。接著就訓左個晏覺，醒番個陣個天都黑晒。

一路食晚飯就一路睇《有招出招》，我覺得依果仲好睇過《殘酷一叮》。因為個個出黎表演果班都係勁野，而最印象深刻就係個班「速算三人組」，個細路唔洗用算盤，又唔洗用手指，只係眼望望。結果佢隔離果兩個搖晒手都係計錯，反而佢計中，真係犀利！

原來佢都最後仲有個環節，就係做到一個指定既動作就可以拎走十萬蚊。今次做既動作係矇著雙眼，提起一隻腳，之後如果能夠保持平衡一分鐘就可以贏到獎金！依個玩法我係《開心大發現》都見過，由於平衡要需要透過眼前既景像黎確定自己既位置，所以矇著雙眼就會好難平衡到，不過我已經知道破解既竅門喇！！就係自己係腦海中幻想番眼前見到既景象，咁樣就唔會迷失方向，我自己已經試過一次，係成功既！如果俾我做就一早拎左果十萬銀走喇！

跟著就睇《獎門人》，今集好鬼搞笑啊！Eason果隊超級搞野，笑到我扒晒街XDD，另外隔離台果《一舉成名》都唔錯，如花好掂啊！接著就睇星戰，第一次睇果感覺都唔錯，下星期繼續追。

然後就睇阿仙奴對利物浦，今場班球員好上力啊！皮皮同雷爺係早段就發力，連轟兩球。最後，柏金一記「神」交，法比仔射入，結果3:1取勝！

今日真係非常開心啊！好耐無咁盡情去做自己既野喇！

尋晚發左個怪夢，夢見自己去試場既情形。個夢係咁既……我要去考會考，但係又唔知醒，於是就立即飛的士去試場啦！部車行到銅鑼灣既時候，突然間落大雨。所以我就立即著番件雨褸。望下張準考証，四月二十六，威爾斯聖士提反學校，考英文科。但係發覺張準考証原來未有校印，所以要去左 1010 吸印。

俾左五十蚊車費就落車，當時係十點正，而開考時間係十點十分，於是就喪奔去果間學校。一路跑，一起跑，眼見格學校就係前面，但係靈光一閃，我唔記得吸校印啊！所以又跑返轉頭，但係隻腳傷左，心諗：不如唔好去考啦！一定遲到啦！不過俾左錢又唔去考又覺得好唔抵，唯有硬著頭皮咁走去1010啦！跑既過程一路望著張準考証，發覺今日原來係唔洗考英文，再睇清楚，係要考中文口試，個心終於都定番，咁都無咁驚！

終於俾我見到班考生喇！仲見番好多同學仔，有阿雞、蜥蜴、多多，但係仲有邪眼同超很煩。於是立即轉移視線，避開邪眼死光。果度有兩條長龍，一條入學校、一條去吸印。咁我就拎著張準考証吸印，見到個職員係慶叔，仲俾左五蚊吸印費。

入到學校，個校工就叫我去第四間房。一入到去，有盞大射燈照著黎，好彩唔係邪眼死光。然後就搵個位坐，途中見超很煩陰陰咀偷笑。見到阿雞，就行去同佢一齊坐啦。不過見到阿雞個眼神有少少無奈，原來佢隔離坐左邪眼係度。無計啦，四圍都無位，唯有位係邪眼前面。跟著又有個人坐係我隔離，原來係志豪。但係突然間聽到好大聲行雷，終於醒左lu~後來發覺原來係阿媽沖廁所水聲…

發夢真係有趣，好多奇怪、唔合邏輯既野都會無啦啦發生，但係夢中既自己又唔會覺得唔正常~哈！

今日既生活同前一兩日都無咩特別分別，都係上晝就上網同電視，下晝就幫姨丈看鋪。不過今日同姨丈吹下水、聽下收音機，時間都好快過。但係收錢既時候仲係成日都唔記得要禁”00″，搞到個價錢亂晒。

到八點半左右就同姨丈一齊去華貴提早慶祝母親節，玩到十一點左右就走人。

五月六日 星期五 陰

今日心情好低落，連著衫都係黑色，Xanga底色都係轉左黑色，總之就爆黑啦！

零晨三點幾，又行雷又閃電，又濕又熱，仲有隻死人蚊飛黎飛去！諗著落床開冷氣，落床果陣踩到個袋，仲好似踩到唔知咩野。不過咁無理佢啦，我就去開冷氣。不過覺得幾精神，於是起左身睇死亡筆記。過左大約一個鐘左右，見隻眼好累就上床訓過。再起身已經係九點，但係覺得好似過係好快，自己無咩點訓到。

返到好景，打開個袋諗著拎部PPC出黎。點知一開機，就知唔對路喇，個螢幕出現好多條間間！諗番轉頭，一定係落床果陣壓壞左啦！頂！最衰係隻死人蚊啊！你地唔好俾我見到，唔係見一隻，殺一隻！啊！！好火爆啊！！

今個月都唔知發生左咩事，又無俾邪眼死光射中啊。點解會無啦啦部DC跌落地下，搞到個外殼凹左，而今日又整壞左部PPC呢？好彩兩樣都仲有保養姐，唔係就仆街喇！

今朝起身，整理一下法比仔篇文章，然之後就打西遊記。嘩！班怪物隻隻都超多血，完全唔夠打！玩玩下就無玩喇。

跟著成個下晝都幫我姨丈看鋪頭，因為佢有個伙計唔得閒，所以搵我頂頂。期間只係收下錢、拎下貸，都無咩特別。不過看緊鋪既時候，俾我遇番見以前一位舊同學譚健朗。原來佢自己出黎搞生意，問我姨丈入唔入MP3機。但係我姨丈唔係依度，咁我地就吹下水，講下出黎搞咩生意好。好彩今日有佢同我傾下計先無咁悶！

由於星期六就考英文聆聽，所以今日都幾多人黎買收音機。如果你地未買就記得去香港仔利群商場間好景影音鋪買喇！而且好多朋友仔聽日就開始考會考喇，加油啊！我會精神上支持你地嫁！

ps.唔知點解依埋成日都見到好多商品用Diploma依款字形，例如千嬅隻MvsM大碟、公主復仇記既B、姚明個 i am what  i am、Dead note既 L、生力既字形、香工校名等等，仲有好多衫啊、袋啊都係用依款字形。不過款字形真係幾正、幾特別！

依一排有時早訓，有時夜訓，生活好唔定時啊！搞到個鼻生左一兩粒瘡。

今個早上又係西遊記陪伴著我，睇黎都有排打，因為六魔王一個都未打死過。好吹脹囉，成日以為打死一個魔王，點知又係魔王既手下黎。而今個下晝就溫左一陣日文，但係仲未背熟。要加把勁先得喇！一要溫書就有少少眼訓，所以就訓左一陣。

好耐無訓得咁好喇！醒左之後就睇《龍珠》，好好睇啊！由布歐篇開始睇，睇到大結局。不過漫畫版跳得好快，五期左右就睇完。諗翻起以前細個，真係好想有神龍幫我完成三個願望，第一個願望就係識得飛；第二個願望就係識得瞬間轉換；第三個願望就係要多三個願望！哈！哈！

ps.今日係法比生日，祝你快高長大！此外B-Blog亦貼左篇有關佢既文章。

尋晚結果都無溫日文，因為實用忍唔住要睇H2喇。本來仲諗著尋晚就爆晒佢，但係尾二個集竟然係無中文字幕！可惡啊！睇到好我慶高彩烈嫁麻！唯有搵牛魔王出氣啦。今次終於都俾我KO左佢，搞掂佢之後先發覺，原來佢唔係牛魔王，係牛魔王既手下馬面…= =

今朝六點幾就起左身，一起身就睇下下載完第十集未。Yeah ~ 下載完畢，終於都有得睇喇！比呂同英雄要決一勝負喇！邊個贏左就可以得到雅玲。結果，比呂用一記高速直球取勝，仲贏埋冠軍！

呼 ~ 終於都睇晒成套 H2喇，係大團完結局！比呂此終都係同古賀一齊，而英雄就同雅玲一齊。睇睇下雅玲，覺得佢都幾似2R個Rosanna ~ 好啦！送俾大家一張H2連環圖啦

睇完H2，就改下個Xanga ~ 終於都Save changes到喇！不過唔知點解「天天」又虧虧地出唔到圖。所以都係遲下先轉版。搞左咁多野好鬼眼訓，去訓左個晏覺…zZZZ

醒左之後，H2 既狂熱仍然未消退，睇翻第一集仲係覺得好搞笑！然後繼續打西遊記，今次玩左好耐先過到個山洞，跟著圍打豬八戒，點知佢輸左之後走佬。遲d先再炮製你！

尋晚阿仙奴對西布朗，大長金同醫道好勁啊！當然要下載黎睇啦。原來上半場都唔係打得咁順，不過下半場發威，淨勝兩比零！自從阿嬌同辛仔出左黎之後，成隊既防守能力強左好多，加油啊，贏埋最後三場波啊！

睇完波就睇大發現，今次B博士有少少硬膠，用光碟黎做搖搖同Disco波波。 臨尾B博士唔發覺自己條鬚跌左一半，仲要係度俾功課，真係笑鬼死！

夜晚又繼續打機，今次有沙憎加入……唉依幾日掛住打西遊記，無溫習日文。聽日點都要喪溫啊！