Blog

今日，成日都係好景看舖，不過今次有少少唔同，就係我去左珍寶果間好景影音，而且仲成間舖由我打骰，哈哈！

一開舖無幾耐就有個男仔黎買W-inds.既新大碟《ageha》，不過之後就好少人入黎。唯有播下唱，吸引人入黎睇碟啦！不過播左千嬅同方力申隻新碟幾次都無人黎買。跟著就睇下美苑俾我睇個本《Investment》，不過超級大本，同寫既英文都幾深，睇睇下眼看痛就無睇喇。跟著去學日文，今次學識左十五個平假名，大成功啊！接著就有好多電話打黎買問咩妹妹有冇貨，真係聽電話仲多過賣碟。

然後，竟然俾我發現左小寶隻《BestofSoul》。由於珍寶個間有DVD機，所以就順便播埋裡面隻MV。小寶個MV一出，立即見到有個阿叔走入黎望。過左無幾耐，妹子隆都黎埋，之後都係賣出左一兩隻碟。但係，過左無幾耐，姨丈打黎話隻ageha係唔賣得，因為有兩個人訂左。但係我開始聽係聽到佢話如果有人買，就拎出面果隻俾佢既。不過算啦，然後就有個人黎問有冇王菀芝隻新碟，不過果陣無貨。近期真係有好多人問王菀芝隻新碟，聽講話好好聽，但係我一次都未聽過。一陣之後，就有個人黎送碟，終於都有王菀芝。但係又過無耐，就有個人買左，真係好好賣。

之後美阮黎左，我地吹左一陣水，再睇多幾個小寶MV就差唔多夠鐘，於是就收舖。

【不求與人相比，只求超越自己】by《妹子語錄》

今日去左Ｎｅｗａｙ唱Ｋ，不過自從識左小寶之後，多左留意日韓歌曲，好少接觸到香港樂壇，所以有好多歌都唔識得唱。但係，好彩上個月有係【好景】聽歌同賣碟，所以都識得唱幾首近期既歌。由於近兩年來既粵語歌都唔係太識唱，所以今次唱翻好多以前既舊歌。不過舊歌又唔記得點唱，好妹啊！但係學妹子耀話齋，唱唱下就識嫁啦，所以都照唱。唱左好多首古巨基同周杰倫，不過唱高音好難，全部跳晒。

另外，小寶首《全心全意》想唱左好耐嫁喇，今次終於都同小寶合唱喇，但係有得隻字唱唔識讀，都係小寶把聲好聽好多。仲有唱左Ａｖｒｉｌ，但係Ｎｅｗａｙ竟然無得睇首ＭＶ，好虧嫁！本來仲想唱多幾首外語歌，不過Ｎｅｗａｙ只係得香港同台灣既新歌，外國歌手既歌就少到無論，真係好唔得！

之後就去左Ｉｆｃ食刺身，個度都有好多款壽司，其中軟殼蟹手卷同三文魚ＸＸ好好食，所以食得好飽，但係好貴。而且，最尾妹子隆同三姨笑嘻嘻仲係度妹，所以今餐好鬼妹！

本來依個五月，諗著可以學日文、練波、操體能，但係由於種種原因，所以計劃中既事情，都只係做得一半一半。

五月頭，因為剛剛考完高考，心情實在興奮無比，於是就係咁打機同睇劇集。咁既生活大約維持左一個星期，就開始學日文同整網頁，同時亦開始搵工。然後，經過美雲姨介紹，就開始幫四姨丈看舖，依個就係我計劃有變既轉淚點。

本來諗著看好景期間，都可以繼續學日文同睇一書。點知一連串電子產品既損壞，時間既問題，生活既唔定時，所以就停左學日文。而且，經過中原招聘會一事後，日文學習計劃終於要宣佈擱置，因為要就學好倉頡同文書處理，黎應付將來既工作。期間都同王錦熙、阿達做健身，但係第一次做，就做得好劇烈，搞到雙手傷晒，所以都係停下做下。

去到月尾，妹子們都已經考完會考，所以又同佢地踢波、玩AOC、整Xanga。踢波方面，自己都領悟出幾個竅門，不過就整傷左隻左腳。而整網頁方面，都學識左幾個技巧，總算不過不失啦。

簡單而言，今個五月都無話白過。雖然話係學唔到日文，但係都學識左倉頡同文書處理。我希望黎緊依個六月，就可以學識日文發音同整網頁，再操體能、練波同游水。

兩小時的征服、再臨的4.1、空矌的戰地、戰後的代價、切記的珍惜

今朝一起身，就知道左利記贏左歐聯，仲要係要失三球先，真係好戲劇化！見到佢係捧盃既一刻，真係好羡慕。唔知柏金可唔可以一嘗捧盃既滋味呢？好渴望啊！！

然後就打我份履歷，順便再諗下自我介紹點講。之後就測試下自己打字既速度，點知計時就結束個陣，阿爸無啦啦大叫「夠鐘」，嚇到我成個人彈起，可惡啊！結果係中文每分鐘打到三十三個字，而英文就每分鐘打二十五個字，好慢啊！要加速先得啊！

之後就返好景看舖。期間就去圖書館還書，點知突然落大雨。本來諗著等到細雨小小先走，就係又急便便喎，於是就用番細個果條無敵避雨通道。返到好景，又見到「淫賤朗」，佢教我整番好部MP3機，大感謝啊！過左無幾耐，個古古怪怪既阿嬸又黎同我傾偈喇，不過佢都幾追上潮流嫁喎，竟然同我討論《死亡筆記》。

放工之後，就等舅父俾番張記憶卡我，然後就去新輝食晚飯。去到就同妹子進講下《三國演義》同網上股票。食完飯就順便上埋佢屋企，教佢整Xanga。但係佢部機真係慢得好可憐，搞到都無咩心機教。但係用佢部腦睇番自己個Xanga，竟然俾我發現左一個缺陷，番到屋企要改改先。跟著就睇番歐聯重播，期間見到進係度傾電話，有講有笑，又驚俾人聽到佢地既內容，真係好搞笑。

去到無幾耐就走人，於是同嘉嘉一齊落樓。行到個公園果度，佢突然捉住我！原來有隻小強係右路殺出，之後我地就行左邊，點知又一隻小強係左路突入，嚇到我表姐係咁捉住我。於是我叫佢係中路突破啦，最後我地用速度壓過左佢地。

返到屋企就發覺Poly有Interview既信俾我，真係吹到！之後諗著開電腦玩啦，點知佢竟然同我作對！開左幾次機先入到Window，仲要係度怪叫示威！聽日一於同你解剖，睇下佢個腦有咩問題！

今日都過得幾充實，係看舖期間已經學晒點用MS Office，而且拆字又日漸純熟。好！聽日繼續！

今日係終於都完成高級程度會考既最後一科-說話能力測試！個人短講表現麻麻地，但係小組討論就幾理想，合格應該無問題既！

不過唔知點解一要考試，個人就會好想去便便。今日準備出門口既時候已經醞釀緊，唔通我患左「試前便便症」？於是就即刻去左先，免除後患。出到門口，好快就有車，唔洗一個鐘就去到學校，今次口試又係去番小西灣間衛理中學。

由於我好早就去到，所以個班房都幾空。過左十五分鐘，班考生一個一個黎到，發覺好多個都係上次見過既。今次又見番果個靚女喇，佢考中英文都係坐我斜對面既，不過個樣好串，所以唔係咁鐘意。除左個靚女，個硬膠人又係度俾我見到，佢真係好硬膠嫁！但係，最意想不到既係，竟然俾我見到超很煩！心諗：今次真係扒街喇！好彩佢個情侶邪眼唔係度，唔係今次考試實唔掂！ 跟著無耐，個阿叔就開始點名。我地個個都叫「到」，但係記得有個人大叫「到既」，搞到全場班人都微微咀笑。

今個口試我又係做第一個，不過都無咩特別既。入到準備室，第二個阿叔又開始計時喇，個題目係「登上高鋒之後」，一見到個題目，就知今次扒街喇！諗著佢會叫我評論下某件事架麻，點知佢整條咁既野俾我，搞到我無得用A.Wong論証手法！所以表現得唔係幾好。不過到小組討論我就發威喇！今次題目係「如何解決香港現今的失業問題？」於是我就用A.Wong絕招 – 「論點再加大量論証」，所以表現都幾好，又帶起成組，而且都幾主動，仲有就坐果陣又讓開俾人過，交野既時候又用雙手加微笑，所以今次口試應該就無咩問題。

出到門口個陣，心中大叫「終於都考完lu！」，仲「?」左一下，個心情實在太興奮，真係幾正！而家終於都無晒顧慮，可以做自己想做既事喇！！

今朝好早就起左身，於是就打番以前剩番既日記。不過好多事既細節都唔記得左。跟著就睇《死亡筆記》，阿月好似好煩，俾M屈緊機，不過跟據漫畫既「主角不敗」論，應該無事既。

之後做玩番西遊記，今日要決戰城城，點知打完佢就即係出隻雪櫃人，不過都係俾我搞掂！但係睇黎仲有埋玩，因為七個魔王都未見晒。

妹子隆同妹子進終於都考玩會考喇，於是同妹子隆打征服者入侵。但係都有成年無合作，而且打法又唔記得左，所以打得都唔流暢。

跟著食完午飯就去好景，正所謂「五窮六絕」，今日生意又係麻麻地，但係就有好多蟲蟲黎幫襯。係收銀機隔離有隻甲蟲仔，搞極佢都唔郁，以為佢死左啦！點知收舖個陣，佢又翻生喎！

然後，晚飯去左【甜心】，因為個度有電視睇。我地一路睇【學警】一路食飯，而我兩個表弟就係度講網上股票。去到最後，大家就估下個結局最尾會做咩，不過大家估到既結果無都係尾段出晒，但係結果之前出晒。哈！

之後，去百佳買野，然後就上表弟屋企打機。但係成個禮拜無打，技術又生疏左。不過都有三贏一和既佳績！

p.s.「等價交換」，這就是世界既真理！記住，記住！

今日去左勞工處睇下有咩工好做。去到先發覺，原來好多工都要有一至三年工作經驗同良好英語。不過都揀到幾份幾好既工，但係好多都係「空缺」好小，「已轉介」好多。睇黎都要快少少搞掂埋個履歷先得喇！

其實考完最後一科到而家，都感覺唔到係放緊暑假，開頭無工返，班朋友仔又要番工、學會考，所以大部份時間都係屋企無無聊聊咁過。但係都有工返既時間，先開始有好多野想做，不過時間又唔夠用。所以都有諗過下，等我表弟考完會考，唔洗放鋪，之後就大玩一個星期先開始搵工。但係咁先黎遲搵，又驚搵唔到喎。所以好煩啊，連日記都無咩心情去打

自從吸取左尋日既教訓後，今朝起身就不停練習倉頡，仲俾我搵到個倉頡字典既網站，而家個進展都唔錯。不過打字速度同拆字技巧仲係好慢同好差，距離我既一分鐘四十字既目標仲有頗多既時間。

之後，睇番尋日足總盃決賽場波既十二碼同慶祝片段，感覺就無尋日咁興奮。因為諗番下，只不過今年唔洗四大皆空，拎番個尾彩姐。其實隊波中段既成績都唔係咁理想，而且仲兩敗曼聯。但係講真，曼聯今賽真係打得幾好，只係前鋒自己把握力差同埋列文表現神勇！不過踢波就係咁嫁啦，贏形勢唔一定會贏波，記得當年對李斯特城，成隊波都係狂攻，又係中展中柱。蘇加係二、三碼怒射，不過竟然射中沙維治塊面，結果又係十二碼輸左。所以無得怨嫁，鬼叫你唔識入波啊！

到夜晚就睇星戰第一集。原來齣戲係1977年拍，所以而家睇番就覺得好假。不過四十年前既戲有既咁既水準，真係唔錯。睇番今集，都知道番好多前傳既事，但係Obi-Wan咁就死左，好似有少少唔知咩咁。但係算啦！下星期繼續睇星戰第二隻，好似係叫《帝國反擊戰》

今日本來要返好景，不過美雲姨突然間打黎話中原有個招聘會請分行文員，所以就唔返工，約埋蜥蜴同多多一齊去見工。開頭表現都幾好既，但係，一問要中文打字就開始扒街喇！佢話無得用九方，不過我學左幾日倉頡，咁就話我識識地倉頡啦。點知佢當場叫我拆「地產」依兩個字，結果衰左！但係講真，其實都係自己準備得唔係咁好，不過都唔緊要啦，今次都只係以一個嘗試既性質，吸引下經驗姐。初回既失敗都唔係咁緊要，下次繼續努力！

然後同佢地出去灣仔行下，買左個熊仔滑鼠墊。之後就睇下三聯有冇《ＴＩＩ》依本書，終於俾我搵到喇！仲要有八五折，於是就即刻買左佢。

返到屋企，就開始練習倉頡，一路聽【夕陽無限好】一路打字，不過打得超慢，回覆一個留言都去左我十五分鐘！然後覺得而家個5.1個重低音好差，於是就變番以前個2.1。但係但2.1 d聲又無咁好，真係扒街！不過較下個EQ，慢慢都聽番順耳。

接著就開始睇足總盃決賽，但係原來得ＮＯＷ先有直播，就連ＣＳ點無得直播。所以唯有睇newsgroup即時匯報最新既戰況。但係，睇佢既留言，阿仙奴好似踢得麻麻地。一路睇就一路驚，最後仲捱到踢十二碼。不過衰人史高斯射失，而阿記就五球入晒，結果取得足總盃冠軍~~YEAH!!!!!!!