「我希望黎緊依個六月，就可以學識日文發音同整網頁，再操體能、練波同游水。」依句說話係我五月尾所訂立既目標。嚴格黎講，我只係達成左「學日文」依個目標。而其他項目都係做左少少。
簡單而言，【好景】【日文】【落雨】【Ｒｅｂｏｏｔ】就總括左我今個六月發生既所有事。雖然日日都要看舖，但係就令到我有多左時間自學日文。不過相反，就少左好多時間係屋企學整網頁。本來諗著放工之後就去做健身，但係成日都落雨，搞到無心情去。隻左腳傷左，練波、游水都唔洗講啦。所以，依個六月可以話係失敗既！
黎緊依個七月，就會多番好多時間做自己野。不過七月八號就放榜喇，都係都知道左成績先再部處七月既大計啦！
p.s.小寶今日出第五張韓國大碟《Girls On Top》
尋日踩完單車，而家雙腳仲係好酸軟。不過今晚之後，我相信，除左雙腳之外，全身都會極度疲勞。(如果大家覺得太長，主要睇最長個兩段就得)
自建華之亂，每日六千幾唱片收入變成六百幾。苦苦經營十九年，珍寶好景終於都成為七年酷劫既受難者。而今日，我就負責看守住珍寶好景既最後一日，生意唔洗講，仍然係幾百蚊。唔好話俾舖租，就連人工都唔夠貼！所以，早走早著係一個絕對明智既選擇。
大約到左六點，珍寶好景就開始搬野過利群好景。開頭搬個批錄音帶、錄影帶都無咩大問題。但係到搬唱片既時候，可怕既惡夢終於都發生喇。
今次行動主要既任務就係張九個長條形唱片櫃安全運送到利群。而我地有既工具就係一部四輪手推車、一塊長木板、一把遮、三張海報版同四個苦力。而行動代號就係「人人搬遷」。一開始我同妹子進就搬兩個長櫃打橫平放上車，但係一落第一級樓梯就發生意外。因為最低果個唱片櫃個頂蓋壓爛左，於是一隻隻唱片就跌左落黎。不過，依個都唔係咩大問題，最麻煩就係個時開始落雨！我地張個三張海報疊上面，然後再次起程。沿途總算順利，但係到左利群既時候，雨勢越落越大。我地就決定嘆番隻雞脾先至過去。
返到去珍寶，為左加快工程，我地就改變計劃，張三個唱片櫃打直放係條長木板。但係，正所謂「萬事起頭難」，放第二個櫃既時候，因為前輕後重，搞到最尾一個櫃既唱片又跌晒出黎！幾經辛苦，我地又重整旗鼓再度出發！今次用左第二條路線，唔洗上落梯級，結果順順利利張物件安全抵達利群。
最後一次，我、妹子隆進就肩負起一連搬四個櫃既重任，而姨丈就留番係珍寶收拾殘局。「好既開始就係成功既一半」，不過壞既開始就．．．我地見之前垂直擺法咁成功，於是就照版轉換，然後再張最後一個長櫃平放係三個櫃之上，壯志雄心咁出發。但係一開始，過果個死亡之梯級就扒街喇！
格車凳一凳，個櫃郁一郁，批唱片又跌晒落黎。而且車四個櫃既移動力超慢，不時又有車經過，只可以徐徐而進。到左中段，真係「屋漏兼逢連夜雨」，因為我地加速推進既關係，經過一個大坑洰，格車又凳一凳，唱片墮下事件再次發生。我地戰戰競競，幾經辛苦終於都到左利群商場。但係行到過去，剛剛見到姨丈行過黎，真係好妹！我地運個四個櫃足足用左成半個鐘！
經過今次既事件之後，我對落雨既仇恨更深！我永遠都會唔會忘記依一個晚上，依一個痛苦既經歷！
後記：
「欲速則不達」依句說話形容我地當時既情況真係好貼切，本來想加快工程進度，結果得不償失，仲搞到手臂紅晒，腰酸背痛。經過一番事後既檢討，下次搬野都係少少地咁搬，雖然係運送次數多左，但係首先唔洗搞到咁辛苦啦！
仲有，其實可以唔洗過果個死亡之梯級，只要我地張部車先推過個梯級，之後先再搬貨上車，咁未唔洗凳跌晒批唱片囉！唉～而家先至諗到，真係「有早知無，無乞兒」！
今日陽光普照，天氣晴朗，最好就係做下戶外運動。所以就同一班朋友仔去左踩單車。因為我朝早有野做，所以唔可以同佢地一齊出發。大約到左一點半左右，我就到左恆安。本來係去錦鋒宛借單車，但係我行錯路去左海典灣。
差唔多到兩點，我就踩到孖橋，之後打俾嘉豪佢地，原來佢地就黎到大尾篤。於是我就極速爆去大尾篤，但係左過大埔海濱公園之後，有一條無敵長命斜，我幾經辛苦用埋慣性飄移，辛辛苦苦咁捱過左。不過，就換黎左五分鐘既酸痛，搞到我要用超龜速推進。其後，沿途一直問路，自己又撞下，經歷左一個幾鐘，終於都到左大尾篤燒烤場喇。
嘉豪佢地就剛剛係水壩落黎，然後我就立即去便便啦，但係個一殺那既尖痛，真係好妹啊！出到黎見到蜥蜴好搞笑啊！佢帶左頂農夫草帽，成個村姑咁ＸＤＤ。之後，吹左一陣水就開始回程，由於我之前爆左一段，所以都係留力慢慢咁踩。不過踩左無幾耐，就見到虧佬訓左係地下，原來佢玩單手踩單車，點知失左平衡抄車。個手柄仲插左落條褲，然後波波就幫佢拎番出黎，但係就整大左個窿，好鬼搞笑。
然後我地就去左一間士多食野。休息左好耐，又開始出發。途中見到好多蜥蜴既鄉友同工友ＸＤＤ。唔知係未個個之前爆得好勁，回程個陣休息左好多次。
大約到有六點半，我地就到左孖橋。自己就踩番去馬安山，佢地就大圍交車。之後我地係番大圍火車站會合，再去沙田第城市中心食野。本來諗著打番舖ＡＯＣ，但係個個都無晒力，於是我沖左個靚涼就訓覺喇。
今日雖然踩到雙腳都好軟，又出晒汗，濕淋淋，仲曬到手臂紅晒。但係感覺好正，依ｄ就係青春喇！
各位網友，多謝你地一路留意我個Ｘａｎｇａ。不過我要懲罰我部電腦，等佢感受下無人理佢既滋味，所以我決定係七月之前唔再開機！
每個人都有佢地自己既世界，當搵到真正屬於自己既世界，人生先會有意義。而我既世界就係．．．未諗到。
i hate the computer
!
依兩日部電腦作反，完全唔受控制，好煩啊！一時又開到機，一時又停係度，一時又嘈嘈嘈，一時又唔出聲！個ｍｏｎ又一間間，打機又ｌｏａｄ得慢，上網又５６ｋ！好討厭佢啊！最扒街係打爆佢，我又會悶到發臭！如果我有錢，我實會即刻變過晒新零件，踢走晒班老野！
今日終於要進行今個月既第八次剷機，睇著果個ｉｎｓｔａｌｌ畫面都睇到厭晒。次次又要裝番晒ｄ軟件。唉～而家總算搞掂，不過又唔知佢會唔會第二日玩野！
今日睇完《死亡筆記》，明白到強者是：知道規則的人，能夠掌握住一切優勢。所以如果我要達成王道，必先要了解規則！就好似煉金術一樣，先要理解，再而分析，繼而創造！
好！目標：四年內達成！
後記：而家可能要五年．．．
今日見到小寶最新韓國專輯裡面既精美插圖，覺得好正啊！韓國大碟永遠都俾到我新奇又刺激既感覺，之前《Ｍｙ Ｎａｍｅ》個野性形象已經好有新鮮感。點知今次《Ｇｉｒｌｓ Ｏｎ Ｔｏｐ》小寶依個新形象再一次突破，超級潮爆啊！個髮型又型啊！真係一見鐘情，好期待出碟個日啊！
至於大碟既曲風都好嶄新，包含左好幾種新風格。但係可能唔識聽韓文既關係，首首快歌都好似差唔多一樣，慢歌就反而唔錯。不過都係比較鐘意小寶唱快歌，因為有得睇小寶勁歌熱舞一番！就算首歌唔太好聽，只係睇小寶扭動蛇腰，都已經係一番極優質既視覺享受！
好鐘意依幅圖～
今日係03-05香港仔工業學校預科生B班既畢業晚宴，除左畢唔到業既Happy，全部同學仔都有黎，仲玩得好癲！
我一去到維園就見到孫老師同徐川。孫老師仲話帶我地入去巴西燒烤，點知佢硬膠膠兜左個大圈。去到門口，見到兩個阿差彈結他歡迎我地，班侍應個個都好有禮貌，氣氛又唔錯。入到去發現，原來班同學仔差唔多都黎晒，於是硬膠派就坐同一張，六喪派就坐另外一張。過左無耐，同學仔同老師都黎齊，肥西著得特別型，成套老西，好鬼似咁就開始食野喇。
巴西燒烤既特色就係唔洗叫野食，佢地班員工會係廚房拎一串串燒肉去每張檯，之後問邊位需要，然後就會切一片俾佢。當個人拎住串腸黎到，旦旦就手舞足蹈，食得超開心，好鬼搞笑。之後，有咩野拎黎，我地都叫佢成串切晒，搞到後面幾檯無得食。隻燒雞翼幾好食，但係其他肉類都係一般。
食左一陣，隔離張檯有個女仔生日，於是個兩個阿差就走去果檯唱生日歌仔。到唱完之後，我地成班喪友係咁歡呼，搞到成場氣氛勁High。跟著肥肥人又大叫「咀佢、咀佢」，我地班同學仔又一齊和應，於是個男仔真係咀。成班玩得好喪！之後就寫心意卡、玩下硬膠孫，然後個個都食到飽飽咁離開，到依度04-05中七既畢業宴就此結束。
ｐｓ．中國國青隊好野啊！雖敗猶榮！
繼雙生兒個ＭＶ抄小寶個ＣＭ之後，而家亞視港男個ＣＭ又抄小寶個ＭＶ
唉～算啦！亞視都係覺得小寶個ＭＶ夠正，先借黎用用姐～不過下次應該需要係左下角註明Copy from BoA