Blog

今日正式開始一連兩星期既職前輔導。由於尋晚訓得唔好，所以五點幾就起左身，於是就執下張書檯，上下網。然後八點半鐘左右就出發去YES。

去到門口，見到張通告寫住：「足球職前，去YES工作室」。咁我以為係要上番中心個度。點知去上面，個職員話頭先個度就係工作室，真係吹到。

今堂大部份都係之前急救既同學，但係有少少就係急救二班，所以我地又玩介紹自己。

嘩！一連兩日都要自我介紹，識左好多新朋友，突然間個腦加左好多個人名。而今次又係用接龍既方式介紹自己同其他人，即係我介紹完自己之後，下一個就要講番之前我，然後再介紹自己。我發覺依一班之中，好多個都係讀過ＩＶＥ，毅進，而現況就係無野做。包括埋我，只有兩個係中七畢業。

之後，主要都係玩一批小遊戲而認識對方與及自己。有幾個遊戲都幾好玩。最爆笑，就係「點解你個樣咁好笑」。大家畫到其他人個樣超搞鬼。 不過有一兩個心理測試就幾無聊。

上完職前之後，我就去深水步覆診。行過鴨寮街，見到好多阿叔阿嬸圍住一齊睇個Sales點樣介紹把切肉剪刀。佢既論證技巧好勁，又用晒專家意見，個人經歷。呃上班阿叔阿嬸點晒頭，好搞笑。

跟著，俾王煒叔叔禁左幾野之後，我腳舒服左好多，無再咁痛。我預計九月開始就可以做番下激烈既運動。到時又可以踢波喇，真係開心！

然後就去上環拎特區護照，點知係中環地鐵站俾個鬼佬問路。我地問號完一輪之後，總算話到佢聽點去交易廣場。上到去辦事處，發現好多北面既同胞，佢地既行為真係．．． 

等左好耐，終於都叫我媽個名，點知我一起身，全部人立即用奇異既眼光望住我．．．有咩問題呢？幫阿爸阿媽拎護照唔得既．．．．．．

尋晚又有個女仔打黎，真係俾佢搞到Ｏ晒咀。佢一開始打黎搵何Ｘ平，但係我又知咩個係何Ｘ平。於是佢就話搵何Ｘ年，但係我都係唔知係邊個。等左一陣，我終於都知道搵邊個喇！原來佢係搵我．．．．．．我叫何Ｘ丰啊！算啦，可能我簽名個時寫得唔清楚啦。佢唔叫我做何Ｘ蚌，已經好好喇。

佢打黎係叫我去CityU傾下O’Camp既詳情。於是今日就再去City。

到城大個恆生銀行，已經見到好多人係度。之後等整人，我地就分組上去五樓傾野。

原來今次個O’Camp有分四個House，分別係紅萬、藍筒院、綠索女同番學黃。而我就係屬於綠索女依個House。然後綠索女又分三個細Ｘ，我就係其中既紙底褲﹙其餘兩個唔記得叫咩名﹚。其實大家細心少少，就會發覺全部名都係同麻雀有關。

然後我就係互相介紹下自己。原來我個組都有兩個同我一樣讀FS，之後有幾個讀degree。跟著組爸就講下O’Camp有咩做，仲介紹咩叫”con”，令我諗起旦旦既body check！

之後就作slogan，但係個個都玩手指，好悶場。最後都係要靠組爸組媽搞掂。不過，全部口號都係插其他House，而且仲好色情，不宜係依度公開。然後就討論下枝旗點搞，不過成班都唔係好出聲，又係篤手指。

最後就係學跳舞，真係超搞笑！雖然動作同舞步有少少硬膠，但係玩得好開心。不過，有成七隻舞要跳，而且隻隻都係快歌，真係變態。最搞笑係要跳超人迪迦同鋼鍊．．．

好喇～今次gathering大至上就係咁。唔想打咁多字．．．

p.s.大學生好鐘意講野中英混雜，而且好多古怪英文簡稱，搞到打日記好唔整齊，好怪。

以下，係少少係MINI睇到既野．．．

Case 1
今日先去完cityoffer letter返黎

有人問我阿爸： 你個仔而家讀邊間U？
爸說： 城大
回： 城大？城大好似好差架wor~~ 乜唔係中大咩?
爸說： ….. 唔係，係城大，不過都唔係差…
回： 咁佢讀咩係?
爸說： BBA
回： 讀BBA第時未要返大陸做野？

Case 2
我阿爸聽到我入唔到港大入左bu之後，好似唔當我入到u咁，
少少開心都冇，成晚黑口黑面。
好似我影衰左佢…..=.=

Case 3
我入左教院咪仲慘………..
d人唔知教院已經係大學
仲問我:你入左學院呀????
-________-“

Case 4
o係d阿叔阿審心目中只有港大……

我試過俾街市賣魚佬問我讀咩，我答hku space，佢即刻直樹舞子

Case 5
我1st 入cu 好開心, 但係佢知道佢個frd 個仔入hku 就覺得唔太滿意咁..
話 ” 呀邊個個仔入hku 喎…… 你做乜唔第一揀hku 第二先cu??
(PS 佢完全無諗過人地個女咩成績) 而家hk 最好係hku, 之後先到cu 呀?? 係唔係呀??? ”

完

其實反應出依個就係社會現實，世俗眼光。HKU係最好，出面太多數雇主都係聘請HKU先，或者讀其他U就無前途。所以，唔想俾人睇死，就只有入HKU，再唔係就CU，頂盡入UST。

但係試問有幾多個人入到頭三間大學呢？

唯一既辦法就係【忍耐】，等到出頭既一日，其他人就會奉承你．．．

p.s.港大太空系~XDDD

今日睇左【電車男】第六集，真係好好好好睇。依一集簡直係牽起高潮！一切都係好順利，而且班網友超搞笑，特別係果個軍佬。而且電車男同Hermes已經發展到交往既地部。

可惜，去到最後．．．

唔知電車男同Hermes會發展定點呢？期待【電車男】第七集！

p.s.愛係需要坦誠，送上小寶既Love & Honesty~

終於都到考急救試既日子，我懷著緊張但不畏懼既心情去到試場。由於YES請考官去工作室監考，佔盡天時、地利、人和，所以今次考試應該無任何大問題。

卷一，筆試。題目同阿檸派既試題一模一樣，超級簡單，可以秒殺！合格完全唔係問題，仲可能全對！

卷二，CPR。我揀中左小寶。基本上都無大礙。只係一開始差少少唔記得叫下小寶，同埋手指插得唔夠直。

卷三，包紮。我揀左「右前臂流血」同「盤骨骨折」。本來我用由上而下用螺旋形包紮法，好彩我個拍檔提一提我，正確應該係由下而上包紮，所以都無問題。不過，拆平結果時，自己其實係打得到，但係無咩信心，猶疑左一陣先拆到，可能會扣少少分。

總結，今次急救考試應該會合格，結果就等九月二號放榜！但係，我就擔心德仔喇，佢CPR既先後次序搞錯晒，應該要重考。

後記：
今日妹子佢地去排通宵搵學校。回想番當年，我都係排通宵既其中一份子。當時我一聽到聯招中心有人開始排隊，我就立即飛奔過去。好彩有富貴幫我霸住個位。

之後，我落到去已經有好多人。當時仲擔心會俾人拎晒中六學位，所以成晚都訓唔著。到左大約零晨五時左右，我就見到其中幾位遵理同學仔都黎排隊。跟著到七點幾鐘，就開始有記者黎採訪。

無幾耐，我見到阿豐阿達佢地黎。原來佢地尋晚都同我一齊通宵，不過佢地係唱K唱通宵。佢地仲買左好多食物俾我，真係多謝晒佢地。

到九點左右，聯招中心正式運作。我係搭通晒關係既情況下，超級容易，香工就收左我。當時好鬼開心，走個時佢又唔記得拎走我張收錄單，結果鬧出一場小笑話。

今日去左工作坊做試前溫習。基本上，三個考試部份都無咩大問題，而家只係要記熟少少包紮步驟，同練下口訣。

第一部份，筆試。阿檸派左張60題MC，而考試題目會係其中30題，所以應該無咩難度。

第二部份，CPR。雖然無完完整整做過一次，但係次序都無咩問題，只係口訣同手法唔係咁純熟。返屋企要再練習多幾次。

第三部份，包紮。今日同partner做左幾次case studies，包法同先後次序都無大礙。只係剩番「手臂不能屈曲」未試過。但係，始終打平結仲係好難解到。

聽日就要考試，應該都無咩問題。

尋晚好多事發生，打約十一點，FS有個女仔打黎話聽日係最後註冊日，於是今日就去左城大註冊。本來，註冊過程只需要半個小時就可以完成，但係，足足經歷左三個半小時既轟炸之後，先可以安然離開。

大約兩點半左右，我就去到城大註冊處。去到出面，已經見到好多排隊，於是我就拎籌等註冊。點知要我等到三點半！係依個時候，突然間有個女仔問我讀咩科。

當我一答我係讀FS既時候，突然又多個女仔走埋黎，之後又再多個男仔。原來佢地係搵人入O’Camp，一個就係EFS搞既，另一個就係FS搞既。佢地不停係咁講佢地個O’Camp點點點，又話正正正！之後兩邊人係度互相數對方既不足，總之佢地就不停係我耳邊又soc又sem，用左好多特別既名詞，搞到我好多問號。

我見仲有一個鐘先註得冊，於是就聽下佢地講啦，之後佢地又帶我去佢地既soc，又講左好多城大既生活俾我聽，又話咩學會唔好參加。佢地連珠爆發左一個鐘後，就去番註冊。

註冊既過程異常地快，當我出門口之際。我又俾幾個人夾，又同我講番頭先其他人講既野。考慮左好耐，我都係決定參加EFS果個，因為始終都係一個soc搞既，班人又有經驗。而且FS搞果個又係去長洲包書膠，已經無興趣。

本來可以走人，但係見到有個學會招生。於是就走入去睇下啦。我發覺頭先叫我入O’Camp原來都係不外如事，裡面學會班人仲勁！我一入去又俾幾個人夾。原來佢地係Danso，見佢地又幾個人係度跳舞，最正係播緊小寶既LTMH，於是就聽下佢講啦。其實都有少少興趣既，不過最後都無參加。

然後，我就兜左一個圈。我去到每一個學會前面都俾人捉左我傾幾分鐘。不停係度佢地個soc幾勁幾勁，最常聽到就係：「入到黎大學，緊係要參加我地個soc啦！」我發覺大學既學會都係同中學差唔多，不過就多左幾個特別既學會，例如：詠春、劍擊、水會、跆拳等等。

最後，我幾經辛苦終於都可以走出依個迷宮。而我就報投資，攝影學會。其實對Danso同劍擊都有少少興趣，不過都係讀好書，升番做degree先再報。

p.s. soc=society

後記：
今日係會考放榜，有人開心有人唔開心。係我既朋友當中，有幾個都係18分樓上。不過，都有幾個14分樓下。

高分既、入到理想既學校既朋友仔，當然值得高興啦！因為你地既努力係得到回報。但係你地唔好自滿。意為入到預科就可以鬆懈，其實高考先係真真正正戰鬥既開始。如果你地仲抱著安逸既心態去面對，結果只會令自已後悔。

另外，低分既朋友仔，你都千祈唔好放棄。因為【失敗仍成功之母】，只要你覺得自己係有實力，下年再黎過啦！

最後，我最擔心就係中間徘徊既朋友仔，你地而家可能考慮緊讀其他低水準少少既學校，覺得可以預科重頭黎過。不過，我要話俾你地聽，唔好意為有預課讀就可以算數。因為你地依班人直接入大學既機會率係接近零。你地必須要俾拎高分既朋友付出更加多既努力、時間、精神，而家要放棄晒一切娛樂，眼中只有高考，手中只有試題，你地先會有機會入到大學。千祈唔好諗著讀完中七先算！

雖然我唔鐘意依個學歷社會，智識型社會，但係依個就係社會既現實！無大學學位就等於無前途！

尋晚同好多人傾偈，大家討論下將來既出路。有幾個同學仔就話會重讀，不過，我就都係繼續副學士喇！其實有原因既．．．

第一，我討厭左不斷做試題，不斷塞知識入腦既生活。自從經歷左依個高考之後，我真係頂唔順中學既生活。好唔鐘意迫自己做唔鐘意既事。聽到好多人講佢地重讀成功既例子之後，我就更加唔想重讀。因為，如果要我日日對著試卷，眼中只有高考，我真係會死。

而且，受既壓力會俾以前加倍，用既精神亦都會比以前倍增。自問我就唔受唔住喇！況且，我覺得自己唔會有咁強勁既恆心同毅力去溫書。因為世間上，實在太多誘惑喇！

第二，我想轉一轉環境，感覺一下準大學既生活。中學刻板既生活，加上無聊既上堂氣氛，對我黎講實在唔好受。相反，大學既自由度比較高，比較自立，注重培養獨立思考能力。而且用學分制，就算其中一個細科學得唔好，其他科都可以拉番到，唔使一試定生死。加上，又可以識多班朋友，擴闊自己既視野。

況且，工程系又唔係自己鐘意既科目，既然自己又覺得金融幾好。不妨就行下依一條路囉。不過，成唔成功都好講個人問題既，每個人都有佢地既特質。但係我相信，如果有心去做每一件事，總有一日會成功既！

今日同大家匯報下JUPAS戰況啦！今朝十點俾一個電話嘈醒左，但係我仲沉醉於係個夢境之中。成個係迷迷糊糊，連今日係星期幾都唔記得。之後，阿媽就叫我睇放榜結果，我先有少少如夢初醒既感覺。

跟著就睇下個電腦，發現成班同學仔已經開始MSN討論。於是我就去JUPAS個網睇下。搵左幾次，都係無我個號碼。即係無HD讀。咁就照番原定計劃，讀City AD。

報告完畢

另外，聽日就會考放榜。各位考生準備好未呢？有冇預計過自己既成績呢？如果考得低分就點，高分又點呢？如果英文或中文唔合格又點呢？如果唔夠分升原校又點呢？

心裡面係未有好多疑惑呢？問下你身邊既長輩朋友啦！或者自己上網睇下資料。相信你地既疑團會好快打開。

仲有，你地影印左身份証、成績表、獎狀、證書等等既文件未呢？未就快手去做喇！唔係聽日就手忘腳亂嫁喇。

如果你係咩都搞掂晒既話，就恭喜你喇！因為你而家可以去打舖機，出下街，或者做自己鐘意做既事。總之就輕輕鬆鬆度過今日啦！

後記：
唉～見到其他人會考咁高分，又讀到心怡既大學，真係有少少感觸。好唔甘心點解自己以前係咁。見到其他人成功，再睇番自己既失敗，真係非常後悔以前所用既每一件事。

雖然，我唔鐘意依個學歷社會，不過我都要接受依個現實。有學歷、有錢就會俾人重視。如果無，就只會俾人睇死！我好明白咩叫一沉百踩！如果唔想被人踩，就要踩人地。以前會覺得咁樣做好無良心，但係大左之後發覺。如果你唔咁做，只會一直被人踩落去。到人地成功既時候唔會多謝你，到頭來蝕底果個始終係自己！

人不為己，天誅地滅

依排大家係未見唔到我上網呢。其實我去左打「波斯王子」同睇「贏」。由於就快會有好多事發生，之後既八月就會有好多野做，而唔得閒做自己野。所以就診依一兩日打飽機、睇既贏。然後就開始我既大計！

聯招、會考放榜、入學登記、學日文文法、睇好多贏、考急救、溫贏、職輔、健身．．．

講番波斯王子，依隻Ｇａｍｅ真係超好玩，又夠難度，畫面又靚。個王子超強勁，又靈活又敏捷，好似識個輕功一樣，飛簷走壁，而且仲識得時光倒流。不過，班怪物仲屈機，殺死一隻又出第二隻，又識得空間轉換，攻擊力又強。

但係最難玩都係有時間限制，要係一定既時間走過好多機關。而家去到一個山洞，全部野都好易爛，行兩行就跌落街，有時仲有一大班蝙蝠黎咬人。

不過，隻Ｇａｍｅ最好既地方就係ｓａｖｅ點多，同埋死左都唔會返到好遠，所以可以不斷嘗試。加上可以多角度觀察環境，而且有時都幾考智慧、同技巧，所以真係好好玩！