Blog

失眠，一個好陌生既詞語竟然係我日記中出現。

導致失眠有三大因素。第一，心理因素；第二，睡眠環境；第三，睡前習慣。究竟我係因為邊種因素而失眠呢？我自己都唔知，我只係知道而家成身都痕到爆炸，頭又痕，手又痕，腳又痕，總之就好痕！

呀～～～～～～～聽朝仲要教波嫁，我要訓覺啊！

酒，有人話係穿腸毒藥，也有人話係萬藥之長，不過自古以來，人類對佢的喜好都係有增無減。無論大餐小餐，喜慶場合，都會見到一班男士手握酒杯，之後大叫一聲「飲勝」或「乾杯」，然後大啖大啖張手上既美酒飲盡為止！

但係我唔明白，點解佢地會覺得手上所謂既「美」酒會咁好飲！？係我口中，酒只係一樣苦到想嘔既飲品，根本就唔覺得有咩咁好飲。而且酒入愁腸愁更愁，酒會令人肝腸穿斷，令人神志不清，更會酒後糊塗，做出好多錯事。

切記：少飲為妙！

p.s.花打，生日快樂！祝你身體健康！

經常抑壓自己唔做唔應該做既事，而強迫自己做應該做既事。可惜，我係一個受軟唔受硬既人．．．結果，應該做就無做，唔應該做就咩都做到充。唉，大無奈啊！

唔可以咁啊！醒啊！！！做咩黎左Poly之後竟然迷失左當初既目標啊！出手啦！出手啦！係時候出手喇！想唔俾人睇死，只有王道！！

我好討厭星期四既上晝，因為一朝鬼咁早就要起身上英文堂。之後又要上悶到爆既Circuit.tutorial。但係又鐘意星期四既下晝，因為咁多日之中，星期四係難得可以白天番屋企，俾我訓個晏覺既好日子。

每次星期四，我都特別早起身，特別早出門口。可惜，每一次都係遇到塞車，每一次都係遲到。記得有一朝既星期四，我眼見要搭個部巴士即將開出，於是極速衝前示意上車，但係可惡既司機竟然無視我既存在，一踩油門就開車走人！無奈既我只有慢慢咁行番上車站，而且仲要受到車站既人嘲笑既目光。

但係星期四既下晝就令我留下一個美好既回憶。

未上IC.Training之前，我星期四下晝就可以唔洗上堂，可以自由自在做自己鐘意做既野。鐘意既可以返屋企訓個靚覺，喜歡既又可以同同學仔吹下水，食下飯。雖然上左ICT之後要遲少少先放學，但係仍然有好多空閒既時間俾我自由活動。而且，由於星期五朝早唔洗上堂，所以星期四晚更加可以玩到夜一夜都唔洗擔心。

呀～真係好懷念九月初生活悠閒既日子～

p.s.美女，生日快樂！

有三套戲好想睇，分別係《NANA》、《怪物》、《一球成名》。

有三樣野好想做，分別係買戰衣、去朝聖、踢好波。

唉～不過世事又點會咁順人意呢？想，真係只有想囉．．．

今日終於都番屋企食飯，諗番十月返屋企食飯既日子真係廖廖可數，睇黎今個月都要多返下屋企感覺下家庭既溫暖。

而且好多我識得既人今個月生日，係度祝晒十一月之星，生日快樂！

其實生日對我黎講並非一件非常值得慶祝既事情，因為每大一歲就代表你接近死亡又行前左一步，而且每次見到自己既歲數，再望望一無事處既自己就會．．．

生日對一般人黎講的確係一個高興既日子，壽星仔女可以係當日話晒事，可以收到好多件禮品，可以同一大班人狂歡！可惜，唔係每一個人都咁幸福。而我就好驚生日既來臨，我好驚無人記得我生日，好驚個日孤伶伶咁度過。

p.s.阿媽：生日唔等於結婚周年、姨媽姑姐擺滿月酒嫁！

Wow~~~~Amazing~~!!!

今日係十月既最後一日，亦都係萬聖節。我同一班同學仔食完Pizza之後就去尖沙咀海旁感受下節日氣氛。由於我既萬聖節早早已經係十月一日度過左，所以今晚覺得好似欠缺左少少野。

雖然維港兩岸既景色非常迷人，不過人群中既我就覺得有點．．．依一種感覺並唔陌生，因為係依個十月，依種感覺一直陪伴著我。

可能係因為midterm-test既關係，大家已經漸漸遺忘九月毫無壓力既歡樂時光。今個月，大家都為升上degree而努力，日日夜夜去圖書館溫習測驗。可惜，每次測驗過後，各人都垂頭喪氣，分別為自己不理想既成績而感到頹喪。

黎緊既十一月，本應係一個為我而誕生既月份，應該要開開心心既度過。但係我諗大家又要係圖書館埋頭苦幹，好好準備十二月既考試。

尋晚既打呲大戰真係好刺激！下半場之後，各位師兄都好似返左黎一樣！走位入攝好流暢，成隊波好有心想贏！真係好開心！雖然今屆拎冠軍既希望實在渺茫，但係只要阿仙奴每場都打出應有水準我已經心滿意足！

睇完場波，對阿仙奴既感情又更加濃烈。好想立即飛去朝聖啊！

睇黎又要拎幾百銀出黎買番件金爺戰衣！

以前人地話【讀萬卷書不如行萬里路】。無錯！人的確唔可以成日困係屋企，應該要出去外面，見識一下外面既世界，親身去體會，去了解書本上面既知識。

不過，時移世易，互聯網既迅速發展，有好多野都唔洗親身去到當地先可以見識。我地只要係搜尋器輸入某某想認知既事物，佢就會立即搵到好多有關個方面既資訊俾我地。

今日，我只係去左一個網站已經見識好多來自世界各地不同奇人異事既影片。心裡面諗：有冇咁勁啊！會唔會係電腦效果，還是係呃人既技倆？但係，世事無奇不有，無野係無可能發生既，未見過更加唔代表無。自己未見過既事情就去否認佢，只係見識唔夠廣闊既人慣常既態度。

跟著係妹子屋企打機，不過一合作就表現好差，個人反而就狂入波喎，真好妹啊！好耐無試過任天堂手指痛症喇！哈哈！

但係妹子隆啊！你做咩咁hea啊！Double.A係得來不易！你Pure拎唔到A點對得住KKL啊！仲上網玩MSN！？快ｄ去溫書做功課啦！

p.s.今日係小丑神崇拜日

自從返左Poly之後，覺得自己對小寶好似冷淡左。可能唔係咁太喜歡而家小寶太過刻意性感啦！始終覺得細細個既小寶係最可愛，最得人鐘意。不過，小寶都要長大既，唔可以成日停留係青春少女既形象。不過，我覺得「性感」未係一個好貼切形容佢既語詞，仲要等多一排。

今日睇左小寶最新ＰＶ，個做型就一般啦，不過個髮型就幾好，覺得小寶成熟左又靚女左，而且仲．．．～呵呵呵！

可惜首歌無俾我一聽鐘情既感覺！但係曲風都幾特別，仍然顯露出小寶既唱功同舞功！