Category: Xanga

大學旅程之準備、舊同學的探訪、A.Wong的強烈推介、吃酸梅會變身的超人、沉默的晚餐、難記的倉頡碼

前兩日做完GYM，今朝雙手發痛，好辛苦啊！上晝又係上下網咁，之後下晝就番好景，今日有個客黎投訴，話部MP3機播一陣歌就停左，就話我地賣水貨比佢。原來只係佢自己較左瀏覽播放，所以首歌播夠10秒就停！跟住就睇IO博士，小雲玩大便，好好笑啊！然後hea下hea下就放工。

食完晚飯之後就返屋企上網玩MSN，今日同肥佬傾偈，話比佢聽原來我地係小學同學，之後就傾下搵工既野。然後又上下網，咁就一日。

依一日既生活真係苦悶！

Sunday, May 15, 2005

尋晚又係表哥屋企打實況，我隊西維爾今次終於都升到班喇！而且正選陣容既十一個人都齊晒，前鋒法蘭度‧托里斯夥拍阿祖安奴，後防托里加辛仔，龍門希迪布蘭，咁強勁既陣容實可以係甲組搞一番作為。點知打完友誼賽，到季尾出人工既時候，佢竟然話我Game.Over，因為之前買人搞到-2000wen，但係我表哥話負錢唔緊要嫁……終是就load save，諗著抄番幾隊黎賺錢啦，之後就出去option改做一粒星同打三十分鐘，但係……唔識日文之下，竟然張個save剷走左，可憐的西維爾就係咁，從此係PS2既世界消息喇

之後就同妹子隆對戰，阿仙奴大戰皇馬。金爺表現神勇，個人包辦所有入球，結果以5:1大炒皇馬！跟著肥鍵就打約我去睇《天國驕雄》，於是就立即返屋企換衫，但係行返屋企條斜路勁熱，搞到成身汗，咁就順便沖埋涼啦。不過，結果我都係出唔切銅鑼灣，所以我就無去到睇戲，但係都約左佢地睇完戲之後行街。

出到去銅鑼灣，周街周地都係賓賓，佢地佔據晒所有天橋底、公園、麥當奴、KFC，銅鑼灣可以話係淪陷！佢地個個X#8*&6，都唔知講咩，但係聽佢地把聲就實在非常令人討厭！於是我地決定移施去上網吧打機，點知一入門口，發現全間網吧都俾賓賓攻佔，佢地成班係度玩Web.Cam，又X#8*&6，真係好可怕啊！我個位仲要俾兩個賓賓夾住，我唯有開打個喇叭，希望可以覆蓋佢地既聲音。不過發現係唔得既，佢地既X#8*&6實在太勁！

本來諗著玩1942，但係電腦又成日話「版本不正確，要否更新版本」，於是就轉玩CS。但係肥鍵好鬼麻煩，打機就打機啦，竟然走去ICQ，黎網吧玩依d野，真係硬膠，佢地班賓賓完全無分別啊！仲要玩一陣又走出去傾陣計，搞到玩得都唔過癮！結果同阿進玩AOC，但係太耐無玩喇，升城超慢，仲要俾電腦快攻。不過我隱守突擊，最後俾我一隊遊俠加五部巨投取勝！

然後係舊同學仔聚會既時候喇，我們約左八點去金百利等。但係佢地個個都遲到既，第一個黎係葉志翔，之後就係何俊斌，原來佢而家改左名，不過我都都係叫慣佢個舊名。本來今次係約左五個人，但係黃棗文同陳健恆佢地暫時唔得閒，要遲少少先黎得，於是我地三個就去左世貿打機。葉志翔打鎗Game好勁，玩左一陣，連黃棗文都黎埋，跟著我地玩左一陣賽車就去食飯喇。

我地去左金百利上面間越南鋪食飯，食飯既其間我地不停講番以前小學既時，但係有好多同學仔名，我都無咩印象。黃棗文仲帶番以前張畢業相黎，點知俾我發現肥佬原來係我舊同學，大家讀左兩年預科都唔知，真係搞笑。食完飯，陳健恆都黎埋，於是我地就去維園傾偈。本來諗著係個噴水池坐下，不過俾班賓賓佔領左，所以就行到入面個公園仔。期間都係不繼傾偈以前既搞笑事，最記得係「鼻屎南」同學，仲有就係「絕交」儀式。我地傾到十一點左右，就開始落雨，於是我地襯未落大雨就散會喇。

一去到巴士站就見到部96開走左，唯有等下一格啦。突然又落大雨，而部車到左，但係佢又唔駛近橋邊，搞到我要冒著雨衝過去，可惡！之後番到屋企就訓覺 lu~

後記：原來，這就是騙局的開始…

今日係好景看鋪，生意好淡，所以無無聊聊上左去樓上個倉庫探險。俾我發現左有一大堆IQ博士漫畫書，於是就是但拎人未黎睇，睇落又幾搞笑下。

突然間有個不知名既電話打黎，一開始個神祕人打黎叫我估下佢係邊個。我以前以為係班朋友打黎玩電話，第一個感覺就覺得佢係阿豐，但係佢竟然話係我既舊小學同學，佢仲話同小學既時候成日同我一齊玩。不過我既小學回憶係趨向零，於是佢就開估喇。原來佢係葉志翔，一講番起個名我就有少少印象喇！

其實之前係巴士上面都撞到佢，但係又唔係好肯定，無啦啦走去問佢係未係邊個邊個，一陣佢話唔係未好咩囉，所以個陣只係有0.5秒眼神接觸。今次佢竟然主動打黎搵我，實在太突然喇！原來佢想約番一班舊同學一齊係星期日出黎食餐晚飯，我見咁耐未無見個班舊同學仔，於是就一口答應左。

個感覺都幾搞笑，唔知而家班同學仔點樣呢？有幾多個讀到大學呢？有幾多個打緊工呢？有幾多個繼續讀緊書呢？

六點半起左身，成身黐淋淋，所以沖左個靚涼。跟著就睇「小飛俠」，等到三姨返工後，就繼續打機，又買左幾個新血。點知又俾人大抄，仲有場和波，搞到升唔到班。

之後唯有爭聯賽盃，場波超緊湊，一開波無幾耐就俾人入左粒，然後猛烈逛攻，終於都係完場前迫和。到加時階段，巴迪斯達壓入禁區，點知俾個後衛一剷，球証直指十二碼。因為依球好關鍵，所以諗著射中間地波，就算撲到都可以保射。點知咁唔好彩，真係被龍門救到，連保射都唔入，簡直超級無奈！

大難不死必有後福，客隊立即入左一球，好彩係銀球制，仲可以追翻。之後又逛攻，終於都入翻一球！但係最後都要互射十二碼，諗著有必殺技加希迪布蘭把關，應該無咩問題既，點知班射手球球都同我飛晒機 =口=，真係O晒咀！最後捉到路都俾佢射入，搞到輸埋。好彩有得load.save玩多次，今次大抄佢六蛋捧盃。可惜升唔到班，唯有重整旗鼓，下屆繼續努力啦！

打完機，就返好景，今日生意都幾淡，於是聽收音機，講既話題都幾搞笑，又週不時播下正唱，所以依日都唔係幾悶。記得FAMA既”bown”技筆大師真係好鬼正。

然後就去踢波，景熙話有五個人踢，但係去到得左仔同肥滔，不過都無所謂啦，我去志在練下波姐。都有成個月無踢過波，但係上次係書城睇左幾本足球理論書，所以踢得都唔錯，發覺裡面既知識真係用得著，不過自己就唔係幾夠氣。有一球出波，隻重心踩到塊樹葉，搞到拉一拉，而家都痛痛地。大約踢左一鐘左右就返屋企lu…

ps.阿仙奴好勁啊！大抄拖肥糖七蛋！柏金緊加表演超卓，三記助攻加一個入球。雲加你仲考慮咩啊？快手續金爺約啦！

今日繼續返好景看鋪，大約到六點半，我表哥就黎搵我。一路傾計，講下波經，然後好有興致想整番隊西維爾，不停傾下有咩好球員。講講下好快又放工喇。

之後去完新輝食飯，就去表哥屋企打機，進行實況足球之西維爾計畫。一開波買左法比仔同辛仔，跟著頭果幾隊都打得唔錯，巴迪斯達超勁，神射手加助攻王。不過打到零晨就有少少眼訓，和左幾場，仲俾禾夫斯堡打抄。玩到四點幾就係埋佢屋企訓。

Tuesday, May 10. 2005 7:30am
  
等車果陣又落大雨，過一陣又停番，個天都唔知搞咩鬼既。等左都多耐，部94黎到喇，但係個冷氣超凍，半訓半醒既情況下終於番到屋企。一入門口就立即撻上床訓。真係好眼訓，一訓就二點喇。

落床見到書檯有幾封信，原來係UST, Poly, City都叫我去聽講座。我仲意為無間大學會搵我添。跟著就打左陣西遊記，睇下香港直播。不過玩左一陣又覺得眼訓，又再去訓過。訓到六點半，起身就睇下珠珠，之後就食晚飯。然後就打西遊記，今次打爆左蛇魔王，但係佢又係殺死左之後走人。跟著無玩喇，就上網。

見肥鍵上網，就叫佢玩AOC，佢今次又整左個硬膠場。根本佢次次整出黎既劇情都係有利佢既，以後都係唔好同佢硬膠喇，玩番正常武力征服仲好。過無幾耐又覺得眼訓，終是再訓過。依兩日玩得太興奮喇！聽日要做番大計內既事先。

ps.今日係荷蘭超級巨星阿仙奴靈魂人物柏金大爺既三十六歲生日。祝你生日快樂，繼續踢好波俾大家踢。唔好咁快退休住啊，要等我飛過黎睇你踢一場波先啊！
    
Monday, May 09, 2005 11:00am

由於一班同學仔都考晒所有高考科目，所以我地約左去英武間私人會所打機。

我、王錦熙、旦旦鏗、梁志勤、阿達一行五人出發去英武會所，但係勤竟然唔知醒，於是出發時間延遲。大約去到十二點半，我地去到新會所喇。波波、嘉豪、虧佬都已經到左，仲打緊高達。咁我地就不停食英武係日本買番黎既手信。會所度仲有張按摩椅，咁我就試下啦。嘩！個按摩轆一碌埋黎痛到扒街，都唔好坐既！不過後黎坐坐下又幾過癮、幾痛快。

然後其他人就打牌，我就打實況，又係用阿仙奴啦。照舊係慢熱，但係打打下就上晒身，加上熙教左幾招新招，而家打Winning超強啊！一直玩到九點半左右，就叫Pizza，食得都幾飽。其後嘉豪佢地就打無雙同高達，我就打PSP賽車，不加好易玩，仲有氮氣加速，好勁啊！

玩到十一點半就準備走人，點知落晒大雨，而得我有帶遮，咁我地就決定上番會所打通宵。番到上去，繼續打機，一直打到第二日六點。其間我打左高達同實況，打到發晒任天堂手指痛症就唔玩喇。跟著就去訓番一陣，但係梳化熙同達都訓緊，所以就係按摩椅訓左一陣。而波波同嘉豪就走人。

過左無耐，佢地又上番黎。原來又係落屎狗！再等多陣落雨，我地就索性番屋企訓。