今日收到名師寄黎既信，七月八號Ａ．Ｗｏｎｇ陪你共渡難關。差唔多三個幾月無見佢，終於又可以見番喇！而家距離高考放榜仲有三日，都有少少「郩底」既，最驚就係英文唔合格，對唔住名師，對唔住好多人對我既期望！
另外，有一件好消息，就係我個教練訓練得左喇！希望係依個別訓練識班朋友仔，學到好多野啦！
Category: Xanga
Xanga is a weblog of my daily life.
-
Monday July 4, 2005
今日去左香港遊樂場協會面試果個足球教練訓練計劃。雖然覺得自己係最突出既一個，但係發覺自己回答好多問題都係答唔到個重心，所以表現都係一般。但係之前面過好幾次試，發覺而家對住班陌生人講野都順暢左，無咁「肴底」。唔知佢地會唔會俾我註冊呢？
另外，今日壇主大人竟然叫我作篇短文俾佢交功課。本來佢要作日文既，但係佢連中文都諗唔到。由於個題目係我地大家鐘都意既足球，所以就叫我作篇俾佢轉日文。算啦！見壇主大人平時都幫我唔少，就有感而發啦！
啊～～～超羨慕啊！好羨慕祖兒可以一次過見晒三大韓國人氣偶像啊！仲可以同小寶合照啊！大羨慕啊！
-
Monday July 4, 2005
依幾日又過番以前既生活，日夜顛倒。唔知係未訓得多，又成日對著部電腦，而家背痛加劇嚴重！個人混混愕愕，咩都無精神去做。
之前一兩日，搞小寶堆檔案，搞左幾個鐘都未搞掂。真係估唔到我高考期間，竟然下載左成20GB既檔案，而家有埋執啊！部電腦又虧喎，成日hang機，夠到做咩都無癮。
啊～星期二要砌部3GB+512DD2啊！！
ｐ．ｓ．尋日ｄ／ｌ左好多小寶即拍照，係度分享幾幅啦！好可愛啊！
-
Sunday July 3, 2005
嘩！好正啊！今日睇完勁歌，阿Ｒａｉｎ跳舞好勁啊！好羨佢班歌迷可以咁近見到佢地既偶像。一路睇，一路幻想，如果Ｒａｉｎ變左做ＢｏＡ，咁就正喇！
其實Ｒａｉｎ都係拍左一套戲，之後就係香港播一播，咁就係香港人氣爆升！覺得好似好容易咁。唔知幾時小寶又會係咁呢？上次雖然係深圳見到小寶真人，不過隔得超遠，而且仲錯過左睇佢既勁歌熱舞！超級後悔！我發誓，唔可以再做令自己後悔既事！所以下次小寶有幸黎香港，我一定會去機場等佢，一定要等到佢勁歌熱舞！
-
Saturday July 2, 2005
唔點知解，你想等既車永遠都要等好耐，但係你唔等依既車又成日出現；鐘意既課堂總係過得特別快，但係討厭既課堂過得又好鬼耐。平時要返學既時候就好想放長假，但係放暑假既時候又想返番學。
今日我唔洗再看舖，以為可以係屋企就好多野。可惜，只係係度打機、上網同睇電影。而今日做得最有意義既事，就係張小寶個堆影片做分類。其實仲好多野想做嫁，不過成日都遇到阻擠，搞到無咩恆心去做。可能都只係替自己搵緊藉口，但係真係無咩心情去做。
真係好羨慕小寶可以成日都咁勤力，仲可以係好短時間做好多野。
-
Thursday June 30, 2005
「我希望黎緊依個六月，就可以學識日文發音同整網頁，再操體能、練波同游水。」依句說話係我五月尾所訂立既目標。嚴格黎講，我只係達成左「學日文」依個目標。而其他項目都係做左少少。
簡單而言，【好景】【日文】【落雨】【Ｒｅｂｏｏｔ】就總括左我今個六月發生既所有事。雖然日日都要看舖，但係就令到我有多左時間自學日文。不過相反，就少左好多時間係屋企學整網頁。本來諗著放工之後就去做健身，但係成日都落雨，搞到無心情去。隻左腳傷左，練波、游水都唔洗講啦。所以，依個六月可以話係失敗既！
黎緊依個七月，就會多番好多時間做自己野。不過七月八號就放榜喇，都係都知道左成績先再部處七月既大計啦！
p.s.小寶今日出第五張韓國大碟《Girls On Top》
-
好景搬遷
尋日踩完單車，而家雙腳仲係好酸軟。不過今晚之後，我相信，除左雙腳之外，全身都會極度疲勞。(如果大家覺得太長，主要睇最長個兩段就得)
自建華之亂，每日六千幾唱片收入變成六百幾。苦苦經營十九年，珍寶好景終於都成為七年酷劫既受難者。而今日，我就負責看守住珍寶好景既最後一日，生意唔洗講，仍然係幾百蚊。唔好話俾舖租，就連人工都唔夠貼！所以，早走早著係一個絕對明智既選擇。
大約到左六點，珍寶好景就開始搬野過利群好景。開頭搬個批錄音帶、錄影帶都無咩大問題。但係到搬唱片既時候，可怕既惡夢終於都發生喇。
今次行動主要既任務就係張九個長條形唱片櫃安全運送到利群。而我地有既工具就係一部四輪手推車、一塊長木板、一把遮、三張海報版同四個苦力。而行動代號就係「人人搬遷」。一開始我同妹子進就搬兩個長櫃打橫平放上車，但係一落第一級樓梯就發生意外。因為最低果個唱片櫃個頂蓋壓爛左，於是一隻隻唱片就跌左落黎。不過，依個都唔係咩大問題，最麻煩就係個時開始落雨！我地張個三張海報疊上面，然後再次起程。沿途總算順利，但係到左利群既時候，雨勢越落越大。我地就決定嘆番隻雞脾先至過去。
返到去珍寶，為左加快工程，我地就改變計劃，張三個唱片櫃打直放係條長木板。但係，正所謂「萬事起頭難」，放第二個櫃既時候，因為前輕後重，搞到最尾一個櫃既唱片又跌晒出黎！幾經辛苦，我地又重整旗鼓再度出發！今次用左第二條路線，唔洗上落梯級，結果順順利利張物件安全抵達利群。
最後一次，我、妹子隆進就肩負起一連搬四個櫃既重任，而姨丈就留番係珍寶收拾殘局。「好既開始就係成功既一半」，不過壞既開始就．．．我地見之前垂直擺法咁成功，於是就照版轉換，然後再張最後一個長櫃平放係三個櫃之上，壯志雄心咁出發。但係一開始，過果個死亡之梯級就扒街喇！
格車凳一凳，個櫃郁一郁，批唱片又跌晒落黎。而且車四個櫃既移動力超慢，不時又有車經過，只可以徐徐而進。到左中段，真係「屋漏兼逢連夜雨」，因為我地加速推進既關係，經過一個大坑洰，格車又凳一凳，唱片墮下事件再次發生。我地戰戰競競，幾經辛苦終於都到左利群商場。但係行到過去，剛剛見到姨丈行過黎，真係好妹！我地運個四個櫃足足用左成半個鐘！
經過今次既事件之後，我對落雨既仇恨更深！我永遠都會唔會忘記依一個晚上，依一個痛苦既經歷！
後記：
「欲速則不達」依句說話形容我地當時既情況真係好貼切，本來想加快工程進度，結果得不償失，仲搞到手臂紅晒，腰酸背痛。經過一番事後既檢討，下次搬野都係少少地咁搬，雖然係運送次數多左，但係首先唔洗搞到咁辛苦啦！仲有，其實可以唔洗過果個死亡之梯級，只要我地張部車先推過個梯級，之後先再搬貨上車，咁未唔洗凳跌晒批唱片囉！唉～而家先至諗到，真係「有早知無，無乞兒」！
-
Tuesday June 28, 2005
今日陽光普照，天氣晴朗，最好就係做下戶外運動。所以就同一班朋友仔去左踩單車。因為我朝早有野做，所以唔可以同佢地一齊出發。大約到左一點半左右，我就到左恆安。本來係去錦鋒宛借單車，但係我行錯路去左海典灣。
差唔多到兩點，我就踩到孖橋，之後打俾嘉豪佢地，原來佢地就黎到大尾篤。於是我就極速爆去大尾篤，但係左過大埔海濱公園之後，有一條無敵長命斜，我幾經辛苦用埋慣性飄移，辛辛苦苦咁捱過左。不過，就換黎左五分鐘既酸痛，搞到我要用超龜速推進。其後，沿途一直問路，自己又撞下，經歷左一個幾鐘，終於都到左大尾篤燒烤場喇。
嘉豪佢地就剛剛係水壩落黎，然後我就立即去便便啦，但係個一殺那既尖痛，真係好妹啊！出到黎見到蜥蜴好搞笑啊！佢帶左頂農夫草帽，成個村姑咁ＸＤＤ。之後，吹左一陣水就開始回程，由於我之前爆左一段，所以都係留力慢慢咁踩。不過踩左無幾耐，就見到虧佬訓左係地下，原來佢玩單手踩單車，點知失左平衡抄車。個手柄仲插左落條褲，然後波波就幫佢拎番出黎，但係就整大左個窿，好鬼搞笑。
然後我地就去左一間士多食野。休息左好耐，又開始出發。途中見到好多蜥蜴既鄉友同工友ＸＤＤ。唔知係未個個之前爆得好勁，回程個陣休息左好多次。
大約到有六點半，我地就到左孖橋。自己就踩番去馬安山，佢地就大圍交車。之後我地係番大圍火車站會合，再去沙田第城市中心食野。本來諗著打番舖ＡＯＣ，但係個個都無晒力，於是我沖左個靚涼就訓覺喇。
今日雖然踩到雙腳都好軟，又出晒汗，濕淋淋，仲曬到手臂紅晒。但係感覺好正，依ｄ就係青春喇！
-
Monday June 27, 2005
各位網友，多謝你地一路留意我個Ｘａｎｇａ。不過我要懲罰我部電腦，等佢感受下無人理佢既滋味，所以我決定係七月之前唔再開機！
