尋晚不停睇左好多個小寶Live.Show，覺得小寶唱功真係好勁，而家跳舞超強！《GirlsOnTop》依首歌愈黎愈鐘意。雖然第一次聽就覺得麻麻地。但係加埋個套舞步，立即變得好有爆炸力！好鐘意啊！
今日，我就同一班親友去左長洲踩單車。我地去到碼頭先發現仲有一個鐘頭先有慢船。於是就玩二十四消磨時間。
二十四好好玩，所以好快就到開船既時間，而嘉嘉佢地又剛剛到。於是就一齊上船。上到船之後，因為維港兩岸既景氣太迷人喇，所以我不停咁影相，差唔多有成廿幅。跟著，玩左一陣鋤ｄｅｅ同吹下水。大約到二點半就去到長洲。
我地例牌先去英皇飲凍橙檸，然後再租單車。今次我揀左部新車黎踩，連紙皮都無拆，成格裝甲車咁，好鬼型！踩緊既時候，塊紙皮會仲摩擦到個車轆而發出一連串既摩打聲，個感覺就好似踩緊電單車咁，好爽！
之後，我地踩番去以前屠房個條大斜路。不過可能人大過左，覺得條斜路無以前細個踩既時間咁斜。跟著，我地再踩去長貴村個邊果個海旁。好記得係海旁之前果一個死亡急彎。
當年我就係依個彎度炒車，仲搞到而家隻腳有成大塊傷痕。
長貴村依邊個沙灘雖然好細，但係海水因陽光照耀而閃閃生輝既畫面就好靚。就好似一粒一粒珍珠浮起水面一樣，好迷人。
不過依一邊條路實在太短，好快就踩完。於是我地就踩去張保仔洞個一邊。沿途仲見到有蛙艇大賽。
果度好熱鬧啊，好鬼多人。有個阿叔仲好好人咁派水俾我地飲。
踩完張保仔洞之後，我地就踩去東堤海灘。個度好多人啊！
而且太陽又差唔多落山，所以個影都幾靚。
去到盡頭之後，我地就休息一下。回程個時，見到條四十五度大斜路。
於是我地就比賽，睇下邊個踩到上去。結果當然係擁有柏金無敵雙腿既我第一個踩到上去啦！
我地係依條斜路都玩左好耐。差唔多到六點半就踩去交車。
然後，我地就去大排檔食海鮮。一邊食，一邊睇《星期日檔案》。今集講ＬＯＬＩＴＡ。雖然我覺得佢地著得怪怪地，不過既然佢地著左之後咁開心，都無話咩歧視佢地既。反而幾欣賞佢地，因為佢地幾有自己既風格。自己鐘意點就點，唔洗理人地點睇。
食完晚飯之後，我地就係Ｍ記幫嘉嘉開一個神祕生日會。最搞笑就係，周圍有班唔識既人都同我地一齊唱生日歌，好有氣氛。
然後吹左一陣水，行左一陣海灘之後，我地就開始上船。
本來以為大家玩左成日，依一程船應該會平平淡淡過度。不過一隻小強既出現，就為依一個回程帶黎左一番生氣。
當時，我姨丈同妹子進都已經訓著左。
點知突然有一隻小強係船頂出現。不過最驚既唔係佢地兩個，反而係嘉嘉。以前都提及過，佢係一個極度害怕小強既人。當佢一發現隻小強之後，就立即大叫！
但係隻小強無理佢，繼續前進，一直行到一個窿仔裡面。由於個窿係另一班乘客上面，於是就有個男人係度引隻小強出黎，費時隻小強突然跳落頭。但係佢搞左一大輪野，又風扇，又電筒。隻小強都肯唔出黎。
點知唔理佢既時間，隻小強就突然飛左出黎，仲飛去個男人隻腳附近。嚇到成艙人都縮起隻腳。個男人連忙踩死隻小強。不過，小強既迴避率超高，左閃右閃。眨下眼就唔知去左邊。
但係依個大家都尋求緊小強既時間，我阿爸無啦啦走張紙巾去嘉嘉度，嚇到佢成個彈起，好鬼搞野。真係估唔到依隻小強，竟然可以帶俾我地咁無歡樂。
如果大家想睇更多既相，可以去依度↓
http://www.wretch.cc/album/album.php?id=Bergkampho&book=9
p.s.因為太多字，又無咩時間，所以用左九方
