Xanga is a weblog of my daily life.
今日全日都係屋企，睇左幾段影片，豐富左我既人生。最有共鳴就係依一句「時間，可以顯露一切」。
係咁多段片中，【時移世易】最為深刻。係片中，我感受到「時間」同「大自然」既威力真係非常巨大。係時空慢遊當中，我認識左好多世界奇觀既誕生。例如：酷熱無比既撒哈拉沙漠，係幾萬年前竟然係一個汪洋大海；中國既珠峰，其實係由印度既衝力迫壓而成。
諗起時間，我就會諗起旦旦想發明既時光機。自從到左二字頭開始，就成日想返番以前。因為發現到，原來自己做錯左好多令自己後悔既事。如果真係可以時光倒流，但係又有番現在既記憶，真係幾正！
自從上個月既連環豪雨之後，好耐都無見過濕潤既地面。到夜晚，我發現出面落緊微微雨。於是，就搵番幾個月前既【現在，很想見你】出黎睇。
世間上有好多事都好奇怪，就好似劇中既兩夫婦。雖然澪已經係廿八歲病死，但係為左一個雨季後既承諾。二十歲既澪竟然可以穿梭時空，去到未來，再次與廿九歲既巧談戀愛，真係玄妙。
如果我都可以掌握通往時光隧道既鎖匙就好喇！
一連四日既急救班，經過一連串既模擬個案實習後，終於都曲中人散。而且，經阿sir口中得知，原來吹氣Mary曾經發生過一段可歌可泣既愛情故事。
話說係好耐之前，有一個醫生研究出一種可以令心臟停頓既人可以再次回復心跳既方法，即CPR。
有一日，佢同一班學員途徑法國一條小河邊，發現有一位少女為情自殺，投河自盡。於是，該名醫生就立即替依位少女進行CPR。可惜，當時依一套急救方法仲未成熟，而且個位少女亦都窒息過量，結果還魂乏術。
個位醫生深感懊悔。於是佢就立定決定，要張依一套急救術宣揚出去，普渡世人。其後，佢就依照個位16歲法藉少女－Anne，倒模出一個１：１既人型塑膠公仔作為日後既CPR練習。
自始之後，CPR就成為急救之中最重要既救人方法，而吹氣Mary既真名就係Resusci Anne。
阿sir講完故仔之後，我地就不停做練習，足足做左七個鐘。而家心肺復甦法就做得不錯。不過，我包紮個道就仲係未夠純熟。
雖然依班同學只係識左五日，不過已經好熟落，成日有講有笑。過左今日之後，我地要過多兩個星期先會再見，而且到時就係急救考試。希望依兩個星期可以準備充足，到時係技術訓練再見到成班同學仔啦！
p.s.估唔到一篇情深一吻加一幅頭像相出左街之後，立即多左成一倍人黎我Xanga。原來大家係咁現實既．．．
今日上堂真係又驚又喜。因為我要獻出我深情一吻俾一位小姐。心情真係好緊張，到而家都未平伏好。
上半晝阿ｓｉｒ主要都係講理論同重點溫習。不過，食完晏之後，緊張又好玩既事情就接種而來。
我返到班房，就發現中間多左一位少女訓左係地下。原來今堂我地學人工呼吸同心外壓，簡稱ＣＰＲ。
阿ｓｉｒ做左幾次ＣＰＲ示範，仲教我地講左幾句台詞。雖然依幾段台詞好普通正常，但係係咁多人面前講，真係覺得好鬼好笑。
之後，我地就續一出去實習。可能我地第一次做，所以大家都好緊張。不過到德仔實習就好搞笑。佢張段台詞講到亂鬼晒。人地要講「現場環境安全」，佢就講「現實環境好好」。人地明明係小姐黎，佢又叫先生。程序又唔記得，搞到亂晒弄，好搞鬼。不過，總算緩和一下班房緊張既氣氛。
其實，唔單只係實習既同學緊張，係旁邊等候實習既同學心跳都同時不斷加快。過左一陣，終於都到我做ＣＰＲ喇。
首先，我就檢查個位小姐既呼吸、脈搏同循環徵象。然後就開始一生人裡面，第一次既人工呼吸。我一口一口鮮氣通過佢小小既咀巴吹向佢既肺部之中，恍惚我地就係空氣之間互相融合。
之後，我將中指放係佢既腰間，然後慢慢推上胸骨，再用手掌加壓胸部。我一下一下既心外壓，就好似我既心跳一樣，一下一下咁上下跳動。個種感覺真係畢生難忘。
現在，那冰冷但柔軟的肌膚，櫻桃小咀所散發出來的氣味仍然在我腦海中徘徊。
吹氣Ｍａｒｙ，我永遠都不會忘記我們今天所發生的事情。
p.s.終於都轉左版，不過只係初步階段。
今日又遲左起身，不過就無遲到。但係有好多同學就俾譚姑娘屈做遲到。不過，佢地係下晝明明遲到，又簽番準時黎補償。
今堂又係理論加實踐。做包骨折既實習個時最好玩，班同學仔又玩得愈黎愈熟。不過我地仍然係亂咁黎，包到錯晒。
唔知點解，我自己綁平結就可以除得出黎，但係一綁落其他人既時候就拆極都拆唔開，真係搞鬼。
之後，我地又做下模擬考試實習，但係個個都唔係咁熟。包傷口既先後次序都亂鬼晒。睇黎都要搵阿爸黎練習下先。
p.s.本來依幾想轉個充滿陽光氣息既xanga，不過無咩時間，所以都係遲下先搞啦！
好波獻給你
(暫停播放)
今日係急救班既第一堂。開頭講理論都好有心機聽，不過到最尾就太過眼訓，所以無咁專心。但係教包紮個時就好好玩！
我今朝遲左起身，好彩緊緊九點半去到。但係佢竟然話我遲到，張通告明明係寫九點半！點知係開學禮派個張日期卡個時間先係正確。不過，我之前睇時既時候都係寫九點半，但係睇清楚，原來係９：３０個３度，有一個好輕微既鉛筆痕，之後再補番一個零，真係吹到！
今堂講左好多急救既要點，不過好多情況都係唔好搞個患處，然後盡快送去醫院。
最記得個阿ｓｉｒ講述一件佢見過最恐怖既事情。當時有一個香港人係深圳發生左交通意外，搞到滿面玻璃碎片。而且仲內出血，有多處骨折。
但係佢既家人要求拎佢番香港救。於是部大陸救護車就送佢去黃岡。當阿ｓｉｒ接佢過香港北區醫既時候，個傷者竟然噴血。就好似噴泉咁，噴到成個天花板都係血，好恐怖！
佢仲講，大陸既醫院要你有錢先會救你，上救護車又俾錢先，幫你輸血又要俾錢先，超級呃錢。之後，阿ｓｉｒ就講番書。不過來來去去又係個幾招ＤＲＡＢＣ。
今日上左成六個鐘堂，個感覺好似返番名師爆鐘咁。個阿ｓｉｒ講野都幾風趣，而且包紮個時，我地個個都包到不倫不類，好鬼搞笑。
聽日又再上過堂，就教骨折包紮。應該會仲好玩～
自從尋日足球開學禮、曼聯黎踢波、皇馬對北京之後，我終於都忍唔著要去踢波喇！
好耐都無試過燃燒青春喇，驚自己會無晒能量。所以今日無咁快落場。睇完曼聯教踢波之後，我就好鐘意傑斯個招「左左右右左右左」。於是自己一個人係場邊練習。之後，又練下斬波同盪死角。
今日既對手雖然好廢，但係好矛。我地第一、二節俾佢地各入一球。到左第三節，我係尾段就落場。由於我都係開始踢番波，所以球感唔係幾好，仲錯失左一個黃金機會。
但係，可能走左幾個成日上腳既隊友。我地隊波就開始有番攻勢喇。到左第四節，我地派出強陣，結果我地連追三球反敗為勝！打起番成隊波！
之後，又到有我上場表演既機會喇。雖然好熱又腳軟，但係我謹記「熱力學第一定律」Ｈｅａｔ＝Ｅｎｅｒｇｙ。於是就燃點鬥志，繼續作戰！到最後，我既血汗係無白廢，我都拎番一球士哥！
結果，依場波就係由我果個一腳而結束，好景隊勝四比二，完場。
今日係足球教練訓練計劃既開學禮。今個計劃有二百個人報名，而好幸運地，我係其中被選中既五十人。
今次開學禮既主要目的就係令我地一班學員認識大家。首先，我地分開左「牆邊組」同「門口組」兩組。而我就係屬於「門口組」，其中仲有幾個女仔。
之後，我地逐一報上名來，但係實際上，我都只係記得幾個。估唔到我面試個組有六個人，結果竟然有成四個人都入選。
跟著，我地玩左幾個小遊戲。由於大家都係年青人，所以我地玩得都幾投契。最後，雖然我地個組輸左，就係都玩得好開心。
然後，我地填番幾張問卷就解散。我發現原來班女仔個個都係勁野黎嫁，成班都係參加過咩青年足球比賽，又咩區隊代表。相反，我只係有六年街場、二場班際比賽既經驗，好虧啊．．．
另外，今日終於都買左１７”既ＬＣＤ喇！好大、好靚、好清啊！不過，就好光，唔係幾習慣。但係玩ＡＯＣ簡直係一流！
無奈…… 
(暫停播放)
「上山容易‧落山難」今日只不過係由金鐘行上麥當奴道，都搞到身水身汗，仲用左成廿五分鐘。點知落黎只係用左五分鐘。
唔經唔覺，都兩個月無咩做過運動，而家搞到體能好差。而且成日遲睡遲起，精神都唔好。
尋日同多多只不過踢一個由保鮮紙包成既波已經踢得好開心，發覺自己真係好愛足球！好希望隻腳立即好番，等我可以重拾足球既樂趣！
