Category: Xanga

突然JUPAS打黎，話收我Poly Civil HD。但係City Financial Services asso又幾有興趣，諗著係金融界發展。不過Poly HD又比較易升番上Degree，真係好想拎個學位啊。但係前景又覺得FS asso好少少，不過Civil又比較專業。究竟讀咩好呢？

今朝好早就起左身，不過見成班紙底褲都未訓醒，於是就繼續訓覺。大約去到八點半，大家就開始刷牙洗面，然後就去食早餐。

食完早餐後，就玩左幾個遊戲。其中又玩番個果「全部人企晒入去」加強版，就係要翻轉埋企係上面張紙。依個遊戲上次係職前做唔到，不過今次出左少少術就成功喇！哈哈！最後一次，我地全體綠索女企晒係上面玩。裡面班人就超慘喇，又熱又臭，不過我係外圍就好涼爽！

跟著就玩劈西瓜，個遊戲係鬥快食完個西瓜，然後再重組番原狀，之後可以轆到一定既距離就算贏。我地紙底褲有隔離組大力士嘉良坐陣當然唔會輸啦！結果我地係最快個隊。隔離個隊就慘喇，因為輸左要俾我地用西瓜皮洗面。不過佢地又幾個女仔走入左廁格避難，結果我地最班人走晒入去。一聲令下，將全部西瓜皮拋入去，場面超攪笑！

然後大家就返房休息準備食夜飯。過左無耐，無啦啦叫我地全體去禮堂集合。

去到禮堂見到其他人已經到齊晒，於是營長阿香就正式宣佈一件大事。佢話佢地唔見左個錢箱，而且裡面仲有八千蚊，仲話我地嫌疑最大，要搜晒全部人既行李！我地綠索女立即話唔可以，因為佢地無權話搜就搜，而且係佢地唔見左錢，係佢地既責任，佢地懷疑我地，將個責任推俾我地係就唔得！之後，我地綠索女其中一個組仔Sunny就立即出聲！佢非常正直咁講：「你地根本無權搜房，要搜既話，就報警叫差人黎搜！」紅萬個邊立即反對，佢地話唔想搞大件事，仲話為左表明清白，佢地願意搜房。跟著藍筒丸個邊又話唔搜得，返學黃個邊又話要搜。之後大家就開始爭執起黎，而且仲想大打出手！

跟著，大家仍然爭論不休，我地紙底褲個組爸阿威又話要拉大隊走。係依個時間，我地個組仔Sunny又出聲，佢好豪氣咁講：「打交係解決唔到問題既，大家都係成年人，一齊諗下辦法搞掂左個八千蚊啦！不如大家夾錢，我願意出一千！」雖然我好欣賞佢既豪爽，但係唔見錢佢個唔係我地，點解要夾呢？況且依個係佢地既責任！於是大家又一次爭執起黎！

點知突然間有班人拎住水槍衝入黎向我地射水。個一刻我地先恍然大悟，原來依個係一個situation game，目的係想我地將來係大學或者出黎社會既時侯，遇到咩不滿都要勇於發表自己既意見！

玩完之後我地就吃夜飯，食完飯之後又到今日另一個特別節目．．．

就係跳Camp.Fire喇！雖然我唔記得晒舞步，但係跟著大家一齊跳已經玩得好開心。可惜陽盛陰衰，我左右手邊都係男仔黎既。跟著就係營花營草選舉，返學黃個邊個營花好屈機，出到彭丹一字馬，而紅萬營花就係度show身材，我地綠索女個邊真係大飽眼褔。其餘兩組都無咩特別，最後都係返學黃個果當選營花。

跟著就係Disco.Night，個場因為落雨加潮濕關係，搞到塊地版好濕，好滑。不過我地個個手拖手玩溜冰，圍住個埸打圈。雖然我地唔識跳舞，只不過係亂咁跳，但係都玩得好開心！不過，裡面真係超級大悶熱，成個大蒸爐一樣，我地玩完之後個個變晒濕毛鴨，好搞笑！

然後我地各組番房，我地沖完涼之後又隔黎房玩。今晚好激，玩拍7加only true no dare，個後備姐”媽”既問題好敏感，搞到我地好認真。記得有一條問題問：依度邊個最樣衰？雖然Kelvin無講出黎，但係佢拍一拍Sunny個膊頭，簡直無聲勝有聲，哈哈！其間又有好多動作題，真係好變態。玩左無幾耐之後，我地就返房訓覺。

今日就係O’Camp既開始。返到課室，每人都派兩件綠色衫，好綠啊！換完衫返課室，突然多左幾位新組員。由於佢地之前無去grathering，於是係度又一次介紹自己。過左無幾耐，組爸媽仔女齊晒之後，就開始第一個項目。

今次主要都係係City走黎走去完成任務。完左之後，我地就有個講座，有一班人講左好多廢話，又派左好多廢禮品之後，我地就食午飯，跟著就開始誓師大會。係誓師大會，每組都互插對方，每個人都高呼口號，加上打氣捧捧既敲擊聲，簡直如雷貫耳！不過，搞到我隻左耳既老毛病又發作。

然後，我地就開始上車前往營地。但係大家都好似好眼訓，無咩野講。於是我都訓一訓，養充精神黎準備三日兩夜既種種挑戰。

去到大棠，分配房間，玩左幾個小遊戲，食埋晚飯之後，第一個集體遊戲Treasure Hunt正式開始。

今次遊戲主要去十二個地方，完成指定既任務。不過個遊戲開左無幾耐，就開始落雨。我地要係雨中走黎走去，一時上山，一時落斜，對班女仔黎講真係幾吃力。記得上個條長樓梯去個亭上面，行得好辛苦，阿Wing仲搞到哮喘發作。不過我地付出既努力都係值得既，因為一次可以完成兩個任務，而且挑機又成功！自此之後，我地士氣高昂，一路跑一叫紙底褲，沿途組爸組媽又為我地打氣。最終我地係綠索女之中最快完成既一隊。可惜，對面紅萬比我地更快到達，而且俾佢地搵埋個寶藏，真係唔抵。

返到房，我地輪流沖涼。之後我地就揀營花營草，我地派出方力申同美麗的根源。我地仲幫佢兩個諗計排左個短劇出黎，真係超級搞鬼！跟著就過隔離房聽鬼故。去到對面，間房熄晒燈，得一支電筒照黎照去，形做出一個緊張既氣氛。隔離個組媽講左兩個鬼故，雖然有一個聽過，但係自己係腦氣幻想番個景象都幾恐怖。跟著我地返番自己間房繼續講鬼故，不過Marco講既鬼故都唔驚既，講講下仲變左講校園怪事。

之後我慢慢就訓著左．．．．．．

欲知後事如何，請留意下回分解～

不經不覺，職前已經完成左一半。今日既主題係團隊精神，合作能力。我地又照舊分組玩遊戲。頭幾個遊戲我地都做得好好，而且不斷刷新最快時間。但係，去到最後一個，我地無辦法完成。不過，見到班同學仔好投入，不斷嘗試，不斷諗辦法完成。所以即使失敗，但係我地都好滿意。

今堂之後，我地大家既關係更進一步。平時休息時間，我地都係自各有各做自己野，無咩理其他人。不過，今日我地又講下波經，又討論下個遊戲。大家相處融洽左好多！完左職前之後，我地仲去踢波。

不過，落雨既關係，而且我地又無波衫。所以大家都踢得力不從心。但係反而又幾好玩，個個亂咁黎，好搞笑。最後，我地個邊大勝三比零，哈哈！

另外，聽日就去O’Camp，所以大家會見唔到我幾日。

p.s. update左尋日個篇日記

今日發生左兩件事，有好有唔好。但係，都係開心既！

連續幾日既早睡早起實在太唔習慣。每晚係床上面轆黎轆去，訓唔著，朝早起身又無精神。結果，今日職前遲到左五分鐘。

今次主要討論人與人之間溝通既技巧。雖然我地玩既，都係耳熟能詳既經典遊戲，例如超級無敵大電視，但係，如果限制使用說話表達，有時候，的確好難去形容某一件事物。最深刻就係德仔想表達「唐朝盛世」，但係變左「糖焦成世」，真係Ｏ晒咀。

不過，【隔山打牛】既遊戲當中，我體會到身體語言既無界限威力。即使聲音被阻隔，但係透過口形、手語、表情，一樣可以傳遞訊息。現今通訊科技發達，傳播一個訊息既方法五花八門，不單局限於言語，視像溝通亦都日漸普遍。我覺得即使有咁多先進既科技輔助，但係有時候，一個點頭、一個微笑或者揮一揮手，對方都足以感受到依一份無限既心意。

完左職前之後，就趕去城大做旗仔。去到又一城，見到一班人企晒係大學門口歡迎我。我一行過，佢地就大叫：「歡迎光臨科大！」下！科大！？我幾時去左科大？不過算啦，科大都幾好。於是我就上課室整Dom旗。

由於我地個名叫【紙底褲】，已三索為主。於是我地就畫其餘個三個House Cap.落去枝旗上面。整左好耐，枝Dom旗總算完成。有機會就俾大家睇睇。

不過，今日我又俾人改花名。Vivian無啦啦叫我做「假陸」，原來我勁似佢地其中一個同學「陸Ｘ」。之後，組爸又叫我「小平」，佢話將錯就錯，就叫我依個名。然後，仲有第二個人唔知佢係未聽錯，叫我做「小明」添．．．突然多左咁多花名，個個唔同，真係無奈。

其實我叫～小丰啊！

今日職前主要討論我地既價值觀同人生目標。完左今個課堂之後，我覺得我真係比佢地幸運得多。我見佢地講佢地既理想既時候都好迷茫。其實佢地係有一個明確清晰既目標，可惜，往往都係因會考既挫敗，或者家庭既問題令到佢地無法達成。

至於我既目標？

我希望我可以盡快賺夠錢退休，享受人生！因為我實在太討厭依個學歷社會！如果可以生活無憂，自由自在做自己喜歡做既事，實在太美妙喇！

可惜，始終依個都係一個夢，返黎現實啦．．．．．．

今日正式開始一連兩星期既職前輔導。由於尋晚訓得唔好，所以五點幾就起左身，於是就執下張書檯，上下網。然後八點半鐘左右就出發去YES。

去到門口，見到張通告寫住：「足球職前，去YES工作室」。咁我以為係要上番中心個度。點知去上面，個職員話頭先個度就係工作室，真係吹到。

今堂大部份都係之前急救既同學，但係有少少就係急救二班，所以我地又玩介紹自己。

嘩！一連兩日都要自我介紹，識左好多新朋友，突然間個腦加左好多個人名。而今次又係用接龍既方式介紹自己同其他人，即係我介紹完自己之後，下一個就要講番之前我，然後再介紹自己。我發覺依一班之中，好多個都係讀過ＩＶＥ，毅進，而現況就係無野做。包括埋我，只有兩個係中七畢業。

之後，主要都係玩一批小遊戲而認識對方與及自己。有幾個遊戲都幾好玩。最爆笑，就係「點解你個樣咁好笑」。大家畫到其他人個樣超搞鬼。 不過有一兩個心理測試就幾無聊。

上完職前之後，我就去深水步覆診。行過鴨寮街，見到好多阿叔阿嬸圍住一齊睇個Sales點樣介紹把切肉剪刀。佢既論證技巧好勁，又用晒專家意見，個人經歷。呃上班阿叔阿嬸點晒頭，好搞笑。

跟著，俾王煒叔叔禁左幾野之後，我腳舒服左好多，無再咁痛。我預計九月開始就可以做番下激烈既運動。到時又可以踢波喇，真係開心！

然後就去上環拎特區護照，點知係中環地鐵站俾個鬼佬問路。我地問號完一輪之後，總算話到佢聽點去交易廣場。上到去辦事處，發現好多北面既同胞，佢地既行為真係．．． 

等左好耐，終於都叫我媽個名，點知我一起身，全部人立即用奇異既眼光望住我．．．有咩問題呢？幫阿爸阿媽拎護照唔得既．．．．．．

尋晚又有個女仔打黎，真係俾佢搞到Ｏ晒咀。佢一開始打黎搵何Ｘ平，但係我又知咩個係何Ｘ平。於是佢就話搵何Ｘ年，但係我都係唔知係邊個。等左一陣，我終於都知道搵邊個喇！原來佢係搵我．．．．．．我叫何Ｘ丰啊！算啦，可能我簽名個時寫得唔清楚啦。佢唔叫我做何Ｘ蚌，已經好好喇。

佢打黎係叫我去CityU傾下O’Camp既詳情。於是今日就再去City。

到城大個恆生銀行，已經見到好多人係度。之後等整人，我地就分組上去五樓傾野。

原來今次個O’Camp有分四個House，分別係紅萬、藍筒院、綠索女同番學黃。而我就係屬於綠索女依個House。然後綠索女又分三個細Ｘ，我就係其中既紙底褲﹙其餘兩個唔記得叫咩名﹚。其實大家細心少少，就會發覺全部名都係同麻雀有關。

然後我就係互相介紹下自己。原來我個組都有兩個同我一樣讀FS，之後有幾個讀degree。跟著組爸就講下O’Camp有咩做，仲介紹咩叫”con”，令我諗起旦旦既body check！

之後就作slogan，但係個個都玩手指，好悶場。最後都係要靠組爸組媽搞掂。不過，全部口號都係插其他House，而且仲好色情，不宜係依度公開。然後就討論下枝旗點搞，不過成班都唔係好出聲，又係篤手指。

最後就係學跳舞，真係超搞笑！雖然動作同舞步有少少硬膠，但係玩得好開心。不過，有成七隻舞要跳，而且隻隻都係快歌，真係變態。最搞笑係要跳超人迪迦同鋼鍊．．．

好喇～今次gathering大至上就係咁。唔想打咁多字．．．

p.s.大學生好鐘意講野中英混雜，而且好多古怪英文簡稱，搞到打日記好唔整齊，好怪。

以下，係少少係MINI睇到既野．．．

Case 1
今日先去完cityoffer letter返黎

有人問我阿爸： 你個仔而家讀邊間U？
爸說： 城大
回： 城大？城大好似好差架wor~~ 乜唔係中大咩?
爸說： ….. 唔係，係城大，不過都唔係差…
回： 咁佢讀咩係?
爸說： BBA
回： 讀BBA第時未要返大陸做野？

Case 2
我阿爸聽到我入唔到港大入左bu之後，好似唔當我入到u咁，
少少開心都冇，成晚黑口黑面。
好似我影衰左佢…..=.=

Case 3
我入左教院咪仲慘………..
d人唔知教院已經係大學
仲問我:你入左學院呀????
-________-“

Case 4
o係d阿叔阿審心目中只有港大……

我試過俾街市賣魚佬問我讀咩，我答hku space，佢即刻直樹舞子

Case 5
我1st 入cu 好開心, 但係佢知道佢個frd 個仔入hku 就覺得唔太滿意咁..
話 ” 呀邊個個仔入hku 喎…… 你做乜唔第一揀hku 第二先cu??
(PS 佢完全無諗過人地個女咩成績) 而家hk 最好係hku, 之後先到cu 呀?? 係唔係呀??? ”

完

其實反應出依個就係社會現實，世俗眼光。HKU係最好，出面太多數雇主都係聘請HKU先，或者讀其他U就無前途。所以，唔想俾人睇死，就只有入HKU，再唔係就CU，頂盡入UST。

但係試問有幾多個人入到頭三間大學呢？

唯一既辦法就係【忍耐】，等到出頭既一日，其他人就會奉承你．．．

p.s.港大太空系~XDDD

今日睇左【電車男】第六集，真係好好好好睇。依一集簡直係牽起高潮！一切都係好順利，而且班網友超搞笑，特別係果個軍佬。而且電車男同Hermes已經發展到交往既地部。

可惜，去到最後．．．

唔知電車男同Hermes會發展定點呢？期待【電車男】第七集！

p.s.愛係需要坦誠，送上小寶既Love & Honesty~