Xanga is a weblog of my daily life.
被Claire 貼了．．．．．．
遊戲玩法：
在文章開頭寫上「被XX貼了」，
被貼的時候要回答指定的問題(本次的題目是怪癖)，
然後在自己的日誌上寫下答案，
再把題目丟給五位友人，
再在文章末端附上這五人的連結，
並且到這些人的留言版上留下：「你被貼了!」
至於這五個被貼了的人請在自己的日記寫下答案，
再去貼另外五個人，
如此繼續下去。
*注意：被貼了的人就別再貼他們了~
我既怪癖．．．．．．
１）用左腳踢波個時，隻左手會做一個奇怪既手勢；
２）食飯個時，會食一細啖白飯，之後先再夾其他食物；
３）沖完涼抹身個時，會不自制咁唱歌或大叫；
４）搭巴士個時，鐘意坐左邊窗口個排；
５）行路個時，鐘意雙手插袋。
以下係傳說中，被選中既五位勇士：
http://www.xanga.com/ronaldo_alex_chow
Tuesday, August 30, 2005
今日收到PolyU既電話，叫我去拎O’day既資料！呼～終於都放下心頭大石！EIE真係收我嫁，唔係發夢！之後就去黃師傅度覆診，點知阿檸無啦啦打黎恭喜我！？原來我急救考試合格，證明我考試前一晚既努力係無白費既，大開心啊！
返到屋企同人狂玩SIM(SMSxICQxMSN)，同時要用兩文三語回覆，簡直係腦袋大考驗，打左好多個字！超好玩！
p.s.打番前兩日既日記，至於O’Camp個篇，大家等下啦！另外，新世界既朋友，SMS吧！
想跳得高時，總要深深地蹲一次來取得彈力。那就會成為強勁的彈簧。這些孩子想要上升時也一樣的，以一次下落，來產生強大的回彈力！
每次睇完【龍櫻】都會有一番新既體會，希望我都可以從跌低既衝力中得到強勁既反彈力！
尋晚幫六姨打字，開頭本來用倉頡＋速成，不過最後都係放棄而轉用九方！結果顯示我既決定係明智既！打字速度倍增，兩個鐘頭左右就搞掂。經過依個經歷，我深深感受到九方既無比威力！
打完字之後就去食宵夜，然後順便去埋六姨屋企訓覺。
可能係訓唔慣，今朝好早就起左身。由於舅父去左旅行，間屋得番佢個工人﹙阿施﹚同兩隻狗狗（Sam & Coco），於是我就同肥鍵一家上去看住佢地，不過其實係上去黐飯食！
一上到舅父屋企，佢兩隻狗就係咁吠，超級嘈！最唔聽話就係Coco，俾佢聞左手手都要繼續吠。不過，佢地一見我地開飯就立即靜晒，仲爬上黎搖搖尾巴，好鬼得意。
之後就感受下舅父既家庭影院，不過食完晏好眼訓，結果一訓就訓到六點幾。跟著又開飯，阿施煮野都唔錯，一邊睇電視一邊食飯，之後仲食埋雪榚，好正啊！簡直當依度係自己屋企一樣！
跟著睇左一套西片就同肥鍵一齊走。
返到屋企就整下我部新電腦。始終都係牌底版虧虧地，IDE插頭得果一個，結果而家要拎走一個CD-ROM先用得番！遲下要叫硬膠霸主黎搞搞先。
p.s.今個某人又打黎煩我，我照舊唔聽佢電話！
今日做咩都無心情，全日係屋企hea。其實因為poly-hd既原因，因為我覺得好怪，點解唔係JUPAS打黎，而係Poly打黎。而且又無offer-letter，又叫我入數先。加上佢俾我個電話打極都打唔通，好驚俾人呃啊！
今日開始我就唔洗再用個部廢柴電話喇！雖然當年依部電話係好勁，又彩色又藍牙。不過經過我家姐歲月既摧殘，機身已經大不如前。而家只不過係一部我聽到對方講野，對方聽唔到我講野既電話，有時仲會無啦啦hang機。
容忍係有一定既限度，所以今日決定去換新機。我而家轉用黑色既J300i，零機價好抵玩！而且分鐘由200激增至1000，以後唔洗驚會傾爆分鐘。我轉左新世界，如果大家同台既就send個SMS俾我啦！免費嫁！哈哈！
p.s.今晚我阿爸阿媽去澳洲搵家姐，兩個星期後先返。而家無王管，正啊!!
經過連日黎既深思細慮，我決定放棄City FS Asso同Poly Civil HD既學位，出國去澳洲讀書。
因為香港既學費都十幾萬，去外國都係加多幾萬，仲讀少一年，所以．．．
同大家講下笑姐，其實今日上緊足球職前既時候，無啦啦收到個電話，有個女人打黎問我讀唔讀Poly既Electronic & Information Engineering HD。雖然同EE有少少分別，不過我諗都無諗就即刻accept左喇。
唔知好彩定唔好彩，原先JUPAS無offer，但係過左幾日又有兩個HD收我。【塞翁失馬，焉知非褔】，依句成語竟然會發生係我身上。不過唯一可惜既就係，City個二萬銀無得退番。所以我一定要加把勁，升番上degree，唔係就浪費左好多錢嫁喇！
今日考慮到升上degree既問題。旦旦話Civil學既野都幾深，而且好多勁人，驚俾人屈機。但係去到FS，自己又未讀過商科，不過聽師兄師姐話唔難讀，如果努力，第一個sem屈到人機就可以有interview機會入dergee。
不過，考慮到兩科都要出晒全力升上degree，我就覺得讀HD會好少少。因為聽阿姨講，其實想打銀行工，唔一定要讀過Finance degree，而且出面有好多讀Finance既途徑。相反，Civil就係一門專業工作，無得自己進修。
兩科比較(假設已升上學位)
|
CityU Finance |
PolyU Civil Eng |
|
|
前景 |
市場需求大 |
香港市場暗淡 |
|
就業 |
出路多 |
搵工難 |
|
學費 |
$178,000(4yrs) |
$147,000(4yrs) |
|
其他 |
專業資格 |
|
|
喜好 |
☆☆☆☆☆ |
☆☆ |
Civil個機會唔係時時有，一個專業資格係一生既。而且從商發展都有好多途徑，現時有唔少Finance.Course讀。所以，有人建議我交主修Civil，副修Finance。如果Civil出黎搵唔到工，先再從商。
究竟拎一個專業資格，俾多自己一條路，定係一心向商界發展呢？