Category: Xanga

Saturday, September 17, 2005

內容後補

根據以往經驗，只貼一幅圖係會吸引好多人回覆。

雖然話上左半個月學，但係仍然係一個大鄉里，好多事都唔清楚。好彩，有一班同學仔幫我解答疑難。但係知得多野都未必係好事，因為發覺原來自己要做好多野，又要print.note又要photocopy又要做assignment，連我每日必打既xanga都唔得閒搞，漸漸覺得自己唔夠時間用。

另外，我唔識點樣係Poly用wireless上網，佢話要id, pw, domain，但係我都唔知需要打咩。有冇人可以幫下我啊？

今日睇左阿仙奴對杜安，雖然係小勝，但係我非常滿意，睇到班球員有鬥心，阿嬌又踢得好好，讚啊！

仲有，今屆係金爺最後一年踢歐冠，好想好想阿仙奴拎冠軍，完成金爺既心願。而且阿仙奴下年又轉新球場，我希望可以飛去高貝利睇一場金爺表演。不過，機會太過渺茫喇。

最後，我只想講一句．．．

雖然我倆天各一方，但係我既心始於屬於…你！我愛你，金爺！

好！聽日一於同金爺一齊返學校慶祝下先！＝P

好耐無認認真真係書檯寫字，用左半個鐘填個份LSFS同Poly.FA，但係仲有好多野未填，應該係唔識填。而且好多野未影印，大把野搞，都係聽日先算。

又好耐無睇過波，加上訓唔著，所以就睇歐冠。低能嫁！皇馬輸三蛋，利記又贏波。唉～我估錯晒全部賽果添 =P

睇睇鐘，四點半，仲係無咩意欲想訓覺。好彩聽日得一堂tutorial姐！

另外，係Dipsy個xanga睇左個MV，覺得幾有意思，所以同大家分享下啦。

911…912…913…

今日終於都到左九月十三日，雖然對大家黎講，913比起911世貿事件、912迪士尼開幕無咁重要，但係對我黎講，當年今日就係一個改變我一生既大日子。

記得以前仲係一個黃毛小子咩都唔識，到而家總算有少少成就。雖然讚賞我既人只係廖廖可數，但係佢地一點一點既鼓勵都係推動我努力既原動力。

講左咁耐大家可能毫無頭緒唔知發生咩事，不過，一直留意我動向既朋友仔就會知道．．．

今日就係B-style正式啟用一周年大日子！！ｷﾀ━━（ﾟ∀ﾟ）━━!!!

唔知道既朋友仔都唔緊要，我就帶大家進入我Xanga既>>時光隧道 <<啦！

另外，今日亦都係我家姐既生日，雖然佢係澳洲讀緊書，但係我都係依度同佢講聲生日快樂！

講番今日，雖然話已經開左十幾日學，但係今日又做左大鄉里。搵一個課室都搵左我三個字，真係無奈。上完令我頭昏腦脹既IC.Training之後，就去旺角買波鞋。

點知去到興發試鞋個時，有班ESPN既人黎訪問我，叫我講下三場歐冠賽事。死啦，我都無咩留意歐聯，自己都覺得自己講野好行，好白痴。最後講個句「開波喇！千祈唔好行開！」表情超級生硬！今晚仲要播出街，唉～真係失禮街坊！

之後就搭１７１返屋企，紅隧超塞車。由於今日有八半，所以不知不覺就訓著左。突然間，我聽到小寶唱歌，於是就立即彈左起身。原來只不過係部電話聆聲．．．真係被阿欣玩死！

今日又做左樣硬膠事，我今朝早要上Poly既Circuit.Lab，點知去到門口先知這十月先開始上堂，但係timetable明明話係今日開始，真係吹到！之後就跟同學仔上hall打麻雀。我覺得住hall都幾好，間房又唔算細，又有好多設施用，不過帶朋友仔黎玩就好鬼麻煩，成日要「嘟」學生証。

跟著就上堂，今日教既野大部分都學過，唔算太困難。不過就同我以前學既有少少出入，所以有時都混亂。

另外，今日開始係Society既O’week，行左幾個圈，見到大部分都係運動類型既學會，大部分都無咩特別，而且比起City個邊好似更加少。仲有，班人都唔熱情既搵會員既，相比City個班真係好瘋狂，不停咁拉人入會。

放學個時見到小明，同佢傾左一陣偈之後就返屋企。

今日終於係妹子隆屋企拎番部親密戰友506V，意未著我要開始踏上大學之路。而家教既野亦都開始深入，都係時候備下課、溫下習。另外，今日識左幾個新同學仔，同佢地玩得幾開心。而我都開始覺得自己過緊校園既生活。

足球，係一樣帶俾我歡樂既運動。我甚至覺得足球就係我生命中既一部分，不可缺少。每當暑假，星期六晚，我地就會係田灣網球場鬥波，到第二朝早八點，就會去黃竹坑跟姨丈踢波，然後到下晝就同成班妹子係石排灣練習。而且我地不停鑽研足球技術，不斷研究新穎既盤扭招數。目的就係希望有一日學有所成，能夠扭過四姨丈落山畢業！

可惜，甚麼「撩波神功」、「顏面頂球」、「一攻一守」，都已成過去。

自從會考之後，我同足球既距離一日一日咁拉遠。雖然偶然都會同班同學、朋友出街鬥波，但係往往因為無場關係或者唔夠人數，最終不歡而散。後期，更加因為學業關係而暫停踢波。

去到預科，本以為可以有更多時間去踢波。可惜好景不常，每次踢波都必有血光之災，而且「世紀大雞眼」更加係一時佳話。高考階段，踢波既時間逐漸減少，所以漸漸就習慣無足球既生活。高考之後，一心以為可以重拾當年快樂既回憶。但係十字韌帶既受傷，一次又一次令我進入足球既低潮期。

唔知係小寶既關係，定係對足球既熱誠減退。我對球員轉會消息，花邊新聞亦漸感沒趣。不過，偶然我都會下載球賽，欣賞一下阿仙奴水銀瀉地既攻勢。但係近來，阿仙奴既戰術運用，兵源問題，成績一直未如理想。不過，年輕小將掘起、傷兵復出、老將神來之筆，一一都曾經令我對阿仙奴充滿過希望。可惜，往往到最後，希望總變成泡影。今次既２：１更加令我．．．

唉～足球，係一樣帶俾我失落既運動。

BoA…

p.s.今日原來係911，各位死難者安息啦！

今日全日對著部PCC，裝番晒地圖、字典、外掛等等程式。唔知係未太耐無用，發覺而家新個部機性能好似強左，睇相又靚左。而且顯示既中文字又清楚左，總之就正啦！

另外，今日出左香港仔買釘鞋，但係無一款鐘意，而且又貴。所以聽日都係著番舊個一對。

返到屋企就搞myPolyU個Student.Acc，但係個度好鬼麻煩，password要求多多，搞到唔可以用平時個果。e-mail又係一樣，迫人地要加個dot，好鬼核突！搞左一輪之前就試下login，點鬼知個password複雜過頭，一時唔記得左。於是又整左好耐。最後總算login到，不過WebCT個度又login唔到喎！真係把幾火！

到夜晚就睇左《大丈夫》，套戲成日同對比同隱喻，真係好貼切。最深刻就係佢地講要滾既原因個一幕，拍到佢地四個好型！

有見及此，BoA特區就送俾大家BoA型女既一面啦。

p.s.今日一上xanga就見到總人數有4,444人，而今日又有44個人黎我xanga，暗示出咩事呢？

Friday, September 09, 2005

今日返學感覺不俗，漸漸感受到校園生活既樂趣。而且同班同學仔熟落左，有時又會有講有笑，氣氛唔錯。上堂方面，教學內容深度開始提升，教左幾樣新野，不過都唔難應付既。今日仲拎左SU本notebook，本野資料好齊全，有晒office電話，搭車路線，對於我地Freshmen黎講真係幾方便。

但係最喜出望外都係我部PCC，本來諗著拎番去Dell俾佢維修。點知佢竟然換過部新機俾我，真係爽啊！

由於四姨婆係外國返黎，所以放學之後就去嘉年華大酒樓食晚飯。一路食就一路同Claire玩SMS，傾左成幾粒鐘偈，間中就同妹子們吹水，講下學園生活，時間好快就咁過去。跟著就去泰皇食甜品，食到十二點幾就走人。

依兩日真係好開心，因為好多以前積累落黎既問題都迎刃而解。但係，一直令我煩惱不堪既【十字幫】仲未剷除，希望星期日運動量唔好咁大，唔好令傷勢進一步惡化。我而家真係好想立即好番，痛痛快快咁踢一場好波！

終於都搞掂晒之前未搞掂既野喇！而家成個人輕鬆晒，好正啊！

今日上完英文同Circuit.Tutorial之後就去左拎學生証。不過佢話要下晝先整好，所以就去City搞退學手續。本來諗著約kaho食晏，點知佢竟然仲訓緊覺。之後唯有約大頭龜啦！

去到City，個感覺雖然唔陌生，但係就有少少怪。然後就同大頭龜食飯，傾下大家讀書既情況。我發現佢地個時間表都幾空下，相反我就日日都要上幾堂。

Poly同City最大既分別就係個Campus大細，City.Campus相比之下，實在太細，食晏時間四周圍都係人，但係又幾熱鬧，好似行緊商場咁。行行俾我見到我地綠索女House.Cap.Vivian，同佢傾左一陣偈之後就去搞手續。

點知上到CCCU又未開門，於是就去影證件照。因為我之前參加左攝影學會，所以佢地會幫我免費影一輯，哈哈！跟著就上番去CCCU搞手續，開頭都諗著無得退錢，點知臨走個時佢話一個月後就可以上去拎番筆學費！嘩！實在太正喇！

跟著就返番Poly做Fitness.Test，今次試下搭KCR。我上到月台就發覺已經有車，終是就立即飛奔入去，但係聽到宣佈話下一站竟然係去大圍！？原來自己搭錯車，好彩我身手敏捷，立即走番出去，唔係就去左沙田喇！哈哈！

去到Poly拎左學生証，而且仲搞掂埋地鐵八達通。係途中竟然俾我見到阿高，之後仲同佢講左好多香工棋藝學會既事，真係懷念當年我既雙季王。跟著就同肥仔去聽講座。嘩！佢地個邊好多女仔啊，而且質數都唔錯，唔怪得知肥仔揀Asso.啦！

最後就係Fitness.Test，睇完一個超悶既PowerPoint後就去測試。勁啊！我而家握力強左啊，兩隻手都過到30，好野！心肺個導師好犀利，一睇我個心跳就知我無做一排運動。講真，自從【十字幫】突起，我一直好少做運動。唉～鬼咩，而家隻腳仲未好番，而且一到就好番既時候又去踢波，結果又傷番。重重覆覆，搞到我都無咩心情做運動。

Claire: 聽日見工一定無問題，加油啊！
Yan: 竟然大家都係同學，多一個朋友，總好過多一個敵人。

小寶時間．．．

p.s.今晚阿爸阿媽返黎喇，咁就去左兩星期，都未真正過無王管既生活，唔制啊！