Category: Xanga

９４０５２６０７，有咩唔開心都可以搵佢．．．Mr. Mo

p.s.一個我希望擁有既眼神

可能係落雨既關係，今日個人比較文靜，上堂無咩同人傾偈，只係自己一個人係度轉筆。加上開始意識好多勁人既存在，所以上堂都無上網玩MSN，好留心咁聽書同做數，做個乖學生！

不過，依兩日掛住足球教練，搞到我無check.e-mail。今日check番先見到輔學課程又開始可以報名，點知已經過左報名日期，超級無奈！(T_T)

另外，今屆英超排名榜前五位竟然見唔到阿仙奴，而且個個而家口中只有車仔。唉～唯有著下波衫，等人地記得番阿仙奴啦．．．

今日就係青年足球領袖既考試大日子！講真，我非常討厭考試！我討厭一試定生死既制度！但係更加討厭自己臨急抱金爺隻腳既態度！

考試既情況唔再講，我既表現中規中矩，尚算滿意。雖然聽阿檸話上次考十六人有十個炒左，但係教練之後話番會綜合番所有資料先再作結論，而且佢又話會有一半以上人數合格，我諗自己點都唔係最差個一半既。

其實，今日最想講既就係我考完依個試之後既少少感想．．．

自七月廿五號到今日，整整兩個月內，我結識左好五十位不同既朋友仔。雖然過左今日之後，我地可能無機會再見面，不過係我既記憶之中，你地始終係存在過，可能我地只係Hi-bye.fd，但係相識總是緣份，他朝有日係街上面遇見大家，我希望大家可以打一個招呼，傾幾句偈。

雖然依四日技術訓練有三日都係落大雨，而且今次亦係最大雨既一次，不過我非常開心，因為見到依班志同道合既朋友仔踢波，令我可以忘記平日不愉快既事件。加上我隻腳就快可以好番，再過多幾個星期，我就可以重回我們的足球場，真係大快樂啊！

金爺我就返黎喇！

唉～愈黎愈覺得自己無用喇！今日有成日時候俾我做份足球功課，但係往往都最後關頭先會落工動手！

因為前晚訓得好晚，所以尋晚好早訓覺支電。今朝十一點起身，個人好精神，於是立定決心開始做功課。開左個Word之後，就上下網搵下資料，點知搵極都搵唔到想要既野，於是就開始做埋晒一堆無聊野，搞搞下仲訓堆晏覺，功課再都無做過。

大約四點幾，我又再起身，又覺得自己好精神！不過就無做功課，又hea左一陣。之後就左睇【電車男】大結局。班網友真係好正！雖然唔知道大家既個名係咩，亦都唔知大家個樣係點，更加唔知大家將來會變成點，但係大家卻被世界稱之為愛既東西連接一齊！實在太神奇喇！

睇完之後突然好有衝勁，於是一路聽愛歌，一路開始我既足球功課。可惜，個時已經係夜晚十點喇！不過，做到兩三點既時候，開始意識到憑自己一個人既力量係唔會趕得切做完既。於是就學電車男開始尋求網友既幫助，但係我搵唔到足球功課留言版囉，又無人可以幫到我。

於是我就開始停晒手腳，希望八號風球既來臨．．．我一直望著天文台個網，一直幻想個３字係８字．．．

好彩，係依個時間勤既出現，將我帶回正軌！勤幫我做左球例同個封面個部分，真係多謝晒佢！個時已經五點幾，仲有幾部分未完全，但係睡魔又不停咁呼喚我，我唯有應酬一陣啦，點知周公又走黎傾偈，搞到我七點幾先再做番功課。

我個時望著個鐘，心諗八點半要出門口，仲有最麻煩既趣味足球遊戲未搞掂。於是又走去天文台網期盼八號風球既出現，可惜，世事總是事以願違。

去到八點鐘，發覺唔對路喇！終於要發動柏金能量裝置。係依個究極半小時內，我一連做左三個足球遊戲同埋我份考試教案！

最後，份功課總算草率完成，但係，跟著落黎就係考試既開始．．．

今日下晝去旺角拎足球教練份筆記，而且仲同阿檸傾左陣偈，佢問我覺得個訓練計劃點樣，有咩值得讚賞，有咩需要改善。講真，我覺得依個計劃真係超級超級掂，唔洗錢有咁多野學，又送波衫波褲，又有專人指導，簡直係一流啦！人地提供左咁多好野俾我，所以我一定會俾心機考好個試！

另外，夜晚同貓強阿豐食壽司，我地傾左好多計，大家都講下讀書近況，又講下其他人既校園生活。阿豐仲整左兩個怪動作「拍手．拉面」，好鬼攪野！不過，最正就係今餐貓強萬歲，而且又還錢喎，大滿足啊！

p.s.今日返到屋企，覺得自己好似入錯屋。因為依個情景太耐無發生喇，不過唔知可以維持幾耐呢．．．．．．

今日派番前幾日份英文功課，我真係好俾心機去寫嫁，結果只係得一個C，仲係全級最低分，超級無奈Orz…咩料啊！

唔得喇～我而家開始要加油喇！目標係其他科爆分，拉番高個GPA！好～【龍櫻】溫書大計，由依一分鐘開始！

不過，【龍櫻】已經大結局喇，結果只係有三個人可以升讀東大。今集櫻木老師又講左一句幾正既話：「入學試只有一個正確既答案，就係合格！不過，人生就有好多個不同但正確既答案，入大學可以係正確答案，打工可以係正確答案，熱衷於運動也好、熱衷於音樂也好、同朋友喪玩一番也好，都係正確答案．．．」（意釋）

唔知大家明唔明呢？雖然我明，但係我仍然覺得只有大學先係正確答案！

另外，我有一個問題想問問下大家：如果有一日你係一個孤島上面，你有一班小朋友需要照顧，佢地非常肚餓，而且你擁有一切釣魚工具與及精通釣魚既技能，你會點樣做呢？

如果同我一樣答案既，你就會認同我「失敗者係唔值得可憐既！」

p.s.依排成日學人講野添，咩料啊！

今日本來諗著去上完Logic去溫書，點知去左hall玩PS2。好彩其後堆功課都問晒人點做姐。唔係好浪費左一日。

另外，今朝搭巴士竟然見到勤，本來下晝諗著同佢一齊食飯溫書，點知．．．

唉~依幾日成日都好夜返屋企，而且成日online到零晨兩三點．．．咩料啊？xanga又愈黎愈小野寫，生活好似好唔充實。雖然大學生活幾開心，不過都唔同我預期咁既。

p.s.金寶雞湯好野，仲要入兩罐，型啊！

依排返學都遲到，有時又想走堂唔聽書，上堂又唔聽書掛住上網玩MSN，十充一個壞學生。雖然覺得自己幾hea，但係又覺得幾開心。而且最近成日遇番以前班舊同學仔，感覺得好親切，愈黎愈有讀大學既感覺。

今日勤黎Poly搵我，本來諗著做數，點知掛住同佢傾偈，而且阿科又表演魔術，搞到我又一次嘜都唔做。無幾耐之後，妹子隆就打黎話到左佐敦，跟著我同勤就一齊同佢去名師補A.Wong。唔知點解名師好鬼鐘意起埋一二角既地方，我地搵左好耐先搵到。上到去名師，新裝修果然係唔同，靚過以前好多。返到名師，又令我諗起當年A.Wong既教導，可惜，我無面目見番佢．．．

之後，我地就去吉野家食飯。然後就返屋企。跟著就hea左成晚。

p.s.今日見悶悶地，所以轉左上面幅圖(made by Patricia)。

今日嘜都唔做，嘜都唔做。總之就嘜都唔做。眨下眼就放完假，真係嘜都唔做。

點解會嘜都唔做呢？答案，你黎過我屋企就會知道。

p.s.尋晚中秋既相係>>依度<<

yo~各位，好耐無見喇！事關我無交三個月月費，俾人停左寬頻。不過，而家已經無事喇！我上得網喇！

講番今日，覺得好滿足，用左大半日黎訓覺。完完全全可以補充番我一星期內既體力。去到下晝五點半左右，我先起身開始活動。過左無幾耐，我就同阿爸阿媽係大家樂做節。

之後就去左表姨丈屋企團年，我地楊氏宗親上左佢天台鋤下大dee，影下相，吹下水。其他人就玩月餅食燈籠。

可惜，今晚烏雲蓋頂，白白錯過八月十五依個賞月既大日子。B女見唔到月亮仲好唔開心，係度不停大叫：「月亮伯伯出黎啦！」，點知一陣大風吹過，雲霧散開，月亮真係出現。B女超級開心，仲係度不停講：「好野，我識得變法術！」，非常可愛。

到夜少少，我就出去灣仔同阿雞佢地落酒吧玩下鋤dee睇下波。之後再玩大話骰，玩到大約四點半，酒吧收舖我地就走人。

今晚無玩過蠟燭，又無燒過燈籠，唯有貼番幅圖當自己玩左啦！