Category: Xanga

今日一時唔開心，一時開心，一時唔開心，一時開心，覺得自己就好似Matrix一樣，個base成日係度不停轉變！

想！我都好想好似中左頭獎，有野唔洗做，老細又吹我唔脹。
日日等出糧，有咩野需要緊張，就係咁既樣，嘜都唔洗撈就至理想！

今日上堂無咩特別，最特別就係耶穌既睡姿！

唉呀！一到星期六日一就唔記得check.e-mail，結果錯過左今日既棒球練習。

p.s.打左去海洋公園哈囉喂，大家去睇睇啦！

後記：哈哈！原來我睇錯，我係下個星期先開始！=P

三十個人係一個籃球場裡面踢波！？低能嫁！

p.s. update左前兩日個篇日記

今日去完海洋公園哈囉喂，將一切悶氣喊晒出黎，而家成個人輕鬆晒！

我地大約五點鐘去到門口，個度好鬼多人啊！我地排左好耐隊先入到場。一入場就見到個德州電鋸殺人狂係度周圍劈人，我地見勢色唔對就立即走入【荒漠工場】避難。

但係，原來個度正正係一班殺人狂既聚居地，佢地神出鬼沒，嚇到我地三魂唔見左七魄。於是唯有去【招魂古都】 招番我地既靈魂番黎。

 招完魂之後，我地定一定神，先發覺自已其實係海洋公園玩緊，所以開始淡定起黎，仲沿途同班娃鬼影相添。

跟著就去左睇【驚劇】，我地入左後台參觀，裡面既佈置異常鬼祕，而且不時又有一團鬼影飄過，驚到我地雞飛狗走。飽歷驚風之後，我地終於離開左依個令人驚心動魄既後台。點知係出左後門之後，突然有一個血流滿面既花旦彈出左黎！嚇到我地奪命狂呼，飛奔坐纜車去另一個山頭。

落左車之後，俾我見到肥肥人，同佢傾左陣偈就去膽量大挑戰！依一邊人煙稀少，鬼影都無隻，所以玩咩機動遊戲都一入即刻有得玩，超級過癮！雖然每一個機動遊戲都曾經玩過，但係仍然係咁刺激！

接著我地就去參觀一下【屍刑瘋人院】，裡面同樣緊張刺激。個果瘋狂醫生同人偶娃娃好恐怖啊！

點知我地臨走個時，草叢突然殺出奪命狂呼先生！佢挾持著妹子進，威迫我交出所有柏金好波能量。

 好彩，係依個時候妹子進變身成為超能戰士，打敗狂呼先生！我地先可以安全返番屋企！哈哈！

如果大家想睇下我地既鬼相，可以去~~>依度<~~

又黎喇！又黎喇！都唔知做咩事，每逢星期六個人就好hea！明明有大把野做，大把時間。但係往往都要係hea到最後一刻，最後一秒先黎開始動工！多多啊！你快d上我身，俾d衝勁我啦！

金麟豈是池中物，一遇風雲便化龍。
九霄龍吟驚天變，風雲際會淺水游。

可惜．．．

風無相，無影無形難捉摸。
雲無常，難為知已難為敵。

唉～這就是我眼中的世界．．．

p.s.師妹，生日快樂！

不經不覺，我已經係Poly度過左一個月。由JUPAS揀科當日，我已經認定理工大學係我中七之後下一個里程碑。可惜，自JUPAS放榜之後，我感覺到Poly慢慢咁遠離我，而我亦慢慢咁投向City。但係機緣巧合，我又重投Poly既懷抱，真係覺得到冥冥中自有主宰。

初黎報到既時候，個人好徬徨，好多野都唔清楚，又驚問其他人喎。但係一星期之後，我結識左好多新朋友仔，又遇見番好多舊同學仔，同佢地分享左好多野，而且自己又體會到好多野，每一樣都令我感覺我真真正正過住一個大學生既生活。

不過，大學生既生活並非如之前所期望既一樣咁寫意。雖然曾經有一個星期上堂又唔聽書，掛著同同學仔玩，咩事都去到最後一刻先開始做，簡直超級hea！好彩，依幾日我終於都記得番到自己原來係讀緊HD而唔係Degree，於是急起直追。不過，發覺原來我同其他同學仔之間既距離而且相當之遠．．．

不過今日睇完PolyDream，我發覺我既理想係時候開始喇！秋天，一個為我而誕生既季節。勁過，博盡！我黎喇！

有理想，自然有你賞識！

今日係理大學生節既最後一日，仲請左一班歌手黎Poly表演。現象氣氛一流，令到我回想番【北上尋寶】當日既情形。雖然今日既主角唔係小寶，但係全部都係算係實力派，所以都幾欣賞佢地。

一開始就有隊Band上台表演，但係我地又唔知係邊個，仲係度估係邊一個歌手。點知原來佢係Poly學生，超搞笑！之後就到官恩娜表演，佢真人的確幾靚，而且唱歌都唔錯。跟著就係方大同，第一次聽佢個名，佢唱既歌都幾有風格，唔錯唔錯。

之後就係最正既周國賢同張繼聰，佢地又唱又跳，超級型仔！得閒又做下小動作、扮下鬼臉，簡直將現場氣氛推向最高點！

然後就係應昌佑，佢個兩首歌都唔錯既。到最後就係薜凱琪，佢真人同上鏡都差唔多樣，而且睇落到個人都幾修長。不過我見到有班假歌迷柴佢台囉，佢地係台下不停叫「雞仔」，去到中途又拉隊走人！好衰嫁，又係度扮Poly學生霸位，影衰晒我地既形象！

如果大家想睇下相，可以黎>>依度<<

p.s.今日勤黎左Poly做學生，超搞笑！

好耐都無試過白天返屋企喇！依排要追番以前既懶惰，成日都係好夜先返屋企，而且依個星期又特別多野做，自己又訓得夜。今日又要上八點半，所以有少少精神不振，到最後既IC.Training竟然去左池塘釣魚。

放左學之後立即飛去訓晏覺，訓到十點幾先起身。雖然唔係咁滿足，但係都算係一個幾好既休息。

另外，今日收到City.msg話可以去拎番筆學費！正！

p.s.發現有好多轉筆高手！係時候要研發出新既轉筆方法向佢地挑戰！

今日幾經辛苦，終於都完成份Circuit功課。其實都份野唔係好難姐，只不過係自己掛住同同學仔傾偈搞到遲遲都未做好。唔得，上到大學要改改依個臨急抱金爺隻腳既惡習！

另外，今日上Comp.Training低能嫁！雖然改圖係我既強項，但係Miss跳得超快，搞到我停左一部就跟唔到。本來平時係我幫同學仔，結果最後同學仔幫我！

p.s.好興奮啊！見到HOCC，阿達你走寶喇！星期五仲有周國賢、薜凱琪、應昌祐、張繼聰．．．正啊！

雖然阿仙奴今場表現唔算突出，不過阿積士把握力亦都未如理想，所以贏波係合理既。自從金寶既復出，班後衛個個都好生，特別覺得托尼打得好好。但係攻勢力就好似差左好多，中場班人成日都自己一個人去，無咩做第一時間，或者好靚既入攝，好似差一個重心球員控制節奏、分波派牌，所以好耐都無見到咩水浪瀉地既攻擊。

阿積士班球員其實都唔差嫁，只係差少少經驗，但係有幾位球員我覺得幾有潛質，假以時日一定有一番大作為！

另外，今日最開心既地方唔係贏波，而係有番一個球迷既感覺。之前因為成日都無踢波，所以睇波都少左。不過而家即使係三更半夜睇波都在所不辭，而且會為阿仙奴緊張、會為阿仙奴興奮。

我諗：我真係返黎喇！