Category: Xanga

有三套戲好想睇，分別係《NANA》、《怪物》、《一球成名》。

有三樣野好想做，分別係買戰衣、去朝聖、踢好波。

唉～不過世事又點會咁順人意呢？想，真係只有想囉．．．

今日終於都番屋企食飯，諗番十月返屋企食飯既日子真係廖廖可數，睇黎今個月都要多返下屋企感覺下家庭既溫暖。

而且好多我識得既人今個月生日，係度祝晒十一月之星，生日快樂！

其實生日對我黎講並非一件非常值得慶祝既事情，因為每大一歲就代表你接近死亡又行前左一步，而且每次見到自己既歲數，再望望一無事處既自己就會．．．

生日對一般人黎講的確係一個高興既日子，壽星仔女可以係當日話晒事，可以收到好多件禮品，可以同一大班人狂歡！可惜，唔係每一個人都咁幸福。而我就好驚生日既來臨，我好驚無人記得我生日，好驚個日孤伶伶咁度過。

p.s.阿媽：生日唔等於結婚周年、姨媽姑姐擺滿月酒嫁！

Wow~~~~Amazing~~!!!

今日係十月既最後一日，亦都係萬聖節。我同一班同學仔食完Pizza之後就去尖沙咀海旁感受下節日氣氛。由於我既萬聖節早早已經係十月一日度過左，所以今晚覺得好似欠缺左少少野。

雖然維港兩岸既景色非常迷人，不過人群中既我就覺得有點．．．依一種感覺並唔陌生，因為係依個十月，依種感覺一直陪伴著我。

可能係因為midterm-test既關係，大家已經漸漸遺忘九月毫無壓力既歡樂時光。今個月，大家都為升上degree而努力，日日夜夜去圖書館溫習測驗。可惜，每次測驗過後，各人都垂頭喪氣，分別為自己不理想既成績而感到頹喪。

黎緊既十一月，本應係一個為我而誕生既月份，應該要開開心心既度過。但係我諗大家又要係圖書館埋頭苦幹，好好準備十二月既考試。

尋晚既打呲大戰真係好刺激！下半場之後，各位師兄都好似返左黎一樣！走位入攝好流暢，成隊波好有心想贏！真係好開心！雖然今屆拎冠軍既希望實在渺茫，但係只要阿仙奴每場都打出應有水準我已經心滿意足！

睇完場波，對阿仙奴既感情又更加濃烈。好想立即飛去朝聖啊！

睇黎又要拎幾百銀出黎買番件金爺戰衣！

以前人地話【讀萬卷書不如行萬里路】。無錯！人的確唔可以成日困係屋企，應該要出去外面，見識一下外面既世界，親身去體會，去了解書本上面既知識。

不過，時移世易，互聯網既迅速發展，有好多野都唔洗親身去到當地先可以見識。我地只要係搜尋器輸入某某想認知既事物，佢就會立即搵到好多有關個方面既資訊俾我地。

今日，我只係去左一個網站已經見識好多來自世界各地不同奇人異事既影片。心裡面諗：有冇咁勁啊！會唔會係電腦效果，還是係呃人既技倆？但係，世事無奇不有，無野係無可能發生既，未見過更加唔代表無。自己未見過既事情就去否認佢，只係見識唔夠廣闊既人慣常既態度。

跟著係妹子屋企打機，不過一合作就表現好差，個人反而就狂入波喎，真好妹啊！好耐無試過任天堂手指痛症喇！哈哈！

但係妹子隆啊！你做咩咁hea啊！Double.A係得來不易！你Pure拎唔到A點對得住KKL啊！仲上網玩MSN！？快ｄ去溫書做功課啦！

p.s.今日係小丑神崇拜日

自從返左Poly之後，覺得自己對小寶好似冷淡左。可能唔係咁太喜歡而家小寶太過刻意性感啦！始終覺得細細個既小寶係最可愛，最得人鐘意。不過，小寶都要長大既，唔可以成日停留係青春少女既形象。不過，我覺得「性感」未係一個好貼切形容佢既語詞，仲要等多一排。

今日睇左小寶最新ＰＶ，個做型就一般啦，不過個髮型就幾好，覺得小寶成熟左又靚女左，而且仲．．．～呵呵呵！

可惜首歌無俾我一聽鐘情既感覺！但係曲風都幾特別，仍然顯露出小寶既唱功同舞功！

今日降魔都唔錯，我親自落場同佢地一齊鬥波，仲教識佢地踢十二碼同其他球例，班魔獸隻隻都玩得好開心。不過就有兩隻小魔獸係度喊，佢地喊個樣都幾可愛，最得意係佢地做番好朋友握手既表情，哈哈！但係我個喉嚨又變到好似被火燒囉！

教完波之後想溫書嫁，但係去左訓覺．．．結果考得麻麻地。

同同學仔打完籃球後就返屋企上網，今晚超變態！一次過同六個人MSN，仲可以一路玩旋轉泡泡，厲飛利啊！

今日Programming派卷，好耐未試過有一份卷係高過依個分數。但係相比其他同學仔，我只係一個好平庸既分數，自覺到我同佢地既差距，依一班真係臥虎藏龍，所以仍然要力爭上游！

放完學就去團契，聽左個牧師講左好耐聖靈，了解多左少少啦！自己都發覺心裡面成日有野同我講野，但係唔係聖靈，而係魔鬼囉。而且我仲發覺自己都幾聽魔鬼話，成日走去偷懶．．．

p.s.平衡世界：有正必然有負、有多必然有少、有好必然有壞！

朋友，如果係真正既朋友就唔會取笑你！

Eng midterm-test is coming soon……

A.Wong~Be with me!