Category: Xanga

尋日踢完波再行左成日街，今日起身隻腳超痛！每一次起身坐低，每一次上落樓梯，隻腳都好似俾幾十支針直接插入骨裡面。唉，放Lab既時候，本來諗著搭電梯上去實驗室繼續做，點知成班同學仔一見到部電梯開門就立即衝晒入去。唉，最後我依個傷殘人士唯有一步步咁挨上去五樓啦。

啊～我覺得自己好犯賤！一切都係咎由自取，唯有無奈與忍耐啦。

本來今日係小寶出新碟既大喜日子，不過算啦．．．

本來今日Dayoff，可以係屋企大訓一場，不過由於我對足球既熱誠實在非常強烈，所以八點就去左Poly踢波。今次係同自己班第一次踢波，可惜，今次亦都係今年內既最後一次。唉，雖然．．．，但係．．．

咁巧合今日師妹又唔洗返學，於是踢完波就同佢一齊去行下街。我地行左好耐啊，一邊傾偈一邊睇野，差唔多全旺角都俾我地行晒。到晚夜，我地同阿Ｂ去食晚飯，而且仲去左間總統套房，好彩我地無去貴賓房，唔係可能會俾炸彈炸到散晒，哈哈。

我同師妹本來都諗著返屋企嫁喇，點知行行下行左去佐敦。見師妹未黎過Poly，於是就帶佢入去參觀一下。師妹話Poly好似屯門，周圍都係紅色磚頭，好有熟悉既感覺。哈哈，睇黎師妹好想入大學喎，要努力喇！只要有恆心，夢想可成真！

好無聊、很無聊、好很無聊！今日無無聊聊咁就白過左一整日，都唔知自己返學做咩！＄４０蚊嫁！每日都要洗＄４０蚊嫁！返學就好似等放學！上堂就好似落堂，以為自己識晒好醒，點知係豬頭炳！堂堂掛著轉筆！咩料啊好頹廢啊！

好妹啊！＝田＝

一個鐘意講野既人唔講野係未真係唔得嫁呢？我只係想安安靜靜做自己鐘意做既野姐。唉，過住家無寧日既生活真係唔好受。唔得！我已經忍受左廿年喇！係時候要改變一下！

今日一起身就感覺到冬天已經黎左。講真，我係一個唔怕凍既人，可惜我隻腳係一隻好怕凍既腳。我知道好多人鐘意冬天多過夏天，因為冰冷既時候可以一個人係張暖棉棉既被窩裡面熟睡；聖誕節既時候可以同情人係尖沙咀海旁欣賞絢麗多彩既燈飾；新年既時候可以同家人共眾天倫之樂。

但係，我好唔鐘意冬天令人感到寒冷獨單既感覺！訓覺既時候要訓落一張又冰又冷既床上面，隻腳凍到好似唔係自己一樣；放學既時候獨個兒係海旁抵受寒風既吹襲；過年過節既時候要對著班親戚喜皮笑臉講出一連串唔會實現既祝福。

無聊之作．．．

依幾日好懷念以前既小寶，好懷念小寶可愛既笑容。我唔係話而家既小寶唔好，只不過係我鐘意以前活潑可愛既小寶咁解姐。

我屋企無啦啦出現左一個電子琴！但係無從入手，有冇高手可以指點迷律？教下我彈彈琴，跳跳舞？他朝有日彈得一首好歌，必定感激萬分！大感謝！

Written by

縱使離開了一年之多，但我亦感到妳是存在的。

尋晚飲酒飲到個頭好混沌，而且成肚都係酒，好唔舒服！今朝起身去廁所既時候，個人仲係迷迷糊糊。雖然思想上係好清晰，但係個身體就唔係幾受控制，行路左搖右擺，仲撞跌左好多野！所以下次都係適可而止！

今日又明白左少少真理，進一步確立自己既觀點。不過，我仲需要多少少親身既經歷，親身感受真理既存在！

好奇怪！當人擁有過某樣野，但係之後失去依樣野。個感覺比根本無擁有過更加苦．．．．．．

p.s.今日竟然係蔣震見到小寶PV！可惜，無人欣賞。

Ｈａｐｐｉ　Ｂ－ｄａｙ　ｔｏ　Ｏｓ～

一般人見到上面既說話，會覺得我自己祝自己生日快樂。但係只要你睇完NANA就會知道，其實世上有另一個我！另一個同我一樣名字，一樣生日，一樣喜愛小寶既人。

Oscar～生日快樂啊！廿一歲女喇！祝你心想事成！
(自己生日同人地講生日快樂真係攪笑~XDD)

今日要測Logic，自己一個去左圖書館溫書，點知溫溫下突然有張字彈出黎！睇真少少，原來係一幅信！

打開一睇！發現原來係一張生日卡！上面全部都係同學仔既祝福說話！真係大驚喜啊！

好耐無收過生日卡喇！真係多謝晒！\(^o^)/

測完Logic，同一班同學仔去左打邊爐。同佢地玩左兩次one.shot，飲到我頭暈腦脹。不過酒醉都有三分醒，我應該無做到咩糊塗事。哈哈！不過，阿正就真係醉左，希望佢無事啦！

今日真係又開心又難忘，收到好多無聲既祝福，雖然唔係親口講出黎，但係一切在心中 is OK！

尋晚睇完阿旺就去左訓覺，而且仲發左個靚夢！

夢既開始有三個人，第一個當然我係啦，第二個就係賓仔（去迪士尼做足準備個果），第三個就係一個長頭髮既女仔。好奇怪，我只係記得個女仔係長頭髮，佢俾我有一好熟悉既感覺，就好似一個我認識既人。當時我見到佢同賓仔玩得好開心，個女仔笑得非常燦爛。

突然，我轉左去以前麻麻間舊屋裡面。當時我好似知道自己有一種神奇能力，只要我心想甚麼，就會做甚麼。於是我做左好多想做好耐既事。

又突然，我變左係一格巴士上面，而個女仔再次出現！原來我地要去旺角買文具。點知無啦啦係天空見到好多噴射機，之後又見到一隻大飛船，接著就係一連串唔同外型既飛行物體。場面就好似外星人侵入地球一樣！

跟著無啦啦又發生大海嘯，我地逃離到一幢好高既大廈裡面。由於洪水一直湧上黎，我地一路走，一路走，走到天台。突然間全部出入口自己鎖住，我地好緊張，心裡面只係覺得我地一定要逃走，要離開依幢大廈。

之後，我地好似經歷左好多難關，最後終於都離開左依幢大廈。當我一開出口個度門，就發現有好多路人向我既歡呼鼓掌！

隨著掌聲既結束，我又返番黎現實。