Author: bergkampho

好討厭落雨啊！雨水打落地面既聲音好煩厭啊！

自從上次水運會之後，好耐都無游水，於是今日就補番游龍舟水，順便幫隻腳做下物理治療。記得以前細個去包玉剛游水，緊會都有問題發生既，好似有人唔記得帶學生証、唔記得帶碎銀、唔記得帶微鏡等等。但係今次就好鬼順利喎。

今日水溫都幾暖，而且又無咩太陽，幾適合我去游水，但係游蛙式伸腳個時就有少少痛，不過好妹啊，見到一對情侶係池邊妹下妹下。之後就過左大池邊游。大池既水溫又暖、水又夠清、又易浮，真係正，都唔明佢地係都要去中池游。不過，最衰係腳隻傷左，游得無咁順。大約游左兩、三個塘就去左嬉水池果邊晒太陽，但係張凳成股腳腳味，晒左無幾耐就走人。

游完水我地就出去香港仔食野。記得以前無錢搭車，成日都係黃竹坑搭船去珍寶海鮮舫，之後再出香港仔。於是我地照舊搭免費船出去。然後我地就去椰林食飯，套餐好鬼死貴啊，又要加一，足足ＫＯ左我＄６０。都唔知點解仲有咁多人排晒長龍去食既！？

返到屋企就睇獎門人。今集佢地個做形好正啊，短褲波襪，令我諗番起崔師兄，隔離台果個睡衣ｌｏｏｋ完全無係鬥啦！一開波獎門人就係度狂講《妹子語》，好頂癮。之後仲搞笑，玩「開口中」個陣，人地明明擇中左骰仔號碼，其他人都照飛忌廉

然後就開始操ＡＯＣ，練分體。不過攻守都唔係好協調，而且溝通都係麻麻，仲係有待改善。一連三日都打ＡＯＣ，仲玩到好夜，搞到第二朝無咩精神，都係要回復番早睡早起既習慣。而且，日文仲係停滯係平假五十，本投資書又未開始睇，睇黎要開始加把勁先得喇！

今日做左義工，幫香港基督教播道會聯會賣旗仔。正所謂「未食唔月粽，寒衣不入籠」，今日就係端午節，所以有成三十幾度，真係熱鬼死。本來八點就要賣旗，不過尋晚同妹子佢地打機，所以訓晏有少少。大約到九點終左右，我、梁志勤同多多喜就開始係香港仔中心賣旗喇

我地係石排灣明愛拎左旗袋之後，就行去香港仔賣，沿路一直捉人賣旗，都賣出左十幾張。本來我地係香港仔廣場賣旗嫁，但係有個保安叔叔話唔依個範圍唔俾賣旗，於是我地就行去海旁個邊賣，因為扒龍舟，實有好多人。於是我地又係沿路賣旗，點知行到湖南街個公廁之前，有個阿叔見到我地，驚到立即沖人公廁，超搞野啊。不過，去到碼頭之後，就決定走頭喇，因為個廣播喇叭好鬼大聲，我地未賣旗前都已經俾個震爆我地對耳。最後，我地就決定係巴士站對出個隊道口賣旗，個道都幾多人流，都賣左兩疊幾。尋去之前，妹子隆打電話俾我，之後就收工一齊去食野。

然後，下晝就出去深水步睇鐵打，順便就同多多去黃金，高登睇下野。多多想買部ＭＰ３機，咁我就介紹搵譚健朗買啦，點知一上高登就立即見到佢，仲同佢傾左好耐偈。跟著多多就黎我屋企齊電腦，仲再埋部ＰＳ２黎玩。佢之前唔信我ｗｉｎｎｉｎｇ勁，今次終於有一展身手既機會喇，結果連贏個四次，阿仙奴好野！不過好多謝佢幫我整番好部電腦，真係大感謝啊。

統計下，今個月都剷左機好多次，真係覺得好厭倦啊！裝完ＸＰ之後，又照舊裝番好多ｓｗ。裝完ＭＳＮ之後，妹子佢地就玩ＡＯＣ喇，本來想叫埋多多，點知ＩＣＱ見唔到佢。今次超強啊！連贏兩局，拜占庭好勁啊！

Leisure time should be omitted during the horrible Exam period ….
All the time will spend on STUDYING !!

今日係一個同學既日記，知道左一位網上歌手ｋｅｌｌｙｊａｃｋｉｅ。其實，之前妹子隆都有俾我聽過佢首《他約我去迪士尼》，個時都覺得佢把聲幾好既，但係，當時就無咩點留意。今日先知，原來佢係網絡世界已經好紅，仲作左幾首歌。

自從係好景看舖之後，聽左好多廣東歌，又認識左幾位新既歌手，而家對番香港音樂都有番少少希望。其實我真係好欣賞一班好似Ｒｏｙａｌｓ咁既獨立樂隊，自己同班朋友一手一腳搞音樂，唔夠包裝，賣實力！香港就係要夠依班年青人改變而家一般人迷戀偶像派歌手既風氣！

講番今日發生既事啦。基本上，今朝係尋日既翻版，又係修改番日記既排版。之後就出發去利群好景。點知見到妹子隆同樹叔傾緊排陣，佢地話要打二三一，但係我覺得應該要打三二一，因為我深相全能足球係無敵既！由於樹叔要早走，於是有就要過到珍寶好景看舖。今日生意都係一般啦！但係有個客好扒街嫁，佢成日黎問出左「ＡＶ」未，其實只係想買番去佢間舖出租俾其他人！之後就睇小說過時間，差唔多收舖個時，浩然就黎接更，於是我就返屋企喇。

p.s.今日係６１０，魔星降世既大日子，令我回憶番以前５Ｅ既日子，哈！

開始習慣早睡早起，而家一朝早多左時候俾我用，所以可以做好多野。今日上網睇返前幾日無睇既網頁，又更新左Ｘａｎｇａ，今次就轉左小寶做主角。而且，仲修改返以前打過既日記。

返到好景，又照舊聽電台廣播。今日竟然俾我聽到一個超級恐怖既新聞，就係「離奇空降大脾」。試幻想一下，有一日你係屋企睇緊電視，點知突然之間，聽到天台「彭」一聲，仲整凹埋個天花。於是你就上去睇睇啦。但係千估萬估你都唔會估到，你竟然會發現左一隻左大脾，係一隻血淋淋既男人既左大脾！你話大唔大震驚呢！原來係美國有個偷渡客偷偷地上左一格飛機，點知俾隻機門挾左隻腳出黎，仲要跌落去民居既屋頂，真係大恐怖啊！

今日生意好差，又要走黎走去，隻左腳又超痛，睇書又睇到背痛。好辛苦啊！之後，無無聊聊就睇ｅａｓｏｎ隻ＮＣＭ，發覺而家香港樂壇真係好少有佢唱Ｌｉｖｅ咁好既歌手。抵佢銷量咁好既！

好～報一報告學日文既進度先，而家學識左平假音既濁音、半濁音！繼續努力！

今日朝早又再剷機，但係部電腦仲係有問題，而家初部懷疑係塊底板有問題。唉～好煩啊！點解電子產品咁易壞嫁，起碼都用十年八載啦！另外，陳奕迅效應依然強勁，所以唱片都算唔錯啦。

仲有，今日搵到兩個開心大發現，第一就係，原來樹叔係識講日文嫁，佢話佢三十年前已經開始學，不過好多野都俾返老師。第二就係，奇摩搜尋器竟然搵到我個網，好搞笑！
(key words: masami nagasawa, no.40)

本來今個星期想隔日隔日去做健身，但係奈何隻左腳真係傷得好重。咩都無得練，仲徙左張月票。唉～我既新碧咸傳球、巴迪高重炮下降版、柏金無敵盪死角加肥利衝衝衝大練習要告吹喇，大失望啊！

小金創業未半，中道崩殂，天亡我也！

今日好早就起身，因為要返好景看舖。搭巴士去火車站個陣，見到有一個阿叔打開兩隻脾，坐係車尾最後正中間果個位，仲要係兩隻捉住左右兩條柱，直望好鬼似囚犯捉住道鐵閘，好搞笑啊！去到火車站，睇到班上班一族，有人拎著本英文書、雜誌黎睇，又有人係度訓覺，又有人係度聽歌，不過無人傾偈。見到佢地，我心情就好興奮，係度幻想自己將來又會唔會變成佢地其中一個呢。

返到好景，無幾耐又有個男仔買w-inds.隻大碟，之後就一路聽電台廣播。其中聽到一位韓國女星整容失敗而慢慢患上精神分裂既事件，真係有少少心寒。之後，有講小寶出國發展既消息啊！但係個主持第一次讀小寶就讀「褒」牙，不過到最後五次都係讀番「波」牙，真係有少少失望。

另外，今日陳奕迅出大碟，一朝早就有四個人黎問有冇，但係批碟下晝先到。不過，批碟一黎到就立即連賣四隻。佢復出既威力仍然係好強勁！今日賣到左佢十隻碟啊！

p.s.日文五十音我終於都認得點寫喇！大感動啊！

今日又係玩天誅、又係玩得好耐、又係去嘆按摩池同蒸汽浴，簡直係尋日既翻版。不過，有少少唔同就係下晝同妹子隆、寧峰打征服者，但係電腦好快就攻到黎，最後要靠妹妹車黎屈機。

食家晚飯之後，就試下張按摩床。嘩！轆到我好痛啊，原因都係成日玩用電腦，搞到坐骨神經勞損。然就，就繼續打機，咁就試下玩其他游戲啦。但係，由於依兩日打機打到好累，所以睇睇下寧峰試打就訓著左喇。

其實打機都幾辛苦，成日要望著部電視等部機過版，又會搞到任天堂手指痛同背痛喎，都係一時一時玩先過癮！

今日係寧峰屋企打機，玩天誅，超好玩但係又勁難玩，成日俾人發現，不過暗殺既畫面真係好正！之後下晝就同梓峰去嘆按摩池同蒸氣浴。本來想去游水，不過落雨，五嬸又驚冷襯梓峰喎，所以無去到。夜晚就帝寶城燒野食，仲同佢地既表弟、表妹玩捉人，好開心！

p.s.梓峰咁細個已經識講粗口，仲識同朋友打online game，超級大驚訝！