今日見到小寶最新韓國專輯裡面既精美插圖，覺得好正啊！韓國大碟永遠都俾到我新奇又刺激既感覺，之前《Ｍｙ Ｎａｍｅ》個野性形象已經好有新鮮感。點知今次《Ｇｉｒｌｓ Ｏｎ Ｔｏｐ》小寶依個新形象再一次突破，超級潮爆啊！個髮型又型啊！真係一見鐘情，好期待出碟個日啊！
至於大碟既曲風都好嶄新，包含左好幾種新風格。但係可能唔識聽韓文既關係，首首快歌都好似差唔多一樣，慢歌就反而唔錯。不過都係比較鐘意小寶唱快歌，因為有得睇小寶勁歌熱舞一番！就算首歌唔太好聽，只係睇小寶扭動蛇腰，都已經係一番極優質既視覺享受！
好鐘意依幅圖～
今日係03-05香港仔工業學校預科生B班既畢業晚宴，除左畢唔到業既Happy，全部同學仔都有黎，仲玩得好癲！
我一去到維園就見到孫老師同徐川。孫老師仲話帶我地入去巴西燒烤，點知佢硬膠膠兜左個大圈。去到門口，見到兩個阿差彈結他歡迎我地，班侍應個個都好有禮貌，氣氛又唔錯。入到去發現，原來班同學仔差唔多都黎晒，於是硬膠派就坐同一張，六喪派就坐另外一張。過左無耐，同學仔同老師都黎齊，肥西著得特別型，成套老西，好鬼似咁就開始食野喇。
巴西燒烤既特色就係唔洗叫野食，佢地班員工會係廚房拎一串串燒肉去每張檯，之後問邊位需要，然後就會切一片俾佢。當個人拎住串腸黎到，旦旦就手舞足蹈，食得超開心，好鬼搞笑。之後，有咩野拎黎，我地都叫佢成串切晒，搞到後面幾檯無得食。隻燒雞翼幾好食，但係其他肉類都係一般。
食左一陣，隔離張檯有個女仔生日，於是個兩個阿差就走去果檯唱生日歌仔。到唱完之後，我地成班喪友係咁歡呼，搞到成場氣氛勁High。跟著肥肥人又大叫「咀佢、咀佢」，我地班同學仔又一齊和應，於是個男仔真係咀。成班玩得好喪！之後就寫心意卡、玩下硬膠孫，然後個個都食到飽飽咁離開，到依度04-05中七既畢業宴就此結束。
ｐｓ．中國國青隊好野啊！雖敗猶榮！
繼雙生兒個ＭＶ抄小寶個ＣＭ之後，而家亞視港男個ＣＭ又抄小寶個ＭＶ
唉～算啦！亞視都係覺得小寶個ＭＶ夠正，先借黎用用姐～不過下次應該需要係左下角註明Copy from BoA
真係「得閒死，不得閒病」，病厭厭既生活真係好辛苦！由朝到晚都一直訓係張床，想做咩都無力，想嘔又嘔唔出，想妹又妹唔到，打機又打得一陣，真係好慘啊！
日記都無得打，貼下圖算啦，休息喇，好番先再打啦！
超級病厭厭
今日係友和同美宛姨、樂表哥、妹子耀一齊食晏。果個鮑魚蟹子拉麵都唔錯，不過好貴。其間討論到講粗口既問題、身分証號碼既盜用、逃走時既扒街，好鬼搞笑！
到左夜晚，楊氏宗親去左珍寶提早慶祝父親節，詳情遲下先補番。
今日又以西裝look見面，給人一種成熟的感覺。
但是否「金玉其外，敗絮其中」！？
時間可以見證一切！四年後，王道便可以解答一切疑惑！
雖然今日繼續落雨，但係總括黎講都過得幾開心。今日一朝早就要去理工面試ＥＥ。心情大緊張啊！因為全程要用英文對答，而自己英文又唔係幾好，好驚會有壞印象，所以超級「肴底」！不過，後來發覺都唔係咩一回事，都係自己杞人憂天
今日我好早就到左ＰｏｌｙＵ，於是就係花園練定一陣要講既說話。到左十一點左右，就殺上去Ｂ座登記。去到３樓等候室，竟然見到崔師兄。唔知點解，我係同學面前就唔會覺得緊張，反而鼓勵佢地，叫佢地唔好咁肴底。真係喎，見到崔師兄，心情就平伏左好多。聽崔師兄話佢之前仲見到阿達、蜥蜴、方逸輝，佢匯報話個ｉｎｔｅｒｖｉｅｗ好輕鬆，講講下英文可以轉講中文，好似普通傾偈咁。聽完佢咁講，就更加振定喇。
等左無耐，終於要去面試喇。跟著個阿叔就帶我地去面試室。行到ＣＦ３０２室，個阿叔就叫我係度等，之後就帶其他人去其他室。個時聽到裡面全部都係英文對答，就開始緊張喇。於是就開始幻想，個面試會唔會好似鋼鍊咁樣，要坐係一張好細既凳度，有盞射燈照落黎，之後有幾個大粒佬圍住你，向你發問呢。一陣之後，房裡面個人ｉｎ完喇，佢就笑笑口咁走出黎，叫我入去，自己就好似甩難咁走左人。
入到去，見到得一個人，個心都無咁驚。但係佢一講英文就開始肴底喇。佢一開波講左一大輪英文，不過我都唔知佢講咩，又唔似問我問題，但係我都繼續扮明白啦，係咁ｓａｙ ｙｅｓ。之後佢問我ＡＬ會拎到咩Ｇｒａｄｅ，但係一開頭唔知佢講咩，直到佢講Ａ，Ｂ，我先恍然大悟。於是就笑笑口咁答Ｃｒｅｄｉｔ。然後我繼續係聽唔明佢講咩英文，不過都估到佢大約係講緊ＵＳＴ個ＥＥ同Ｐｏｌｙ個ＥＥ既分別。佢話Ｐｏｌｙ個ＥＥ係有四個Ａｒｅａ，其中一個係全港獨有，總之吹到好勁啦。到最後佢就問我有咩特別問題，其實我都無咩嫁，不過就求其問下佢ＥＥ同ＥＬＥ既分別囉，然後佢又係講左一大段英文，仍然係唔知講咩。但係話晒都係Ａ．Ｗｏｎｇ學生，於是當我一聽到我識既字就立即重複，然後又一直咁點頭ｓａｙ ｙｅｓ
挨左大約十分鐘終於都完喇！一出門口個下真係會自然笑笑口，唔怪得之之前個人咁開心啦！
落到樓下見番崔師兄，之後就去Ｐｏｌｙ個飯堂食飯，但係咁都似ＵＳＴ咁平既，都要成＄２０。我就叫左個焗飯，但係成個大鄉里咁唔知係邊拎飯。食食下飯，竟然見到豪哥，同佢傾左無幾耐，阿雞、肥肥人、可樂佢地都黎埋，於就傾左好多大學生活既事，又講下面試既事。聽番佢地講，佢地個個都係講左一陣英文就轉番中文。但係點解我果個會咁既，不過覺得ｉｎ我果個係個印尼佬，所以唔識中文。
然後，我地就過去國際都會拎部ＤＣ去整，不過個度好大，問人先識去１８樓。之後，佢地話去灣仔食野，於是就係行去天星碼頭搭小輪。到左灣仔個頭，就見到有個無線姐姐，係度拍野。不過唔係珠珠黎既，但係之後佢竟然走過黎問訪問我地。可能我地著晒西裝，成個中環上班一族。本來以為佢會問天氣，點知佢問左一句「而家香港經濟開始復甦．．．」我地就立即彈開，超級搞笑！
跟著我地就去左一間茶餐廳食野。咁我本身就食左野，於是就拎阿雞本招職睇，然後就打左去幾間問詳情。不過，有份電話推銷員好搞笑！當留全名個陣，個女仔竟然話我已經打過一次，我當堂Ｏ晒咀，原來佢一份工登兩次廣告，超搞野。食完野之後，就去１８８同集成睇下ｄ碟價，發覺佢地賣ｄ碟好鬼平，差唔多係好景既成本價。大疑惑啊，會唔會係佢地拎貨平呢？如果佢地依個價賣，好景真係無得做嫁喎。
然後，我就搭車返屋企，係車度同肥肥人傾下我隻腳既問題，佢話可能係傷左十字韌帶。千祈唔好啊，我唔想好似Ｒ９成兩年無波踢啊。返到屋企之後就立即訓落張床，因為好耐無好好休息喇！
今日見番班同學仔都幾開心啊！遲下就黎謝師宴又可以再同佢地大玩一番喇！
再一次下雨，極度討厭！
落雨，細個果時覺得，雨愈落愈大就愈好，因為一有暴雨警告，第二日就唔洗返學。而且，又俾「落雨又有咩好怕」依個廣告感染，搞到唔覺落雨係咩既一回事。但係，人大個左就覺得落雨真係好麻煩。落雨，波又無得踢；落雨，生意又差；落雨，行街又會濕淋淋，總之，落雨就好令我討厭啦，超級唔鐘意啊！
另外，我阿媽今日好鬼妹啊！佢今朝諗著開窗吸下新鮮空氣，點知就聞到一陣腐臭味。於是佢就估樓下有死屍，咁佢就落管理處搵人幫手啦。佢仲見到樓下果家個信箱塞滿晒信，以為真係死左人，而無人知。點知，陣臭味係自己窗邊轉過黎既，原來係窗口焗左兩隻貝殼好耐，搞到滋生左班蟲仔，又有少少水咁，結果一把風吹過，就傳黎一陣既惡臭囉，真係虛驚一場！
唉～我阿媽就係一個，永遠自己一方有問題，但係就會賴係其他人有問題既無知婦人。
又一次下雨，討厭！