Author: bergkampho

Wednesday, 20 July, 2005

今日差唔多用左全日黎打番以前既日記。打長洲之旅、周年晚會同分享左一個真人真事既故事。打左好耐嫁，希望大家睇下啦！

另外，終於俾我打爆左隻炸彈大王喇！好開心啊！

仲有，依幾日好鬼死熱啊！出晒汗，好辛苦啊！

今日同大家分享番一件我俾朋友出賣既事情。

前幾個月，我一位舊同學葉志翔無啦啦打黎搵我，話想約番一班舊同學出黎聚舊。個日，我地一班舊同學見番面，傾左好多以前好多既事，真係好開心。仲約定遲下再搵番更多同學出黎玩。不過，估唔到竟然係一個騙局既開始。

過左幾個星期之後，佢就神神秘秘約我出銅鑼灣，話有份禮物送俾我。點知出到去，佢就帶我上去佢公司－亮碧思。佢話佢公司係做直銷薰香。

之後，佢再搵第二人同我傾，又話點賺錢，點好野。傾完之後又要簽一份野。我當然就唔簽啦。然後又叫第二個人個我傾，又問我將來本打算點。不斷話我聽，就算你咁咁咁，都係賺得萬幾蚊。而家就當一個做生意既機會，拎少少錢出黎，加入佢地公司就唔同，做左直銷員之後，就會賺大錢，分分鐘就會月入過十萬。話會同我一齊努力！

跟著佢地仲不斷咁介紹好多人俾我識，話佢地而家好後生，已經有好多錢，可以令佢地父母提早退休。而且仲拎本紅簿仔出黎，證明有好多錢。事實上，係公司入錢去佢地戶口黎呃人。佢地仲會話，有好人大學生，都中途放棄學位，全職做直銷。

事後，我打番俾其他舊同學，佢地都話有俾葉志翔搵過上去。如果佢真係有心想同我地講一齊搞生意，洗咩搵佢藉口約我地出黎，搞咩聚舊。

其實，依一類既直銷行業已經係香港做左好多年，但係真真正正有幾多個人賺大錢呢？當然有啦，就係個一班六親不認，見錢開眼既人囉。佢地會一直搵舊同學、親戚等等入會，總之呃得一個就一個。真係俾佢地賺到錢都背脊骨落！

我係網上、聽朋友講，就綜合左佢地幾種手法。係依度就同大家講講啦。希望大家留意。

佢地一開頭就會介紹佢地公司代理既產品。通常都係一個外國大牌子既產品。之後就會介紹產品既歷史俾你聽。等你覺得好勁咁。然後，佢就會話，唔係推銷依個產品俾你。其實係想你做直銷員。當你搵到一定既人，而佢入買夠一定一既貨，你就會回到好多佣，賺好多錢。但係，事實會唔會咁理想呢？

而且佢地成日會用「小財唔出，大財唔入」既概念黎游說你。佢地會話只係出幾千蚊，到時就會賺番好多倍。如果而家唔好好把握依個機會，就會後悔！開頭想賺大錢既你，就會覺得幾千錢只係一個少數目，同埋搵幾個人都好易姐，當買一個機會都好。於是就拎左錢黎買貨，入會。

但係，到時左機成熟既時候，佢地就會慫恿你拎多批幾萬銀既錢出黎升級做甚麼甚麼職位。結果，就會令到你番唔到身，要一直做落去，不斷搵人。就算你話無錢，佢地就會搵好多人同你講，不停咁游說你，叫你去問親戚、銀行、財務公司借錢。當然，而家清醒既你就會話唔會姐。但係到時，佢地既人海戰術就會令你迷迷糊糊咁出左一個舊錢。

仲有，佢地臨走既時侯就會叫你千祈唔好講俾其他人聽，話你未夠了解，會解釋錯誤。其實，如果間公司係光明正大，就唔會怕俾人知。如果唔係呃人，就會唔有咁多負面新聞報導。

而且，佢地會好有耐性。見你唔做會員，就會建議你買一千幾百蚊既貨試下。如果覺得唔好，仲可以九折退還。而當你用完之後，覺得唔好既時侯，想去退錢既話。佢地就會話你拆開過貨，無得退。試問，唔試又點知好唔好，根本佢地就係有心呃番你一筆。

總之，世間上真係無咁易賺到咁多錢。大家都係努力讀書，豐富自己既智識，搵一份腳踏實力既工作啦。希望大家唔好中依一類既直銷陷阱，就算搵自己呃左上去，都要意志堅定，死都唔好拎錢出黎！

朋友，我而家相信，真係要黎出賣嫁．．．

今日去左香工七十周年慶祝晚會。遇番好多以前５Ｅ班舊同學仔，大家都變左好多。不過分隔左幾年，我地既感情仍然無變。

整體黎講，今次個晚會都算搞得唔錯。最鐘意就係個話劇《情繫香工七十載》，劇中既主角亦都講出唔少慈幼仔既心聲－慈幼妺

其次，個音樂劇都唔錯，班義工做得好好，而且孫老師條靚又成日爆肚，好鬼搞笑。而果個搞擊樂表演都幾有創意。不過，最虧就係果個「超級無敵班主任」就廢到爆，真係好反映現實。好彩有張浩堅玩下。

最後，個當年情，播電子小強既舊相既時候，竟然出我地５Ｅ班張班相，真係有少少意外。

p.s.依排掛住搞部電腦，無咩時間打好既Xanga，搞到人流下跌。所以為左補償，我已經更新左長洲之旅既日記，希望大家睇睇啦。

另外，依排聽番開謝安琪既歌，就愈聽就愈覺得同歌詞既內容好有共鳴。所以黎緊幾日，都會分享一下咁有意思既歌詞。

我覺得以下首歌既歌詞幾有意思，所以想同十家分享一下。

《姿色份子》 謝安琪

為何面容淨白兼緊緻，瘦削蛋臉，便算合時？
手臂只有少許的鬆弛，已太丟臉，活著沒有意思？
神奇保濕的忌廉，能完全鎖緊水份去粉刺
更有那彩光修護店，人在世，無下次，全部要一試！

不可思異，個個變姿色份子，美態等於尊嚴
纖體主義，擴散了整個城市，如同疫症感染

終於，貝特馬莉亞麗塔艾美或翠斯
每個相貌也極似，全沒個性與自我的標誌，倒模天使

若求令男士目光轉移，強作嬌艷，實太便宜
跟四周女子互相比試，鬥美爭艷，實在沒有意思

試試想得真實點 ，誰能搖身一變成模特兒？
各有各本身的特點，肥或瘦，圓或幼，無謂太刻意 

尋晚不停睇左好多個小寶Live.Show，覺得小寶唱功真係好勁，而家跳舞超強！《GirlsOnTop》依首歌愈黎愈鐘意。雖然第一次聽就覺得麻麻地。但係加埋個套舞步，立即變得好有爆炸力！好鐘意啊！

今日，我就同一班親友去左長洲踩單車。我地去到碼頭先發現仲有一個鐘頭先有慢船。於是就玩二十四消磨時間。

二十四好好玩，所以好快就到開船既時間，而嘉嘉佢地又剛剛到。於是就一齊上船。上到船之後，因為維港兩岸既景氣太迷人喇，所以我不停咁影相，差唔多有成廿幅。跟著，玩左一陣鋤ｄｅｅ同吹下水。大約到二點半就去到長洲。

我地例牌先去英皇飲凍橙檸，然後再租單車。今次我揀左部新車黎踩，連紙皮都無拆，成格裝甲車咁，好鬼型！踩緊既時候，塊紙皮會仲摩擦到個車轆而發出一連串既摩打聲，個感覺就好似踩緊電單車咁，好爽！

之後，我地踩番去以前屠房個條大斜路。不過可能人大過左，覺得條斜路無以前細個踩既時間咁斜。跟著，我地再踩去長貴村個邊果個海旁。好記得係海旁之前果一個死亡急彎。

長貴村依邊個沙灘雖然好細，但係海水因陽光照耀而閃閃生輝既畫面就好靚。就好似一粒一粒珍珠浮起水面一樣，好迷人。

踩完張保仔洞之後，我地就踩去東堤海灘。個度好多人啊！

去到盡頭之後，我地就休息一下。回程個時，見到條四十五度大斜路。

我地係依條斜路都玩左好耐。差唔多到六點半就踩去交車。

然後，我地就去大排檔食海鮮。一邊食，一邊睇《星期日檔案》。今集講ＬＯＬＩＴＡ。雖然我覺得佢地著得怪怪地，不過既然佢地著左之後咁開心，都無話咩歧視佢地既。反而幾欣賞佢地，因為佢地幾有自己既風格。自己鐘意點就點，唔洗理人地點睇。

食完晚飯之後，我地就係Ｍ記幫嘉嘉開一個神祕生日會。最搞笑就係，周圍有班唔識既人都同我地一齊唱生日歌，好有氣氛。

然後吹左一陣水，行左一陣海灘之後，我地就開始上船。

本來以為大家玩左成日，依一程船應該會平平淡淡過度。不過一隻小強既出現，就為依一個回程帶黎左一番生氣。

當時，我姨丈同妹子進都已經訓著左。

點知突然有一隻小強係船頂出現。不過最驚既唔係佢地兩個，反而係嘉嘉。以前都提及過，佢係一個極度害怕小強既人。當佢一發現隻小強之後，就立即大叫！

但係隻小強無理佢，繼續前進，一直行到一個窿仔裡面。由於個窿係另一班乘客上面，於是就有個男人係度引隻小強出黎，費時隻小強突然跳落頭。但係佢搞左一大輪野，又風扇，又電筒。隻小強都肯唔出黎。

點知唔理佢既時間，隻小強就突然飛左出黎，仲飛去個男人隻腳附近。嚇到成艙人都縮起隻腳。個男人連忙踩死隻小強。不過，小強既迴避率超高，左閃右閃。眨下眼就唔知去左邊。

但係依個大家都尋求緊小強既時間，我阿爸無啦啦走張紙巾去嘉嘉度，嚇到佢成個彈起，好鬼搞野。真係估唔到依隻小強，竟然可以帶俾我地咁無歡樂。

如果大家想睇更多既相，可以去依度↓
http://www.wretch.cc/album/album.php?id=Bergkampho&book=9

p.s.因為太多字，又無咩時間，所以用左九方

今日係屋企清左好多高考之前下載既電影。而家部電腦有好多吉位。遲下出灣仔買埋一疊ＤＶＤＲ，再燒埋一堆舊片。咁ｈｄｄ洗底行動就可以完滿結束！

另外，阿仙奴今屆既收購真係百思不得其解。賣左韋拉之後，而家亨利又話要走。好心想拎歐聯就大肆擴軍，唔好買咁多有潛質既新人，拿拿聲整幾個球星開心下先啦！

仲有，而家小寶隻Ｌｉｖｅ　ｔｏｕｒ超貴啊！簡直係搶錢啊！！睇黎都要做幾日蠟燭賺下錢喇！

p.s.打倉頡真係打到我手痺…真係懷念九方既威力！

3000人了 \(^0^)/ ～ 真係一個值得紀念既日子！

其實之前一千同二千都想慶祝下。不過，因為唔記得左，所以無搞到。雖然三千人唔算多人，但係對我黎講已經係一個唔錯既數字。

希望未來既日子，依個ｘａｎｇａ會愈黎愈多人參觀，更多既朋友仔會黎留言。而我亦會整靚個網，吸引更多來自不同世界朋友既探訪。

最好的尚未來臨‧‧‧以為買左部新機會好開心，可以解決一切問題，但係新既問題又接種而來。

另外，我而家已經無再裝番九方，決心要好妤練習倉頡！可能打日記內容會少左，不過，相信不久既將來就會回復番以前既水準。而家唯有貼多幾張圖補數啦！

希望新既一週，一切會更好啦！

今日終於都買左部新機，但係好多野搞啊！另外，轉左條ＶＧＡ線，而家個ｍｏｎ冇再一間間喇！

今日本來想去砌機，不過多多唔得閒，所以又要對住部死人電腦！到左下晝，妹子進就打黎叫我去佢屋企整電腦。

去到之後就開始裝ｘｐ，一路裝就一路睇《娃鬼回魂３》。套戲都唔錯，恐怖得黎又有少少搞鬼。但係，係妹子進屋企就好似入左我自己部電腦機箱一樣，超級熱啊！

過左一陣，佢部機又有問題，於是再裝過ｘｐ。之後一路裝就一路睇《自從他來了》，套戲又係唔錯，幾有教育意義。不過收音超差，班演員講野勁難聽到。一路睇，發覺原來套戲都幾多而家有名既藝人拍。

唉～依排好似做咩都唔提起勁。鬼咩，日日見住部廢機，真係無晒心機。希望聽日有一個新既開始啦！