Author: bergkampho

今日遇到好多蠻不講理、無理取鬧既人，我只可以用忍耐同無奈去面對。

由於太過唔暢快，於是就搵左我既好朋友仔【足球三號】黎舒解沉氣。可惜，我隻左腳既【十字幫】作反。可能要等一段時間先可以平息依場分爭．．．

p.s.今次係用左倉頡黎打日記＝.＝V

貶下眼，咁快就到七月尾。今個月真係經歷左好多好多事．．．

今日睇番以前寫過既日記。發現到自已有一個到而家仲未改善得好既壞習慣，就係三思而不行。成日滿腦子都有好多計劃，但係永遠都唔會真真正正去實行。而且，仲成日搵其他藉口幫自己辯駁。

講番今個七月，真係好難忘，經歷左我人生另一個轉淚點。不過，我仍然無後悔揀依條路去走，只係後悔自己唔去走依條路。

係舊同學的騙局中，覺得人真係可以為左錢而不擇手段。佢地往往捉著人既貪婪、無知，而令到人嵌入佢地既圈套、令到人迷失自我，不能自拔。

可惜，人始於都係有貪念，始終都有一個底價。如果換轉係我，我都可能會為左金錢而出賣自己。不過，好彩我有一班好好既親朋戚友係我失落既時候鼓勵我、支持我。以免我走入歪路，行差踏錯。

而今個月尾，長洲之旅、香工晚宴、熱血足球、吹氣Mary等等，都令感覺到開心同喜悅。能夠同一班朋友仔聚首一堂，開懷大笑，真係人生一大樂事！

而家距離開學只係剩番一個月，應該要開始過番理想既生活。之前有好多事都放低左，希望依個八月可以完成番我暑期前定立既目標啦！

p.s.今個七月，係第一次可以日日都有打日記，值得紀念！

由於尋晚同朋友傾偈，講左好多版聚既經歷。於是今日就分享一下，上年我同壇主既北上尋寶之旅啦！（內容頗長）

零四年三月廿八日，韓國小天后會係深圳羅湖體育館進行既「百事風雲榜頒獎禮」做頒獎嘉賓。於是，我同壇主準備好一切，就係大圍火車站出發，展開今次北上既序幕。

今次行動主要目的，就係體育館場外，見一見小寶真人。如果有幸買到飛入場，睇到小寶勁歌熱舞，真係畢生難忘。

去到羅湖，我地就搵下地圖，問下人，睇下深圳邊度有體育館。經過一輪探索之後，有個同胞話只要搭ＸＸ號巴士，去體育館站就可以去到。於是我地就去搭車喇。

到左館場外面，出奇地平靜。又無歌迷等候，又無廣告版。於是我地就繞場一周。發覺四周圍都閂晒門，只係中間個足球場有少少燈散出黎。

咁我地就以為佢地係裡面彩排，唔俾人入去。於是就去附近既食館食野，等到頒獎禮開始既時候再去過。

大約都到七點左右，天色開始昏暗。我地就再去場館一次。體育館周圍仍然係水靜河飛，完全無頒獎禮既氣氛。心諗：堂堂韓國巨星到訪，點會一粒記者採訪都無呢？我地就開始懷疑係未去錯地方。

跟著，壇主又用一番佢流利既北京話問人。經過個保安人員既話，我地就知這，我地犯左一個重大既錯誤！

原來我地去果個係深圳體育館，而領獎禮真正舉行既地點係深圳羅湖體育館！真係Ｏ晒咀！之後，我地立即飛出租車去羅湖體育館。

去到場館外面，簡直同頭先個度判若兩地！依度好熱鬧，四周都好有多人圍住個場館。街邊又有人賣望遠鏡、螢光棒等等。我地見到咁既場面，先恍然大悟！

我地發現周圍好多人賣黃牛飛。我地一場黎到，無理由錯失依個一睹小寶真人騷既機會。於是我地就買左一生人中第一張黃牛飛入場去見小寶。不過，我地國內同胞既可信情度大家都知啦，我地買左飛之後都好擔心張飛會唔會假既。

但係，我地入到場館之後，就再無顧慮。

雖然裡面都唔算好大，但係參加咁樣既頒獎禮都係第一次。個度有好多歌迷係度大叫，又有好多支射燈閃黎閃去。個感覺就好似係置身於紅館睇緊演唱會一樣。

八點正，「第四屆百事風雲榜頒獎禮」正式開始。我同壇主熱切期待著小寶既出現。過左無幾耐，個主持就介紹下一個頒獎嘉賓。佢話個位係一位韓國人，當佢出現既時候，就會令不少歌迷既熱血沸騰，甚至瘋狂尖叫、儀態失常！

當時我既心情又緊張又興奮。萬切期待既小寶要出現喇！係一連串既音響、燈光、煙霧效果之下，終於都有一個人形物體出現喇！哇！小寶竟然變左男人啊！睇真少少，原來果個男人係Kangta。興奮情度立即直線下滑．．．

跟著就有幾個歌手上台拎獎。係咁多個之中，只係識得張敬軒同五月天。本來仲有周杰倫，不過佢唔得閒黎，只係見到佢個位經理人。

等左好耐，個主持終於都介紹另一位韓國歌手喇！又係一輪特效後，紅遍日、韓兩地，韓國小天后寶兒出場喇！點知，又係見到一個男人！睇真少少，原來係小寶同ＳＭ經理人一齊行出黎。

好興奮啊！終於都俾我見到小寶真人！人如其名，小寶真係好細粒。佢著得好斯文，又怕怕羞羞咁，好鬼可愛啊！不時又向我地班歌迷揮下手，微微笑，真係好正啊！

當時我只係掛住望小寶，一句聲都無出到。其實係心中已經產生出數十句讚美既說話，但係一時間唔知點表達出黎。而壇主就俾我較為冷靜，立即衝左前面去影相。

然後，小寶頒完個唔知咩獎就離開左舞台。

不過，我地既熱情仲未冷卻。因為等待著小寶勁歌熱舞既心情再一次燃燒起黎。

可惜，時間可以沖淡一切。我地等到十點幾都未見到小寶出黎表演，又驚返唔切香港，所以決定提早離場。係回程期間，我不停回想當時既情形，個感覺仍然係記憶猶新。

可是天意弄人，返到屋企發現，小寶係最後唱左兩首歌！真係大驚訝！原來小寶玩壓軸，唱左Valenti同No.1。超唔抵啊！！

雖然今次行動總算達到目的，但係睇唔到小寶勁歌熱舞真係一大遺憾。唉～而家唯有係睇圖寄意，幻想自己有睇到啦．．．

好沉悶既一日，全日對住部電腦發呆。萬無目的咁上網、打機，覺得好頹廢。

尋晚同妹子佢地打ＡＯＣ，之後就睇片。結果差唔多四點幾先訓。一朝早九點，多多就打黎搵我。傾左一陣，見幾精神就起左身。

一朝早起身，就下載番尋晚場波黎睇。不過，得一粒種子，所以下載得超慢。之後，一路打機一路等，等等下見眼訓，就訓鬼左。

訓醒之後，場波就下載完畢。於是就開始阿積士四國賽。但係，場波同我今日既生活都差唔多，好悶。 唔算太多攻勢，無咩野睇。

跟著又繼續打ＡＯＣ。今次單挑韓國，但係佢八分鐘升城，十五分鐘升帝，低能嫁！然後，成隊馬戰車、巨投加騎士沖埋黎，俾佢打爆左個機地。

好彩，ＡＩ此終係ＡＩ，我派左五部卜卜車衝過去，就ＫＯ左佢個中心。但係佢有好多火炮塔同城堡，而且又打游擊戰。足足打左成一粒幾鐘先搞掂佢。

唉～唔想再過咁樣既日子啊！好～計劃一下聽日既行程先！

08:00-10:00　踢波
12:00-14:00　影像閱讀
15:00-17:00　溫贏
17:00-19:00　睇演唱會
21:00-00:00　自由活動

p.s.好懶啊！成日用九方打日記！

今日全日都係屋企，睇左幾段影片，豐富左我既人生。最有共鳴就係依一句「時間，可以顯露一切」。

係咁多段片中，【時移世易】最為深刻。係片中，我感受到「時間」同「大自然」既威力真係非常巨大。係時空慢遊當中，我認識左好多世界奇觀既誕生。例如：酷熱無比既撒哈拉沙漠，係幾萬年前竟然係一個汪洋大海；中國既珠峰，其實係由印度既衝力迫壓而成。

諗起時間，我就會諗起旦旦想發明既時光機。自從到左二字頭開始，就成日想返番以前。因為發現到，原來自己做錯左好多令自己後悔既事。如果真係可以時光倒流，但係又有番現在既記憶，真係幾正！

自從上個月既連環豪雨之後，好耐都無見過濕潤既地面。到夜晚，我發現出面落緊微微雨。於是，就搵番幾個月前既【現在，很想見你】出黎睇。

世間上有好多事都好奇怪，就好似劇中既兩夫婦。雖然澪已經係廿八歲病死，但係為左一個雨季後既承諾。二十歲既澪竟然可以穿梭時空，去到未來，再次與廿九歲既巧談戀愛，真係玄妙。

如果我都可以掌握通往時光隧道既鎖匙就好喇！

一連四日既急救班，經過一連串既模擬個案實習後，終於都曲中人散。而且，經阿sir口中得知，原來吹氣Mary曾經發生過一段可歌可泣既愛情故事。

話說係好耐之前，有一個醫生研究出一種可以令心臟停頓既人可以再次回復心跳既方法，即CPR。

有一日，佢同一班學員途徑法國一條小河邊，發現有一位少女為情自殺，投河自盡。於是，該名醫生就立即替依位少女進行CPR。可惜，當時依一套急救方法仲未成熟，而且個位少女亦都窒息過量，結果還魂乏術。

個位醫生深感懊悔。於是佢就立定決定，要張依一套急救術宣揚出去，普渡世人。其後，佢就依照個位16歲法藉少女－Anne，倒模出一個１：１既人型塑膠公仔作為日後既CPR練習。

自始之後，CPR就成為急救之中最重要既救人方法，而吹氣Mary既真名就係Resusci Anne。

阿sir講完故仔之後，我地就不停做練習，足足做左七個鐘。而家心肺復甦法就做得不錯。不過，我包紮個道就仲係未夠純熟。

雖然依班同學只係識左五日，不過已經好熟落，成日有講有笑。過左今日之後，我地要過多兩個星期先會再見，而且到時就係急救考試。希望依兩個星期可以準備充足，到時係技術訓練再見到成班同學仔啦！

p.s.估唔到一篇情深一吻加一幅頭像相出左街之後，立即多左成一倍人黎我Xanga。原來大家係咁現實既．．．

今日上堂真係又驚又喜。因為我要獻出我深情一吻俾一位小姐。心情真係好緊張，到而家都未平伏好。

上半晝阿ｓｉｒ主要都係講理論同重點溫習。不過，食完晏之後，緊張又好玩既事情就接種而來。

我返到班房，就發現中間多左一位少女訓左係地下。原來今堂我地學人工呼吸同心外壓，簡稱ＣＰＲ。

阿ｓｉｒ做左幾次ＣＰＲ示範，仲教我地講左幾句台詞。雖然依幾段台詞好普通正常，但係係咁多人面前講，真係覺得好鬼好笑。

之後，我地就續一出去實習。可能我地第一次做，所以大家都好緊張。不過到德仔實習就好搞笑。佢張段台詞講到亂鬼晒。人地要講「現場環境安全」，佢就講「現實環境好好」。人地明明係小姐黎，佢又叫先生。程序又唔記得，搞到亂晒弄，好搞鬼。不過，總算緩和一下班房緊張既氣氛。

其實，唔單只係實習既同學緊張，係旁邊等候實習既同學心跳都同時不斷加快。過左一陣，終於都到我做ＣＰＲ喇。

首先，我就檢查個位小姐既呼吸、脈搏同循環徵象。然後就開始一生人裡面，第一次既人工呼吸。我一口一口鮮氣通過佢小小既咀巴吹向佢既肺部之中，恍惚我地就係空氣之間互相融合。

之後，我將中指放係佢既腰間，然後慢慢推上胸骨，再用手掌加壓胸部。我一下一下既心外壓，就好似我既心跳一樣，一下一下咁上下跳動。個種感覺真係畢生難忘。

現在，那冰冷但柔軟的肌膚，櫻桃小咀所散發出來的氣味仍然在我腦海中徘徊。

吹氣Ｍａｒｙ，我永遠都不會忘記我們今天所發生的事情。

p.s.終於都轉左版，不過只係初步階段。

今日又遲左起身，不過就無遲到。但係有好多同學就俾譚姑娘屈做遲到。不過，佢地係下晝明明遲到，又簽番準時黎補償。

今堂又係理論加實踐。做包骨折既實習個時最好玩，班同學仔又玩得愈黎愈熟。不過我地仍然係亂咁黎，包到錯晒。

唔知點解，我自己綁平結就可以除得出黎，但係一綁落其他人既時候就拆極都拆唔開，真係搞鬼。

之後，我地又做下模擬考試實習，但係個個都唔係咁熟。包傷口既先後次序都亂鬼晒。睇黎都要搵阿爸黎練習下先。

p.s.本來依幾想轉個充滿陽光氣息既xanga，不過無咩時間，所以都係遲下先搞啦！

好波獻給你

(暫停播放)

今日係急救班既第一堂。開頭講理論都好有心機聽，不過到最尾就太過眼訓，所以無咁專心。但係教包紮個時就好好玩！

我今朝遲左起身，好彩緊緊九點半去到。但係佢竟然話我遲到，張通告明明係寫九點半！點知係開學禮派個張日期卡個時間先係正確。不過，我之前睇時既時候都係寫九點半，但係睇清楚，原來係９：３０個３度，有一個好輕微既鉛筆痕，之後再補番一個零，真係吹到！

今堂講左好多急救既要點，不過好多情況都係唔好搞個患處，然後盡快送去醫院。

最記得個阿ｓｉｒ講述一件佢見過最恐怖既事情。當時有一個香港人係深圳發生左交通意外，搞到滿面玻璃碎片。而且仲內出血，有多處骨折。

但係佢既家人要求拎佢番香港救。於是部大陸救護車就送佢去黃岡。當阿ｓｉｒ接佢過香港北區醫既時候，個傷者竟然噴血。就好似噴泉咁，噴到成個天花板都係血，好恐怖！

佢仲講，大陸既醫院要你有錢先會救你，上救護車又俾錢先，幫你輸血又要俾錢先，超級呃錢。之後，阿ｓｉｒ就講番書。不過來來去去又係個幾招ＤＲＡＢＣ。

今日上左成六個鐘堂，個感覺好似返番名師爆鐘咁。個阿ｓｉｒ講野都幾風趣，而且包紮個時，我地個個都包到不倫不類，好鬼搞笑。

聽日又再上過堂，就教骨折包紮。應該會仲好玩～