尋晚同好多人傾偈，大家討論下將來既出路。有幾個同學仔就話會重讀，不過，我就都係繼續副學士喇！其實有原因既．．．
第一，我討厭左不斷做試題，不斷塞知識入腦既生活。自從經歷左依個高考之後，我真係頂唔順中學既生活。好唔鐘意迫自己做唔鐘意既事。聽到好多人講佢地重讀成功既例子之後，我就更加唔想重讀。因為，如果要我日日對著試卷，眼中只有高考，我真係會死。
而且，受既壓力會俾以前加倍，用既精神亦都會比以前倍增。自問我就唔受唔住喇！況且，我覺得自己唔會有咁強勁既恆心同毅力去溫書。因為世間上，實在太多誘惑喇！
第二，我想轉一轉環境，感覺一下準大學既生活。中學刻板既生活，加上無聊既上堂氣氛，對我黎講實在唔好受。相反，大學既自由度比較高，比較自立，注重培養獨立思考能力。而且用學分制，就算其中一個細科學得唔好，其他科都可以拉番到，唔使一試定生死。加上，又可以識多班朋友，擴闊自己既視野。
況且，工程系又唔係自己鐘意既科目，既然自己又覺得金融幾好。不妨就行下依一條路囉。不過，成唔成功都好講個人問題既，每個人都有佢地既特質。但係我相信，如果有心去做每一件事，總有一日會成功既！
今日同大家匯報下JUPAS戰況啦！今朝十點俾一個電話嘈醒左，但係我仲沉醉於係個夢境之中。成個係迷迷糊糊，連今日係星期幾都唔記得。之後，阿媽就叫我睇放榜結果，我先有少少如夢初醒既感覺。
跟著就睇下個電腦，發現成班同學仔已經開始MSN討論。於是我就去JUPAS個網睇下。搵左幾次，都係無我個號碼。即係無HD讀。咁就照番原定計劃，讀City AD。
報告完畢
另外，聽日就會考放榜。各位考生準備好未呢？有冇預計過自己既成績呢？如果考得低分就點，高分又點呢？如果英文或中文唔合格又點呢？如果唔夠分升原校又點呢？
心裡面係未有好多疑惑呢？問下你身邊既長輩朋友啦！或者自己上網睇下資料。相信你地既疑團會好快打開。
仲有，你地影印左身份証、成績表、獎狀、證書等等既文件未呢？未就快手去做喇！唔係聽日就手忘腳亂嫁喇。
如果你係咩都搞掂晒既話，就恭喜你喇！因為你而家可以去打舖機，出下街，或者做自己鐘意做既事。總之就輕輕鬆鬆度過今日啦！
後記：
唉～見到其他人會考咁高分，又讀到心怡既大學，真係有少少感觸。好唔甘心點解自己以前係咁。見到其他人成功，再睇番自己既失敗，真係非常後悔以前所用既每一件事。
雖然，我唔鐘意依個學歷社會，不過我都要接受依個現實。有學歷、有錢就會俾人重視。如果無，就只會俾人睇死！我好明白咩叫一沉百踩！如果唔想被人踩，就要踩人地。以前會覺得咁樣做好無良心，但係大左之後發覺。如果你唔咁做，只會一直被人踩落去。到人地成功既時候唔會多謝你，到頭來蝕底果個始終係自己！
人不為己，天誅地滅 
依排大家係未見唔到我上網呢。其實我去左打「波斯王子」同睇「贏」。由於就快會有好多事發生，之後既八月就會有好多野做，而唔得閒做自己野。所以就診依一兩日打飽機、睇既贏。然後就開始我既大計！
聯招、會考放榜、入學登記、學日文文法、睇好多贏、考急救、溫贏、職輔、健身．．．
講番波斯王子，依隻Ｇａｍｅ真係超好玩，又夠難度，畫面又靚。個王子超強勁，又靈活又敏捷，好似識個輕功一樣，飛簷走壁，而且仲識得時光倒流。不過，班怪物仲屈機，殺死一隻又出第二隻，又識得空間轉換，攻擊力又強。
但係最難玩都係有時間限制，要係一定既時間走過好多機關。而家去到一個山洞，全部野都好易爛，行兩行就跌落街，有時仲有一大班蝙蝠黎咬人。
不過，隻Ｇａｍｅ最好既地方就係ｓａｖｅ點多，同埋死左都唔會返到好遠，所以可以不斷嘗試。加上可以多角度觀察環境，而且有時都幾考智慧、同技巧，所以真係好好玩！
今日同一班舊同學去淺水灣游水。記番上一次去沙灘游水已經係三、四年前既事。因為個時見到其他同學仔都高過我，於是逢星期六我就同爸爸一齊去游水，希望可以增高。哈哈～今日見番班同學，終於都高番個佢地喇！
大約兩點半左右，我地就登陸到淺水灣。不過，個沙灘超級熱啊，簡直好似煎鍋一樣，我隻腳差唔多煎到七成熟，就食得喇！好彩，救生員問左佢班同事借左把太陽傘。唔係就個個都變晒乾燒牛扒。
本來意為地面咁熱，海水應該會幾暖。點知係凍到死，又鹹又污濁，仲有好多浮游物體。但係，海水同泳池水真係兩回事，海水超級浮！差唔多唔洗用力已經可以浮起，輕輕鬆鬆就可以游出浮台。以前細個覺得游出浮台係一種夢魅以求既樂事。但係，而家幾分鐘就游到出去，真係唔覺有咩難度，而且上到游台，咩野都無，都唔知點解細個咁鐘意上。
然後，我地就游返去沙灘。我地沙灘蓆旁邊有一班人係度打排球，仲有兩個靚女姐姐添。見到佢地玩得咁開心，於是救生員又借左個小型籃球黎玩。跟著，我地就出海玩飛波遊戲。阿june同師奶好可憐，成個俾人飛中。但係，我地成日飛錯其他人，好搞笑。
之後，我地又返番上岸。然後就同阿達、志豪、阿豐踢波。不過，係粗沙上面踢波真係好方辛苦，沙面又熱又「吉」腳。於是玩左一陣就唔玩，然後轉玩堆沙堆。師奶俾我地堆埋左，唔郁得，哈哈！
再過多一陣，游多一次出浮台，我地就去沖身去食晚飯。
搭果部７３好鬼過癮，好似搭緊過山車一樣。山區又多彎路，部車左飛右飛，成個人都俾佢蹬起。出到香港仔，我地就去綠野食飯，然後就返屋企喇。
今日曬左成日，個頭而家赤赤地。而且，隻左腳膝頭超級痛！睇黎真係要忍耐下，唔好再出去玩劇烈運動喇！
p.s.終於都唔洗拎邪盾喇！距離聯賽冠軍踏出左一大步！
終於都睇左小寶個演唱會。感覺一流！雖然紮頭加熱褲簡直係惡夢，不過有小寶甜美既笑容同歌聲。總括黎講，依個演唱會係讚既！
由於今次熱褲個做型真係麻麻，所以開頭睇都無寄予咁大期望。不過，一開波既舞台佈景已經令我改觀。七彩繽紛既舞台，閃閃生輝既射燈，仲有一支支粉紅色既螢光棒，組合成一幅令人難以遺忘既圖畫。
咁多個心愛演出之中，我最深刻就係L&H同Jewel Song既演出。小寶以一條白色長裙出現，加上可愛既髮型，真係令我心動。
另外，Be the one同 Merikuri 既演出亦都好鐘意。小寶係前者既強勁舞蹈，加上首歌澎湃既節奏，合演出一場精采既表演。如歌名一樣，要向全世界講出，小寶要成為亞洲第一，再而推向世界！後者係一首慢歌，小寶既深情演唱，與及動人旋律，亦同樣令我讚歎非常。
今次除左做型之外，其他都係非常精采。特別讚賞就係一連串既電腦燈光特效。小寶今次亦都好成熟，更加有少女氣質。
最後，小寶由頭到尾甜美既笑容，真係畢生難忘。我發誓一定要參加一次小寶既演唱會！
今日，我又一次硬膠膠地過日子。一朝早起身，呆呆滯滯咁上網，死死板板咁睇一次個幾個網頁。之後去新聞組，睇下有咩新事物，然後就打機。見打到悶就會同人玩MSN。跟著就訓個晏覺，醒左之後就食飯。食完之後，就睇電視同上網，又係上番一朝頭早上過既網頁，睇下有冇咩特別更新。然後就睇日劇，如果睇晒就打機。打到眼訓就去訓。一日既光陰就係咁樣度過。依個狀況，足足維持左一個星期。
我好清楚如果我再係咁繼續落去，我見到我既將來只會係一片漆黑。因為我到而家仲係講得出，做不到。其實良心一直都責備自己，一直叫自己唔好再係咁。不過，永遠都係過左一陣之後，就當無左依一回事，繼續咁過日子。
究竟點樣先可以有衝勁，積積極極咁去做計劃好既事呢？係未真係要去到最後關頭先會去努力、先會動手去做呢？係未真係要撞過板先識得痛，失敗左先識得後悔呢？係未真係要有奚落你、睇死你先會燃點鬥志呢？
其實講多無為，行動最實際！
可惜，我永遠都係講完要做咩，就當左自己真係有做到。就好似前幾日，口口聲聲話要點要點，但係結果都係無做。
究竟我欠缺左邊一種元素黎推動我呢？
我好明白，我要點樣做先會成功。但係，我唔明白，點解我唔會去咁樣做。有時真係好希望有一個人可以監督我、管束我、鞭撻我。而且，更想依個人可以點醒我，甚至蹊落我、鬧醒我！只有係咁，我先會唔甘心被人睇死，發奮向上！可惜，依一個人未曾出現過。
我真係好羨慕其他人，特別係小寶。我真係好想知點解佢可以咁努力。我真係唔想硬膠膠地過日子．．．
新既球季就快開鑼，又可以睇番阿仙奴水銀瀉地既攻勢。不過，一諗起金爺係最後既一季，就有少少可惜。真係真係好希望可以親眼睇到金爺踢一場波！但係，依個機會實在太過渺茫喇。
唯有張依首歌，獻給我心愛既冰王子．．．
p.s.唉～人流升人留減．．．
前晚係【電車男】，今晚就係【龍櫻】。依套係雖然唔算搞笑，但係提材就好有意義。
【龍櫻】，係講述一位窮律師，為左揚名立萬。決定將一張間山雞學校「龍山高中」既學生考入日本首一屈指「東京大學」既大學生。雖然，佢不滿依個東大畢業生就係社會既中心既現實，但係佢都要接受依個就係學歷社會既法則。
如果唔想做弱者，被一切守則約束住，就要改變自己，成為一個聰明人，自己去創立法則！於是佢就成立特別進修班，決定訓練出五位龍山高中既同學成為東大既大學生！
【知道怎麼才能令自己變得強大嗎？首先，要明白自己有多麼渺小】by 櫻木健二
一連睇左四集之後，自己都好後悔浪費左十年既青春。最後有咁既結果，自己都心裡有數，努力唔努力自己都知。如果只係努力左一兩年就會成功，咁人地點解要付出十年既時間黎學習呢？
有樣野，我覺得櫻木老師講得好好。考試只有合格同唔合格，話有努力冇努力係無意義既。結果都已經定左，無得返轉頭。不過，只要有唔甘心安於現狀、力求改變自己既心，知道自己失敗既原因，此於會等到櫻花盛放既一日嫁！
仲有幾日就會考放榜喇，希望有努力過既朋友仔會拎到預期高既分數啦！不過，失敗左都唔緊要嫁！最緊要係唔好頹廢啊！望下你地既後面，有好多人默默支持你地嫁！ 
自從尋晚連續追【電車男】三集，今日我又變番做夜遊人喇。
成日見到陽光，就好想出去玩。可惜，自己又力不從心，搞到日日朝早都渾渾噩噩咁過。而且我又愈夜愈精神，所以都係唔好迫自己早睡早起。
唔知係訓得唔夠，成個下個晝都頭痛。之後，就再睇左【龍櫻】第一集，套戲都唔錯既。不過，就無好似【電車男】咁，好好好想追落去既感覺。
然後，本來一個好寧靜既夜晚，但係俾一個極度主觀、偏激既人破壞晒氣氛。
唉～主觀既人真係愈黎愈令人討厭！佢地永遠已自己係長輩既身份而命令人地要接受佢既個人意見、睇法、思想，覺得自己係絕對、唔會有錯！而且又唔肯接受其他人既意見、唔聽人地解釋！一聽到同自己對立或者唔同意既聲音，就立即否決，再講一連串毫無邏輯既說話！只有論點，毫無論證，跟本就無說服力！往往似住自己有少少權力，就威迫人地要服從佢！完全無考慮過人地既感受！成日話自己點付出，點偉大！但係成日要求人地做依樣，做個樣！為少少事就耿耿於懷，無理取鬥，小氣到爆！
究竟點先可以改變依個狀況？係未無奈真係可以解決問題呢？
尋晚忍唔住要睇埋【電車男】既第二集、第三集，真係愈睇愈正！
一路睇就一路代入角色，愈黎愈緊張、興奮，甚至心跳加速。覺得自己就好似電車男其中一個網友，好期待佢既報告，好想知道之後佢會同青山小姐發展成點。當佢成功既時候，會替佢開心，恭喜佢；當佢失落既時候，會感到悲哀，會勉勵佢。
見到電車男開始改變自己逃避問題既性格，成熟起黎，變得主動、積極、大膽，真係有少少感動。
雖然，電車男係現實生活中好可憐，但係一去到網絡世界裡面，佢就有好多網友支持佢、鼓勵佢。感覺到自己同佢都有幾分相似，可能因為咁，所以先可以產生共鳴啦！
電車男！向下一站前進吧！
今日再睇埋第四集，覺得依套戲除左搞笑之外，仲有少少感動位。愈睇愈鐘意啊！
