Author: bergkampho

想跳得高時，總要深深地蹲一次來取得彈力。那就會成為強勁的彈簧。這些孩子想要上升時也一樣的，以一次下落，來產生強大的回彈力！

每次睇完【龍櫻】都會有一番新既體會，希望我都可以從跌低既衝力中得到強勁既反彈力！

尋晚幫六姨打字，開頭本來用倉頡＋速成，不過最後都係放棄而轉用九方！結果顯示我既決定係明智既！打字速度倍增，兩個鐘頭左右就搞掂。經過依個經歷，我深深感受到九方既無比威力！

打完字之後就去食宵夜，然後順便去埋六姨屋企訓覺。

可能係訓唔慣，今朝好早就起左身。由於舅父去左旅行，間屋得番佢個工人﹙阿施﹚同兩隻狗狗（Sam & Coco），於是我就同肥鍵一家上去看住佢地，不過其實係上去黐飯食！

一上到舅父屋企，佢兩隻狗就係咁吠，超級嘈！最唔聽話就係Coco，俾佢聞左手手都要繼續吠。不過，佢地一見我地開飯就立即靜晒，仲爬上黎搖搖尾巴，好鬼得意。

之後就感受下舅父既家庭影院，不過食完晏好眼訓，結果一訓就訓到六點幾。跟著又開飯，阿施煮野都唔錯，一邊睇電視一邊食飯，之後仲食埋雪榚，好正啊！簡直當依度係自己屋企一樣！

跟著睇左一套西片就同肥鍵一齊走。

返到屋企就整下我部新電腦。始終都係牌底版虧虧地，IDE插頭得果一個，結果而家要拎走一個CD-ROM先用得番！遲下要叫硬膠霸主黎搞搞先。

p.s.今個某人又打黎煩我，我照舊唔聽佢電話！

今日做咩都無心情，全日係屋企hea。其實因為poly-hd既原因，因為我覺得好怪，點解唔係JUPAS打黎，而係Poly打黎。而且又無offer-letter，又叫我入數先。加上佢俾我個電話打極都打唔通，好驚俾人呃啊！

今日開始我就唔洗再用個部廢柴電話喇！雖然當年依部電話係好勁，又彩色又藍牙。不過經過我家姐歲月既摧殘，機身已經大不如前。而家只不過係一部我聽到對方講野，對方聽唔到我講野既電話，有時仲會無啦啦hang機。

容忍係有一定既限度，所以今日決定去換新機。我而家轉用黑色既J300i，零機價好抵玩！而且分鐘由200激增至1000，以後唔洗驚會傾爆分鐘。我轉左新世界，如果大家同台既就send個SMS俾我啦！免費嫁！哈哈！

p.s.今晚我阿爸阿媽去澳洲搵家姐，兩個星期後先返。而家無王管，正啊!!

經過連日黎既深思細慮，我決定放棄City FS Asso同Poly Civil HD既學位，出國去澳洲讀書。

因為香港既學費都十幾萬，去外國都係加多幾萬，仲讀少一年，所以．．．

同大家講下笑姐，其實今日上緊足球職前既時候，無啦啦收到個電話，有個女人打黎問我讀唔讀Poly既Electronic & Information Engineering HD。雖然同EE有少少分別，不過我諗都無諗就即刻accept左喇。

唔知好彩定唔好彩，原先JUPAS無offer，但係過左幾日又有兩個HD收我。【塞翁失馬，焉知非褔】，依句成語竟然會發生係我身上。不過唯一可惜既就係，City個二萬銀無得退番。所以我一定要加把勁，升番上degree，唔係就浪費左好多錢嫁喇！

今日考慮到升上degree既問題。旦旦話Civil學既野都幾深，而且好多勁人，驚俾人屈機。但係去到FS，自己又未讀過商科，不過聽師兄師姐話唔難讀，如果努力，第一個sem屈到人機就可以有interview機會入dergee。

不過，考慮到兩科都要出晒全力升上degree，我就覺得讀HD會好少少。因為聽阿姨講，其實想打銀行工，唔一定要讀過Finance degree，而且出面有好多讀Finance既途徑。相反，Civil就係一門專業工作，無得自己進修。

兩科比較(假設已升上學位)

Civil個機會唔係時時有，一個專業資格係一生既。而且從商發展都有好多途徑，現時有唔少Finance.Course讀。所以，有人建議我交主修Civil，副修Finance。如果Civil出黎搵唔到工，先再從商。

究竟拎一個專業資格，俾多自己一條路，定係一心向商界發展呢？

突然JUPAS打黎，話收我Poly Civil HD。但係City Financial Services asso又幾有興趣，諗著係金融界發展。不過Poly HD又比較易升番上Degree，真係好想拎個學位啊。但係前景又覺得FS asso好少少，不過Civil又比較專業。究竟讀咩好呢？

今朝好早就起左身，不過見成班紙底褲都未訓醒，於是就繼續訓覺。大約去到八點半，大家就開始刷牙洗面，然後就去食早餐。

食完早餐後，就玩左幾個遊戲。其中又玩番個果「全部人企晒入去」加強版，就係要翻轉埋企係上面張紙。依個遊戲上次係職前做唔到，不過今次出左少少術就成功喇！哈哈！最後一次，我地全體綠索女企晒係上面玩。裡面班人就超慘喇，又熱又臭，不過我係外圍就好涼爽！

跟著就玩劈西瓜，個遊戲係鬥快食完個西瓜，然後再重組番原狀，之後可以轆到一定既距離就算贏。我地紙底褲有隔離組大力士嘉良坐陣當然唔會輸啦！結果我地係最快個隊。隔離個隊就慘喇，因為輸左要俾我地用西瓜皮洗面。不過佢地又幾個女仔走入左廁格避難，結果我地最班人走晒入去。一聲令下，將全部西瓜皮拋入去，場面超攪笑！

然後大家就返房休息準備食夜飯。過左無耐，無啦啦叫我地全體去禮堂集合。

去到禮堂見到其他人已經到齊晒，於是營長阿香就正式宣佈一件大事。佢話佢地唔見左個錢箱，而且裡面仲有八千蚊，仲話我地嫌疑最大，要搜晒全部人既行李！我地綠索女立即話唔可以，因為佢地無權話搜就搜，而且係佢地唔見左錢，係佢地既責任，佢地懷疑我地，將個責任推俾我地係就唔得！之後，我地綠索女其中一個組仔Sunny就立即出聲！佢非常正直咁講：「你地根本無權搜房，要搜既話，就報警叫差人黎搜！」紅萬個邊立即反對，佢地話唔想搞大件事，仲話為左表明清白，佢地願意搜房。跟著藍筒丸個邊又話唔搜得，返學黃個邊又話要搜。之後大家就開始爭執起黎，而且仲想大打出手！

跟著，大家仍然爭論不休，我地紙底褲個組爸阿威又話要拉大隊走。係依個時間，我地個組仔Sunny又出聲，佢好豪氣咁講：「打交係解決唔到問題既，大家都係成年人，一齊諗下辦法搞掂左個八千蚊啦！不如大家夾錢，我願意出一千！」雖然我好欣賞佢既豪爽，但係唔見錢佢個唔係我地，點解要夾呢？況且依個係佢地既責任！於是大家又一次爭執起黎！

點知突然間有班人拎住水槍衝入黎向我地射水。個一刻我地先恍然大悟，原來依個係一個situation game，目的係想我地將來係大學或者出黎社會既時侯，遇到咩不滿都要勇於發表自己既意見！

玩完之後我地就吃夜飯，食完飯之後又到今日另一個特別節目．．．

就係跳Camp.Fire喇！雖然我唔記得晒舞步，但係跟著大家一齊跳已經玩得好開心。可惜陽盛陰衰，我左右手邊都係男仔黎既。跟著就係營花營草選舉，返學黃個邊個營花好屈機，出到彭丹一字馬，而紅萬營花就係度show身材，我地綠索女個邊真係大飽眼褔。其餘兩組都無咩特別，最後都係返學黃個果當選營花。

跟著就係Disco.Night，個場因為落雨加潮濕關係，搞到塊地版好濕，好滑。不過我地個個手拖手玩溜冰，圍住個埸打圈。雖然我地唔識跳舞，只不過係亂咁跳，但係都玩得好開心！不過，裡面真係超級大悶熱，成個大蒸爐一樣，我地玩完之後個個變晒濕毛鴨，好搞笑！

然後我地各組番房，我地沖完涼之後又隔黎房玩。今晚好激，玩拍7加only true no dare，個後備姐”媽”既問題好敏感，搞到我地好認真。記得有一條問題問：依度邊個最樣衰？雖然Kelvin無講出黎，但係佢拍一拍Sunny個膊頭，簡直無聲勝有聲，哈哈！其間又有好多動作題，真係好變態。玩左無幾耐之後，我地就返房訓覺。

今日就係O’Camp既開始。返到課室，每人都派兩件綠色衫，好綠啊！換完衫返課室，突然多左幾位新組員。由於佢地之前無去grathering，於是係度又一次介紹自己。過左無幾耐，組爸媽仔女齊晒之後，就開始第一個項目。

今次主要都係係City走黎走去完成任務。完左之後，我地就有個講座，有一班人講左好多廢話，又派左好多廢禮品之後，我地就食午飯，跟著就開始誓師大會。係誓師大會，每組都互插對方，每個人都高呼口號，加上打氣捧捧既敲擊聲，簡直如雷貫耳！不過，搞到我隻左耳既老毛病又發作。

然後，我地就開始上車前往營地。但係大家都好似好眼訓，無咩野講。於是我都訓一訓，養充精神黎準備三日兩夜既種種挑戰。

去到大棠，分配房間，玩左幾個小遊戲，食埋晚飯之後，第一個集體遊戲Treasure Hunt正式開始。

今次遊戲主要去十二個地方，完成指定既任務。不過個遊戲開左無幾耐，就開始落雨。我地要係雨中走黎走去，一時上山，一時落斜，對班女仔黎講真係幾吃力。記得上個條長樓梯去個亭上面，行得好辛苦，阿Wing仲搞到哮喘發作。不過我地付出既努力都係值得既，因為一次可以完成兩個任務，而且挑機又成功！自此之後，我地士氣高昂，一路跑一叫紙底褲，沿途組爸組媽又為我地打氣。最終我地係綠索女之中最快完成既一隊。可惜，對面紅萬比我地更快到達，而且俾佢地搵埋個寶藏，真係唔抵。

返到房，我地輪流沖涼。之後我地就揀營花營草，我地派出方力申同美麗的根源。我地仲幫佢兩個諗計排左個短劇出黎，真係超級搞鬼！跟著就過隔離房聽鬼故。去到對面，間房熄晒燈，得一支電筒照黎照去，形做出一個緊張既氣氛。隔離個組媽講左兩個鬼故，雖然有一個聽過，但係自己係腦氣幻想番個景象都幾恐怖。跟著我地返番自己間房繼續講鬼故，不過Marco講既鬼故都唔驚既，講講下仲變左講校園怪事。

之後我慢慢就訓著左．．．．．．

欲知後事如何，請留意下回分解～