Author: bergkampho

足球，係一樣帶俾我歡樂既運動。我甚至覺得足球就係我生命中既一部分，不可缺少。每當暑假，星期六晚，我地就會係田灣網球場鬥波，到第二朝早八點，就會去黃竹坑跟姨丈踢波，然後到下晝就同成班妹子係石排灣練習。而且我地不停鑽研足球技術，不斷研究新穎既盤扭招數。目的就係希望有一日學有所成，能夠扭過四姨丈落山畢業！

可惜，甚麼「撩波神功」、「顏面頂球」、「一攻一守」，都已成過去。

自從會考之後，我同足球既距離一日一日咁拉遠。雖然偶然都會同班同學、朋友出街鬥波，但係往往因為無場關係或者唔夠人數，最終不歡而散。後期，更加因為學業關係而暫停踢波。

去到預科，本以為可以有更多時間去踢波。可惜好景不常，每次踢波都必有血光之災，而且「世紀大雞眼」更加係一時佳話。高考階段，踢波既時間逐漸減少，所以漸漸就習慣無足球既生活。高考之後，一心以為可以重拾當年快樂既回憶。但係十字韌帶既受傷，一次又一次令我進入足球既低潮期。

唔知係小寶既關係，定係對足球既熱誠減退。我對球員轉會消息，花邊新聞亦漸感沒趣。不過，偶然我都會下載球賽，欣賞一下阿仙奴水銀瀉地既攻勢。但係近來，阿仙奴既戰術運用，兵源問題，成績一直未如理想。不過，年輕小將掘起、傷兵復出、老將神來之筆，一一都曾經令我對阿仙奴充滿過希望。可惜，往往到最後，希望總變成泡影。今次既２：１更加令我．．．

唉～足球，係一樣帶俾我失落既運動。

BoA…

p.s.今日原來係911，各位死難者安息啦！

今日全日對著部PCC，裝番晒地圖、字典、外掛等等程式。唔知係未太耐無用，發覺而家新個部機性能好似強左，睇相又靚左。而且顯示既中文字又清楚左，總之就正啦！

另外，今日出左香港仔買釘鞋，但係無一款鐘意，而且又貴。所以聽日都係著番舊個一對。

返到屋企就搞myPolyU個Student.Acc，但係個度好鬼麻煩，password要求多多，搞到唔可以用平時個果。e-mail又係一樣，迫人地要加個dot，好鬼核突！搞左一輪之前就試下login，點鬼知個password複雜過頭，一時唔記得左。於是又整左好耐。最後總算login到，不過WebCT個度又login唔到喎！真係把幾火！

到夜晚就睇左《大丈夫》，套戲成日同對比同隱喻，真係好貼切。最深刻就係佢地講要滾既原因個一幕，拍到佢地四個好型！

有見及此，BoA特區就送俾大家BoA型女既一面啦。

p.s.今日一上xanga就見到總人數有4,444人，而今日又有44個人黎我xanga，暗示出咩事呢？

Friday, September 09, 2005

今日返學感覺不俗，漸漸感受到校園生活既樂趣。而且同班同學仔熟落左，有時又會有講有笑，氣氛唔錯。上堂方面，教學內容深度開始提升，教左幾樣新野，不過都唔難應付既。今日仲拎左SU本notebook，本野資料好齊全，有晒office電話，搭車路線，對於我地Freshmen黎講真係幾方便。

但係最喜出望外都係我部PCC，本來諗著拎番去Dell俾佢維修。點知佢竟然換過部新機俾我，真係爽啊！

由於四姨婆係外國返黎，所以放學之後就去嘉年華大酒樓食晚飯。一路食就一路同Claire玩SMS，傾左成幾粒鐘偈，間中就同妹子們吹水，講下學園生活，時間好快就咁過去。跟著就去泰皇食甜品，食到十二點幾就走人。

依兩日真係好開心，因為好多以前積累落黎既問題都迎刃而解。但係，一直令我煩惱不堪既【十字幫】仲未剷除，希望星期日運動量唔好咁大，唔好令傷勢進一步惡化。我而家真係好想立即好番，痛痛快快咁踢一場好波！

終於都搞掂晒之前未搞掂既野喇！而家成個人輕鬆晒，好正啊！

今日上完英文同Circuit.Tutorial之後就去左拎學生証。不過佢話要下晝先整好，所以就去City搞退學手續。本來諗著約kaho食晏，點知佢竟然仲訓緊覺。之後唯有約大頭龜啦！

去到City，個感覺雖然唔陌生，但係就有少少怪。然後就同大頭龜食飯，傾下大家讀書既情況。我發現佢地個時間表都幾空下，相反我就日日都要上幾堂。

Poly同City最大既分別就係個Campus大細，City.Campus相比之下，實在太細，食晏時間四周圍都係人，但係又幾熱鬧，好似行緊商場咁。行行俾我見到我地綠索女House.Cap.Vivian，同佢傾左一陣偈之後就去搞手續。

點知上到CCCU又未開門，於是就去影證件照。因為我之前參加左攝影學會，所以佢地會幫我免費影一輯，哈哈！跟著就上番去CCCU搞手續，開頭都諗著無得退錢，點知臨走個時佢話一個月後就可以上去拎番筆學費！嘩！實在太正喇！

跟著就返番Poly做Fitness.Test，今次試下搭KCR。我上到月台就發覺已經有車，終是就立即飛奔入去，但係聽到宣佈話下一站竟然係去大圍！？原來自己搭錯車，好彩我身手敏捷，立即走番出去，唔係就去左沙田喇！哈哈！

去到Poly拎左學生証，而且仲搞掂埋地鐵八達通。係途中竟然俾我見到阿高，之後仲同佢講左好多香工棋藝學會既事，真係懷念當年我既雙季王。跟著就同肥仔去聽講座。嘩！佢地個邊好多女仔啊，而且質數都唔錯，唔怪得知肥仔揀Asso.啦！

最後就係Fitness.Test，睇完一個超悶既PowerPoint後就去測試。勁啊！我而家握力強左啊，兩隻手都過到30，好野！心肺個導師好犀利，一睇我個心跳就知我無做一排運動。講真，自從【十字幫】突起，我一直好少做運動。唉～鬼咩，而家隻腳仲未好番，而且一到就好番既時候又去踢波，結果又傷番。重重覆覆，搞到我都無咩心情做運動。

Claire: 聽日見工一定無問題，加油啊！
Yan: 竟然大家都係同學，多一個朋友，總好過多一個敵人。

小寶時間．．．

p.s.今晚阿爸阿媽返黎喇，咁就去左兩星期，都未真正過無王管既生活，唔制啊！

唉～自從開始大學生活之後，做左好多硬膠事。入到學園，人生路不熟，成個大鄉里咁。今日，我又做左一件硬膠事，真係無奈。

話說今朝要上Logic.Tutorial，不過由於尋晚夜訓既關係，今日遲左起身，於是就立即起身刷牙洗面飛去Poly。

一落車我就飛奔去到HJ303室，一路跑一路望錶。無幾耐，終於去到課室門口，再望望隻錶–10:30am。呼～總算及時趕到。於是就入課室。但係一開門就發現裡面竟然空無一人！

係白版上面只係寫住：「ｓｅｅ　ｕ　ｎｅｘｔ　ｗｅｅｋ～ 」

可惡！取消又唔早講！次次都係去到課室先話取消！本來今日day-off，點知一個人硬蕉蕉咁返左學！真係扒街！

另外，今日買左條cable線！而家可以入mp3鈴聲入部電話度喇！\(^0^)/~YEAHHH~我既鈴聲係make a secret，如果大家係車上面聽到依首歌，個果就係我喇！哈哈！不過入歌既速度超慢，一首歌都要成幾分鐘，但係無計啦，如果買一條原廠cable線要成$300，而家$70有交易，要忍受下嫁喇。

到夜晚，睇左【鄭和下西洋】。覺得中國人其實真係好勁！如果唔係班硬膠皇帝，我諗中國一早就稱霸全世界！

p.s.打左一日英文日記姐，唔洗突然少左十幾人ｍａ．．．

These following sentances come from Mini forum. i quite agree with some of them. =(

1.英文太差，入到去係咁卑人屈機，屈到變包尾大幡
2.普通話仍然很差，加上英文也不太好，遇著外來生可能會出現語言障礙
3.自己唔算活躍既人，而且風格偏向灰暗，同d玩得好開放既人可能唔太夾
4.大學好多野搞，又要reg courses，填form，大學五件事等，好複雜
5.如果住hall的話，會冇屋企咁方便，但無奈屋企距離大學甚遠
6.大學好大，d地方都唔係咁識得去
7.冇fd陪我一齊入大學，但人地(尤其係名校出身，成班人入同一間大學果d)可能中學已經結識左成班fd，可能對大學認識的朋友不太重視
8.身為窮光蛋同學，過慣左節儉既生活，怕如果同同學一齊大魚大肉既話，我會無所適從
9.自己生得樣衰兼且性格唔活躍同被動，而且份人冇任何吸引力，去到大學多數都係要繼續單身
10.如果住hall，唔知d hallmates會唔會玩到好激，令我無所適從
11.雖然有諗過大學果陣兼職，但自己成績差而且讀文科又係男仔，怕冇人搵我補。搵其他partime又唔知會唔會好難搵
12.自己冇任何有用的技能，如同廢物，電腦、美術、體育、讀書、交際等等都係好廢，而且中學做左七年摺人，冇任何相關搞活動及同人一齊去玩既經驗，怕因此而沒有能力參與其他人的活動，而備受排斥。
13.入到大學後，成個人好似冇曬動力咁，做任何事都不起勁，成日覺得無黎神氣
14.大學成日socialize，令自己好困心，有時會搞到身心俱疲。

Since my computer has a technical problem,  i can’t xanga in chinese. So, let’s try to use my poor english to type xanga today. =]

In the morning, i received a call which told me to register today. That means i can get my student ID card! Yeah~i’m waiting for it with a long time. Now, i can use ALL facilities in PolyU~\(^0^)/!!

Today, i needed to attend only one lesson, industrial centre training. My tutor, Jonathan, taught us about the industrial safety for engineering discipline but it’s quite boring. he showed us many things about the industrial safety with powerpoint, but i only saw many many vocabularies on the screen. What the FIUO, regulation, general duties…they made me so confused. (=_=)?? However, i was quite interested in the case study exercises which were very useful to build up my critically thinking ability! Finally, i’ve learnt what “人機物法時空” is.

p.s. i got BoA’s new single “make a secret“. it’s soooo GREAT~(>3<)!!

今日又係返學既日子，第一堂就係上Eng.Maths.。去到BC412門口，發現得小貓三四隻，而且個課室一個人都無。不過都唔理咁多，一直繼續等。但係等到開課既時間，課室週圍仍然係無人，連一個阿sir/Miss既物體都無出現過，漸漸覺得唔對路喇。等左無耐，見到方日輝出現。佢話番俾我知原佢來收到個e-mail話今堂取消，真係Ｏ晒咀！

之後就搵肥仔食飯，俾佢拉左我去Engso個O’night。跟著佢話無野做，於是就陪我上堂。今次就上Logic，但係教既野之前已經學過，所以都幾悶下。

接著又係Eng.Maths.，不過今次就無取消喇。今堂係最新起個幢大樓上，個度仲有好多地方都係裝修緊。但係，一入到個演講廳就「嘩」左一聲，個感覺就好似入左間五星級戲院一樣，張凳又舒服，設備又完善，正啊！但係個阿sir都係第一次用依個演講廳，所以好多儀器都唔識得用，仲搞到要同學出黎幫手，當時場面真係超攪笑！

放左學之後，我就行過去天星碼頭接妹子佢地。點知我行到星光大道個時，妹子隆竟然話佢地係尖咀地鐵站，搞到我要兜左個大圈。係吉野家食完野之後，我地就拉大隊上名師補A.Wong。

但係上到其利中心，名師竟然閂左門！平時我地爆到十都未收啦，點解今次上到去會無人，甚至連鬼影都無隻？原來係名師要準備搬去佐敦，所以好多課室都收左！唉～搞到我白白行左咁多路！

登登登．．．又係戀寶時間，今日送俾大家就係新碟【make a secret】

上左兩個月堂之後，今日終於都係正式開始青年足球領袖訓練喇！今日學識左好多野，有理論亦有實踐，對足球教練又加深左認識。不過，唯一敗筆之處就係落雨，個草場又濕又滑，搞到我扒左幾次街！

尋晚掛住睇【電車男】，於是搞到三點幾先開始訓。今朝七點半就要起身，無咩精神。大約用左一個半鐘頭就去到烏溪沙青年營，即係上次滅罪波波個度。

一開始就派波衫、波褲等等用品。然後就開始理論科，今堂主要討論一個領袖必需擁有既素質。其實依個問題真係討論過好多次，來來去去都係有責任心、有耐性、有愛心、良好溝通表達技巧等等。

跟住就開始技術訓練，我地換好晒波衫就落去足球場準備。但係個場超濕超滑，而且我又無著釘鞋，所以行每步路都要小心翼翼。球練朱sir同Miss.Chan教識左我地點樣分組同點樣帶熱身，又教左幾種手腳協調練習。跟著就有一個小型比賽，由於個場好濕滑，一去到泥地既地方就會好容易扒街。記得其中一次急停既時候，一腳踏中塊泥地，結果順勢仆街，仲搞到滿身泥濘，好唔舒服啊！

食完晏之後又開始第二節理論課，Miss.Chan俾左段Ajax青訓既影片俾我地睇，見到金爺當年既威風啊！好勁啊！

然後又技術訓練，不過腳隻開始痛喇，搞到實習個時力不從心。教訓佢地教左我地幾個盤球練習之後就放學。

太耐無做運動喇，要好好練番體能先得！

啊呀～～～～～～～～～～～～～～～～～超級討厭落雨啊！

下雨天做咩都總係唔如意既！而且今日仲做左樣超級無敵硬膠事啊！真係極度硬膠啊！膠力指數簡直爆登，連自己都要俾個膠自己！

唉～咁就用左＄３８蚊，依個馬鐵便便真係貴．．．．．．

p.s.近期爆聽Orange range，所以轉左個橙版。本來想整到好夏日，但係心情唔係幾靚，所以而家變左有少少幽怨。