今日係理大學生節既最後一日，仲請左一班歌手黎Poly表演。現象氣氛一流，令到我回想番【北上尋寶】當日既情形。雖然今日既主角唔係小寶，但係全部都係算係實力派，所以都幾欣賞佢地。
一開始就有隊Band上台表演，但係我地又唔知係邊個，仲係度估係邊一個歌手。點知原來佢係Poly學生，超搞笑！之後就到官恩娜表演，佢真人的確幾靚，而且唱歌都唔錯。跟著就係方大同，第一次聽佢個名，佢唱既歌都幾有風格，唔錯唔錯。
之後就係最正既周國賢同張繼聰，佢地又唱又跳，超級型仔！得閒又做下小動作、扮下鬼臉，簡直將現場氣氛推向最高點！
然後就係應昌佑，佢個兩首歌都唔錯既。到最後就係薜凱琪，佢真人同上鏡都差唔多樣，而且睇落到個人都幾修長。不過我見到有班假歌迷柴佢台囉，佢地係台下不停叫「雞仔」，去到中途又拉隊走人！好衰嫁，又係度扮Poly學生霸位，影衰晒我地既形象！
如果大家想睇下相，可以黎>>依度<<
p.s.今日勤黎左Poly做學生，超搞笑！
好耐都無試過白天返屋企喇！依排要追番以前既懶惰，成日都係好夜先返屋企，而且依個星期又特別多野做，自己又訓得夜。今日又要上八點半，所以有少少精神不振，到最後既IC.Training竟然去左池塘釣魚。
放左學之後立即飛去訓晏覺，訓到十點幾先起身。雖然唔係咁滿足，但係都算係一個幾好既休息。
另外，今日收到City.msg話可以去拎番筆學費！正！
p.s.發現有好多轉筆高手！係時候要研發出新既轉筆方法向佢地挑戰！
今日幾經辛苦，終於都完成份Circuit功課。其實都份野唔係好難姐，只不過係自己掛住同同學仔傾偈搞到遲遲都未做好
。唔得，上到大學要改改依個臨急抱金爺隻腳既惡習！
另外，今日上Comp.Training低能嫁！雖然改圖係我既強項，但係Miss跳得超快，搞到我停左一部就跟唔到。本來平時係我幫同學仔，結果最後同學仔幫我！
p.s.好興奮啊！見到HOCC，阿達你走寶喇！星期五仲有周國賢、薜凱琪、應昌祐、張繼聰．．．正啊！
雖然阿仙奴今場表現唔算突出，不過阿積士把握力亦都未如理想，所以贏波係合理既。自從金寶既復出，班後衛個個都好生，特別覺得托尼打得好好。但係攻勢力就好似差左好多，中場班人成日都自己一個人去，無咩做第一時間，或者好靚既入攝，好似差一個重心球員控制節奏、分波派牌，所以好耐都無見到咩水浪瀉地既攻擊。
阿積士班球員其實都唔差嫁，只係差少少經驗，但係有幾位球員我覺得幾有潛質，假以時日一定有一番大作為！
另外，今日最開心既地方唔係贏波，而係有番一個球迷既感覺。之前因為成日都無踢波，所以睇波都少左。不過而家即使係三更半夜睇波都在所不辭，而且會為阿仙奴緊張、會為阿仙奴興奮。
我諗：我真係返黎喇！
９４０５２６０７，有咩唔開心都可以搵佢．．．Mr. Mo
p.s.一個我希望擁有既眼神
可能係落雨既關係，今日個人比較文靜，上堂無咩同人傾偈，只係自己一個人係度轉筆。加上開始意識好多勁人既存在，所以上堂都無上網玩MSN，好留心咁聽書同做數，做個乖學生！
不過，依兩日掛住足球教練，搞到我無check.e-mail。今日check番先見到輔學課程又開始可以報名，點知已經過左報名日期，超級無奈！(T_T)
另外，今屆英超排名榜前五位竟然見唔到阿仙奴，而且個個而家口中只有車仔。唉～唯有著下波衫，等人地記得番阿仙奴啦．．．
今日就係青年足球領袖既考試大日子！講真，我非常討厭考試！我討厭一試定生死既制度！但係更加討厭自己臨急抱金爺隻腳既態度！
考試既情況唔再講，我既表現中規中矩，尚算滿意。雖然聽阿檸話上次考十六人有十個炒左，但係教練之後話番會綜合番所有資料先再作結論，而且佢又話會有一半以上人數合格，我諗自己點都唔係最差個一半既。
其實，今日最想講既就係我考完依個試之後既少少感想．．．
自七月廿五號到今日，整整兩個月內，我結識左好五十位不同既朋友仔。雖然過左今日之後，我地可能無機會再見面，不過係我既記憶之中，你地始終係存在過，可能我地只係Hi-bye.fd，但係相識總是緣份，他朝有日係街上面遇見大家，我希望大家可以打一個招呼，傾幾句偈。
雖然依四日技術訓練有三日都係落大雨，而且今次亦係最大雨既一次，不過我非常開心，因為見到依班志同道合既朋友仔踢波，令我可以忘記平日不愉快既事件。加上我隻腳就快可以好番，再過多幾個星期，我就可以重回我們的足球場，真係大快樂啊！
金爺我就返黎喇！
唉～愈黎愈覺得自己無用喇！今日有成日時候俾我做份足球功課，但係往往都最後關頭先會落工動手！
因為前晚訓得好晚，所以尋晚好早訓覺支電。今朝十一點起身，個人好精神，於是立定決心開始做功課。開左個Word之後，就上下網搵下資料，點知搵極都搵唔到想要既野，於是就開始做埋晒一堆無聊野，搞搞下仲訓堆晏覺，功課再都無做過。
大約四點幾，我又再起身，又覺得自己好精神！不過就無做功課，又hea左一陣。之後就左睇【電車男】大結局。班網友真係好正！雖然唔知道大家既個名係咩，亦都唔知大家個樣係點，更加唔知大家將來會變成點，但係大家卻被世界稱之為愛既東西連接一齊！實在太神奇喇！
睇完之後突然好有衝勁，於是一路聽愛歌，一路開始我既足球功課。可惜，個時已經係夜晚十點喇！不過，做到兩三點既時候，開始意識到憑自己一個人既力量係唔會趕得切做完既。於是就學電車男開始尋求網友既幫助，但係我搵唔到足球功課留言版囉，又無人可以幫到我。
於是我就開始停晒手腳，希望八號風球既來臨．．．我一直望著天文台個網，一直幻想個３字係８字．．．
好彩，係依個時間勤既出現，將我帶回正軌！勤幫我做左球例同個封面個部分，真係多謝晒佢！個時已經五點幾，仲有幾部分未完全，但係睡魔又不停咁呼喚我，我唯有應酬一陣啦，點知周公又走黎傾偈，搞到我七點幾先再做番功課。
我個時望著個鐘，心諗八點半要出門口，仲有最麻煩既趣味足球遊戲未搞掂。於是又走去天文台網期盼八號風球既出現，可惜，世事總是事以願違。
去到八點鐘，發覺唔對路喇！終於要發動柏金能量裝置。係依個究極半小時內，我一連做左三個足球遊戲同埋我份考試教案！
最後，份功課總算草率完成，但係，跟著落黎就係考試既開始．．．
今日下晝去旺角拎足球教練份筆記，而且仲同阿檸傾左陣偈，佢問我覺得個訓練計劃點樣，有咩值得讚賞，有咩需要改善。講真，我覺得依個計劃真係超級超級掂，唔洗錢有咁多野學，又送波衫波褲，又有專人指導，簡直係一流啦！人地提供左咁多好野俾我，所以我一定會俾心機考好個試！
另外，夜晚同貓強阿豐食壽司，我地傾左好多計，大家都講下讀書近況，又講下其他人既校園生活。阿豐仲整左兩個怪動作「拍手．拉面」，好鬼攪野！不過，最正就係今餐貓強萬歲，而且又還錢喎，大滿足啊！
p.s.今日返到屋企，覺得自己好似入錯屋。因為依個情景太耐無發生喇，不過唔知可以維持幾耐呢．．．．．．
今日派番前幾日份英文功課，我真係好俾心機去寫嫁，結果只係得一個C，仲係全級最低分，超級無奈Orz…咩料啊！
唔得喇～我而家開始要加油喇！目標係其他科爆分，拉番高個GPA！好～【龍櫻】溫書大計，由依一分鐘開始！
不過，【龍櫻】已經大結局喇，結果只係有三個人可以升讀東大。今集櫻木老師又講左一句幾正既話：「入學試只有一個正確既答案，就係合格！不過，人生就有好多個不同但正確既答案，入大學可以係正確答案，打工可以係正確答案，熱衷於運動也好、熱衷於音樂也好、同朋友喪玩一番也好，都係正確答案．．．」（意釋）
唔知大家明唔明呢？雖然我明，但係我仍然覺得只有大學先係正確答案！
另外，我有一個問題想問問下大家：如果有一日你係一個孤島上面，你有一班小朋友需要照顧，佢地非常肚餓，而且你擁有一切釣魚工具與及精通釣魚既技能，你會點樣做呢？
如果同我一樣答案既，你就會認同我「失敗者係唔值得可憐既！」
p.s.依排成日學人講野添，咩料啊！