Author: bergkampho

去完迪士尼lu….好玩！

3D立體戲院、獅子王慶典、米奇頒獎典禮、花車巡遊、小熊維尼之旅等等都好令人回味，我覺得裡面每一個地方都好細心去設計，簡直係一個夢想世界！

(詳細內容後補)

i love…

C++test完成，唔係我想像中咁難，不過有好多題都唔肯定，應該合格但係唔會高分。跟著一直留係Poly，係CF仲俾我見到尋晚個硬膠人！

9:30斷背山，我終於找到自己既斷背山！=]

一般人提起【斷背】就會直接聯想起「同性戀」，其實「每人心理都有一座斷背山」並唔係咁解。今晚睇過《斷背山》之後，更加肯定斷背山既存在！斷背山裡面，可以忘記所有世俗既枷鎖，自由自在，我行我素！絕對係一個遠離社會既理想樂園！

我們輸了

由一開始報名參加打EIE.Cup，我就無預過我地可以贏到冠軍。因為我見到我地班既同學仔係Open.Cup俾人大抄七蛋，所以對佢地都無咩信心。

第一場，寒冷既天氣下，無默契既我地踢得好差，雖然早段先開記錄，但係完場前輸左一球好無奈既九碼，最後和波收場。大家果晚都有訓唔著既感覺，因為跟本我地係可以贏…

第二場，我地好有鬥心，因為要大勝對手先可以出線，結果大勝五比二。雖然係贏波，不過出唔出到線都先睇另一場比賽。好彩，輸比我地果隊竟然大勝和我地果隊五比一，結果我地小組首名出線。

雖然EIE.Cup只係踢左二場，但係其實我地其間已經踢左好多次波，大家慢慢已經建立左一份默契、一份友誼！

以前同其他人踢波，好少會互相鼓勵，反而係互相指責。不過EIE依班同學仔就唔同，每一次比賽都好有士氣，隊友有失誤，會指點；隊友有入球，會鼓舞。所以每一次同佢地踢波都係好開心。

今日終於都到決賽，我地就好有鬥心，一開始，靠我既入球而先開記錄，但係佢地又追和。跟著靠阿榮又領先一球，可惜我既失誤，又被人地追和。其實大家都好緊張，所以大家都好燥，去到中段我地緊加打交、口角……結果對方一個球員同阿燊都被球証趕出場。

半場之後，因為佢地有球員傷出，我地更加打多一個球員，可惜，反而被佢地一球遠射而反先！其實完場前我地有一個可以追和既機會，不過我把握唔到，中柱彈出。最後抽根既我，只能夠望著球証吹響完場既雞聲……

對手平均實力的確係高過我地，打少一個都可以頂到我地，而且仲有好多反擊機會，所以輸得心服。雖然輸波係唔開心，而且有少少唔甘心，但係大家經歷左依一戰之後，好似友誼又進左一大步！

各位同學仔！我地ESA再努力啦！我們輸了，其實是贏了！

哈哈！銀牌反轉就係金牌！XDDD

p.s.對面個球員好硬膠…

好耐無上過既EC2.LEC，今日終於上番。雖然有一半時間要黎做左LS功課，但係其他時間都好專心。

食晏既時候同阿榮佢地討論EIE既問題。大家都覺得好灰，因為如果升左上去之後，三年內都要過著不斷做實驗，交報告既日子，諗起都覺得可怕！

p.s.聽晚就係決賽！各位加油啊！將所有怒火發洩出黎啦！

315…B-day

今天對我來說，絕對是一個很有紀念性的日子，算一算，原來彼此已經認識了三年的時間。還記得第一次遇見妳的時候，在公共巴士上，看到妳那動人的身段、秀麗的長髮、甜美的聲線，便深深地被妳吸引著。可惜，我倆互不相識，很快便分開了……

是否命運的安排，我們再一次相遇！不幸的是，我竟然忘記我倆初次見面的情景。但幸運的是，我知道了妳的名字，也就是因為這三個英文字母的特別組合，在網絡上，我開始找尋這些失去的記憶碎片。

我嘗試在搜尋器中輸入這三個英文字母－BoA，一瞬間，出現了近千萬個搜尋結果。命運的再次安排，在云云網站中，我選擇了BoA Forum in HK 的前身，一個極少會員知道的神祕網站。

進入網站的同時，我聽到一把熟悉的聲音，雖然音樂有一點拆，但是這扣人心弦的旋律，卻令我著迷。自此之後，我便不斷發掘妳的過去，不斷追尋妳的蹤跡，直到現在。

這就是我與小寶相識的經過。

三月十五日的這一天，我便認定妳是我人生中的第一位偶像。

今日第一次同小丸合作，一開始就做最難既EC.Lab，不過都可以準時完成，係一個好既開始，下次繼續努力。

夜晚被人發現我帶眼鏡，仲話我ＸＸ，好明顯係有偏見啦！

p.s.被騙！不過唔洗咁介意啦！

近日因某事令我煩躁十分，雖然表面波平如鏡，但內裡卻翻雨覆雲。幸好經歷一天的狂風大浪後，現已回復一片平靜和諧的景況。

今日大清早就起身，獨自上DE做Lab，幾經辛苦終於都有閃燈，有聲音，真係大感動啊！！好多謝Johnny既提醒！大感謝！

近日依個David.Lab真係令到我好燥火！失敗、失敗、不斷既失敗真係好沮喪！做依個Lab既感覺就好似以前既Logic.Lab一樣，好煩，好多線。但係有一點唔同，就係拍檔……

以前同阿科一齊做Lab，雖然都係不斷失敗，但係大家嘗試、嘗試、再嘗試，抄下隔離組，問下同學仔，點都會諗辨法完成個Lab，拎晒10分！屢敗屢戰，屢敗屢戰，終有成功既一次！

講真，而家做Lab真係無左當時既感覺，各自為政，互相推倘，大家指責對方，其實一組人應該要齊心合力，專心一意完成個Lab！因為做好個Lab都係大家既責任！

生氣只是把別人的錯誤，罰在自己身上的行為。

重臨的感覺，仍是這麼討厭！我討厭齊宣王！

單天補至尊，誓要力挽狂瀾！

今朝早同妹耀拎左眼鏡之後，就返Poly幫兩位大小姐補習，約佢地一時半，結果三點先到，原來兩位千金去左行街睇戲。－,－

其實係你地去考會考，又唔關我事，點解我仲好似上心過你地既！？路係自己行既，你地可以問路，但係就唔係叫人送埋你地去囉。

另外，今日真係對不起某人，要你等左咁耐！我都唔想咁遲！見你開心番就好喇！其實你個髮型真係好可愛，唔洗用格仔帽喇！=P

p.s.冬天小姐！我想同你講「拜拜」而唔係「再見」。

我返黎喇！今日…唉，白費心機…原地踏步…真係好想爆粗！X#Y$%Z

今日自己一個人返Poly做David.Lab，睇到DE裡面都有好多同學仔仍然努力同555搏鬥！所以我都要加把勁！可惜……

唔知點解，我已經檢查左好多好多好多好多次個線路，試過好多好多好多不同既電阻，又試過重新再駁過塊底，但係結果仍然無變！！DE裡面d工具又唔知點解得咁少！更加唔明點解d可變電阻隻腳要做到咁鬼死人短！

我明明無駁錯線嫁！但係我真係好想好想搵到自己駁錯線，因為起碼知道自己邊度出錯！而家又唔知點解塊版唔work！真係大沮喪啊！

曾經有一次可以整到粒LED閃下閃下嫁！果一刻真係超開心！難得有一個大突破！不過之後又打回原形！超級大沮喪啊！

我唔明啊！我真係唔明點解次次做Lab都要用咁多時間！

p.s.突然好懷念阿科…好想再一次同佢做直掌YEAH YEAH慶祝動作…