六月嘅英國，日照開始拉長，天氣相對穩定。 我就揀咗呢個時間，叫外父外母就嚟英國探我哋，一住就兩個星期。我哋冇刻意排滿行程，而係用一個比較慢、比較生活化嘅方式，陪佢哋行一轉我哋而家身處嘅地方。
第一日，我哋同三姨、青青表姐一齊去咗 Birmingham 唐人街嘅中華閣飲茶。熟悉嘅味道，好自然就拉近晒距離。食完飯，仲上返之前去過嘅 Beacon Hill，企喺高處望住 Birmingham 一帶嘅景色。冇乜遊客，風又清，感覺好似刻意用慢鏡，去為呢段旅程揭開序幕。
之後趁住好天氣，我哋揀咗去 Cambridge 。無意中行咗入一個大學花園野餐，食完嘢，索性喺草地上瞓咗一陣午覺。嗰一刻，時間真係好似慢咗落嚟。醒返之後沿住河邊散步，睇住啲小船慢慢經過，不期然諗返起上年，同父母一齊睇過嘅小橋流水，畫面唔同，人唔同，但感覺好相似。
其後幾日，我哋多數留喺附近行下。去過馬場，先發現原來馬好放鬆嘅時候，係會成隻攤喺地下瞓，第一眼仲以為佢有事。又去咗屋企附近嘅水塘散步，外母特別鍾意嗰度，成日停低幫啲鴨仔影相。 返到屋企狐狸霍金已經等緊我哋，英國嘅日常，就係咁不經意咁出現。
最深刻嘅行程，係去 Stratford-upon-Avon——莎士比亞嘅故鄉。行喺一排排古舊嘅英式建築之間，會好清楚感受到，英國人係點樣將歷史同文化，直接保存喺日常生活入面。我哋仲返咗去一間以前好鍾意嘅西餐廳食飯，之後再去 Stow-on-the-Wold 一間好舊嘅教堂。教堂前面有兩棵大樹，冇乜裝飾，但成個畫面好有年代感，好安靜。
天氣持續唔錯，我哋再去咗 Bourton-on-the-Water。食咗個簡單嘅 Brunch，之後沿住河邊慢慢行，四周都係舊屋同鄉村景色，附近仲見到啲牛慢慢行過。之後轉去 Lower Slaughter，睇水車，仲遇到一隻好親人嘅貓，主動行埋嚟同我哋影相，成為旅程入面一個好細嘅插曲。雖然已經六點幾，嗰天仲好光，晚餐意大利餐，甜品仲有啲意外驚喜。本來仲諗住再去多一個城堡，但時間唔啱，關門收工，只好帶住少少遺憾返屋企。
到旅程尾聲，我哋終於試咗出名嘅 Miller & Carter Solihull 牛扒，一餐食得好滿足，亦正式為呢兩個星期嘅家庭旅程劃上一個句號。
其實，呢段時間對我嚟講，唔單止係一趟旅行。以前，外父外母並唔算太贊成我哋留喺英國，但慢慢地，佢哋見到我哋喺呢度嘅生活狀態，見到我哋過得自在、食得慣，亦開始理解英國嘅節奏同文化。到最後我發現，真正重要嘅，唔係帶佢哋去咗幾多地方，而係佢哋終於放心——知道我哋喺呢度，過得好。