Month: December 2005

有人問我：為甚麼時常都是黑色的背景主題？黑色給人一種陰沉、神秘、憂愁、悲傷的感覺。

其實，由小至大我喜歡的顏色只有一種，它不是黑色，而是白色。雖然黑色完完全全是白色的相反顏色，但是，當它與白色配搭起來，便可突顯出白色的純淨潔白，這正是我選擇黑色的原因。

哈哈，我就是這樣一個喜歡用相反行為去隱藏內心真正想法的怪人。

二零零五年是難以忘懷的一年，發生了很多刻骨銘心的大事，有快樂的，也有傷心的。雖然在別人的眼中我還是一個只懂吃喝玩樂的小朋友，但是我的的確確已走進了大人的世界。希望新的一年，有一個新的開始，也給別人有一種新的感覺。

回顧零五年，印象最深刻的大事當然是高考。因為高考令我認識了一位名師A.Wong。他教了我很多做人的道理，令我明白到社會需要甚麼，自己需要甚麼。縱使高考成績不佳，但是從他的課堂上真的獲益良多。現在，我還回味著當日那六連打的精讀班。

高考放榜後，經過一番迂迴曲折的路，我進入了理工大學。大學的校園生活一直都是我最嚮往的。在大學裡，我認識到很多新的同窗好友。雖然只是認識了短短三個月，但是大家就像一家人一起溫習、一起吃飯、一起玩樂，彼此守望相助，互相解決疑難，向著共同的目標進發！令我最難忘的，莫過於那張神秘的生日卡，真是衷心的感謝他們。

但是，最後一年的中學暑假卻發生了很多不如意的事。

在舊同學出賣事件，我深深體會到人性的貪婪。即使一份最珍貴的友誼也可用作魔鬼的酬勞，金錢的魔力實在太強了。此外，【十字幫】的問題是今年令我最煩惱不堪的事情，斷斷續續，斷斷續續的為持了大半年，對於我這個好動的人真是一大折磨。

二零零五年真是特別的一年！這一年內經歷了很多人生的第一次，也認識了很多來自不同地方的新朋友。今年自己承諾的事頗多，但是真正能達到的，卻是寥寥可數。臨急抱金爺隻腳的惡習，為持至今仍然是改不丟了。希望新的一年，有一個新的開始，也給別人有一種新的感覺！

Happy new year~！

今天欣賞了朗朗的鋼琴演奏會，發覺自己真的愛上了鋼琴這優美動人的聲音。當每一次進入自己Xanga的時候就會聽到這首扣人心弦的樂曲。而且在夜瀾人靜的晚上，一邊看著無際的天空，一邊聆聽著這動人的夜曲，真是別有一番味道。

由於昨夜通宵達旦，今天回家睡了二十小時，真可怕！

今日去左長洲同Karen慶祝生日，大家都玩得好開心。

錯手的馬會計數機、遲來的旅程、痛快的實況、神祕的真話與勇敢、蠟燭的驚喜、通宵的實況二、突如其來的一吻、漆黑的街道、黎明的祈盼、沒有睡的一天。

(內容，有機會再補)

今日約左Claire睇【情癲大聖】，初段佢地想搞笑，但係我笑唔出囉。不過提材都幾新穎，而且裡面既風景、做型都幾吸引，而且最後都有少少共鳴，所以整體套戲都可以接受。

睇完戲之後就去食哈迪斯。點知俾我地見到葉世，原來佢地有NDS版聚，成班男仔係哈迪斯打機，場面真係非常攪笑！我地傾左偈傾到五點幾左右就開手喇。

跟著我就同班舊同學仔去睇英武。發覺原來用投影機黎打機係咁正嫁！個螢幕超級大啊！我地玩One.Piece，裡面既Mini.Game好好玩！雖然成日都包尾，不過最後大輸家有二千萬獎金，結果總分多英武十萬分而唔洗包尾，哈哈！

玩左咁多日真係疲倦啊！好想休息一下！但係聽日又要去入Camp玩通宵喇，唯有好好珍惜今晚訓覺既時間啦。

今日去hall玩完之後又要開始搵錢大計，不過今晚既節日氣氛已經大不如前，周圍行街既人已經好少。而且北風呼呼，條街又凍又靜。於是我地擺左一陣檔就決定走人去拆禮品。

好喇！終於到拆禮品既時候喇！總結依幾晚既收穫，我地每個人可以分到＄１０啊！哈哈！第一次擺檔就有錢賺喇！大開心啊！

返屋企既途中見到仲有人係街邊擺檔，如果以前既我會對佢地毫無感覺。但係過左依個聖誕之後，我知道佢地搵錢真係好辛苦嫁！雖然企左幾晚真係好疲倦，但係可以同一班同學仔一齊玩得咁好開心，所以咩辛苦都係值得既！

開始覺得自己係一個擁有雙重性格既人，成日都處於兩極既狀況。唔通我有精神分裂？還是係人格分裂？死喇！望著塊鏡裡面果個好似唔係自己咁既．．．

今晚真係好難忘，係一個百感交集既聖誕節。

大約到七點鐘左右我地又開始搵錢大計，我就去到五支旗竿下面等阿科佢地。然後我地係星光大道裡面一路食晚餐一路睇燈飾。【幻彩詠香江】匯演完畢無幾耐，Iris都黎埋，咁我地就俾佢睇下我地賣既聖誕公仔啦。點知示範俾Iris睇既同時，吸引左好多人埋黎湊熱鬧，結果，有個家庭睇到咁可愛既聖誕公仔大合奏，好爽快就買左佢地。哈哈，好快就做到第一單生意。

但係，星光大道裡面有好多小販管理隊，所以我地決定去第二度擺檔。點知係我地走既時間，突然間有一個管理隊阿叔走埋黎捉著阿科，仲話我地非法擺賣！之後仲有七八個隊員包圍我地。當時心情真係大緊張，好驚我地俾佢地拉啊！我地同班管理隊爭論左好耐，仲引黎唔少市民既圍觀。

好彩，當時我地無俾佢地見到我地有叫賣，更加無錢銀既交易。結果，佢地無證據證明我地非法販賣之下放走我地。

本來尋晚班小販管理隊都只係趕人地走，但係今晚真係開始捉人喇！我地好擔心，都唔知繼續定唔繼續好。不過係依個時候，一開始幫襯我地果個家庭突然出現，而且仲想買多兩套聖誕公仔。可能，依個就係上天俾我地既暗示，叫我地繼續擺檔。於是我地決定去尖東個邊擺檔。

去到科學館附近，已經見到有好多人係度擺檔。但係我地都係靜觀其變，周圍睇下有冇小販管理隊先。我地沿途不斷見到有人擺檔賣聖誕飾物，至於管理隊員就一個都無發現到，於是我地就安心開始擺檔。

今次好成功啊！我地既聖誕公仔吸引到好多途人注意，好快又賣出左幾套。但係最衰係吳君如，無啦啦爆我地套公仔既成本價，搞到我地無左幾單生意！

之後，Connie同貓仔都黎睇下我地擺檔。我地就送左一對明日環俾佢地，就係教佢地玩依個魔術既同時，又吸引左一班人黎圍觀。於是佢地做下妹既情況之下，又賣出左幾個，哈哈！但係驚訝既事情出現喇！竟然俾我地撞到CoCo既罪證啊！但係Connie同貓仔既反應更加激烈，竟然係度尖叫，攪到其他人既目光轉移到佢地兩個，哈哈！

嘩！估唔到係短短既三個鐘頭內發生左咁多事，不過最開心就係我地可以賣晒所以聖誕公仔，而且仲可以回到本！好野！聖誕快樂！

今日考完試之後就開始sem.break搵錢大計。我同一班同學會係尖沙咀一帶擺檔做小販。我地主要賣兩樣野，第一就係一套三隻識得大合奏既聖誕公仔，分別有聖誕老人、聖誕鹿同埋雪人，好可愛嫁！第二就係【再說一次我愛你】裡面劉華既明日環。

今晚我地本來想去星光大道裡面擺檔，但係尖沙咀真係好多人，周圍都封晒路，我地跟本就無辦法入到去！於是我就地就係新世界中心門口出面擺檔，點知擺左無幾耐就俾小販管理隊趕走。於是我地就去太空館出面擺檔，點知又俾警察叔叔趕走。唉，真係好沮喪啊！

結果全晚都係尖沙咀周圍行黎行去，開檔既時間超短，完全無一個地方可以俾我地顯示批聖誕公仔既可愛大合奏。最後返到屋企都成三點幾，營業額好低啊！大失敗啊！

希望可以找到一個容身之處給我地分享聖誕歌曲的樂趣．．．