近排上網回憶番好多以前細個既事，記得細個好鐘意睇一套卡通片，個故事係講一個間學校，當地球遇到困難既時候，就會變成戰鬥機地，之後就會有三個機械人彈出黎拯救地球！套卡通好似叫「熱血最強」，而個三個機械人可以合體成會熱血最強獅人鳳！真係好好睇！
我仲記得另外一套卡通片叫「魔法小魔星」，依套應該係第一套令我喊過既卡通片。個時大結局話小魔星要返番魔界，我真係好唔捨得咁喊左出黎。最後，小魔星又突變返番黎地球世界，個時真係開心都訓唔著覺！哈哈！
另外，仲記得好多小學休息時間玩既種種玩兒。最深刻既印象就係玩「奇多圈」，個時一鐘聲響就立即衝去操場對戰，我仲贏左好多個圈圈番黎嫁！而家裝奇多圈既罐仲係度，第時一定會俾班子孫睇下我細個時候既玩兒！
仲有，「奄賓周」都係當年一大攻擊同學仔既招數。攻擊既時候要伸出食指同中指，擺出一個好似點穴姿勢，之後就篤向同學仔既小弟弟度，諗番都覺得攪笑！XDD
由於細個果時放補習之後唔可以立即番屋企，終是就會同班妹子們去婆婆屋企。個度可以話係我地既兒童王國，咩野創新玩兒都係由依度發明出黎。
記得最好玩就係「大白鯊」，我地會當公公婆婆將大床做船，跟著就會放晒枕頭同綿被係床邊當保護攔。猜輸左果個就要做大白鯊係床邊捉人落船！我地會係床上面走黎去，有時又會伸隻腳出去引大白鯊食自己。當有人被大白鯊捉住，我地仲會一齊拉返佢上黎，真係非常好玩！
哈哈！突然諗番起咁多細個既事真係好正！！好令人回味啊！
