Month: August 2005

新既球季就快開鑼，又可以睇番阿仙奴水銀瀉地既攻勢。不過，一諗起金爺係最後既一季，就有少少可惜。真係真係好希望可以親眼睇到金爺踢一場波！但係，依個機會實在太過渺茫喇。

唯有張依首歌，獻給我心愛既冰王子．．．

影片暫停播放，但仍可在此下載→1 or 2

p.s.唉～人流升人留減．．．

前晚係【電車男】，今晚就係【龍櫻】。依套係雖然唔算搞笑，但係提材就好有意義。

【龍櫻】，係講述一位窮律師，為左揚名立萬。決定將一張間山雞學校「龍山高中」既學生考入日本首一屈指「東京大學」既大學生。雖然，佢不滿依個東大畢業生就係社會既中心既現實，但係佢都要接受依個就係學歷社會既法則。

如果唔想做弱者，被一切守則約束住，就要改變自己，成為一個聰明人，自己去創立法則！於是佢就成立特別進修班，決定訓練出五位龍山高中既同學成為東大既大學生！

【知道怎麼才能令自己變得強大嗎？首先，要明白自己有多麼渺小】by 櫻木健二

一連睇左四集之後，自己都好後悔浪費左十年既青春。最後有咁既結果，自己都心裡有數，努力唔努力自己都知。如果只係努力左一兩年就會成功，咁人地點解要付出十年既時間黎學習呢？

有樣野，我覺得櫻木老師講得好好。考試只有合格同唔合格，話有努力冇努力係無意義既。結果都已經定左，無得返轉頭。不過，只要有唔甘心安於現狀、力求改變自己既心，知道自己失敗既原因，此於會等到櫻花盛放既一日嫁！

仲有幾日就會考放榜喇，希望有努力過既朋友仔會拎到預期高既分數啦！不過，失敗左都唔緊要嫁！最緊要係唔好頹廢啊！望下你地既後面，有好多人默默支持你地嫁！

自從尋晚連續追【電車男】三集，今日我又變番做夜遊人喇。

成日見到陽光，就好想出去玩。可惜，自己又力不從心，搞到日日朝早都渾渾噩噩咁過。而且我又愈夜愈精神，所以都係唔好迫自己早睡早起。

唔知係訓得唔夠，成個下個晝都頭痛。之後，就再睇左【龍櫻】第一集，套戲都唔錯既。不過，就無好似【電車男】咁，好好好想追落去既感覺。

然後，本來一個好寧靜既夜晚，但係俾一個極度主觀、偏激既人破壞晒氣氛。

唉～主觀既人真係愈黎愈令人討厭！佢地永遠已自己係長輩既身份而命令人地要接受佢既個人意見、睇法、思想，覺得自己係絕對、唔會有錯！而且又唔肯接受其他人既意見、唔聽人地解釋！一聽到同自己對立或者唔同意既聲音，就立即否決，再講一連串毫無邏輯既說話！只有論點，毫無論證，跟本就無說服力！往往似住自己有少少權力，就威迫人地要服從佢！完全無考慮過人地既感受！成日話自己點付出，點偉大！但係成日要求人地做依樣，做個樣！為少少事就耿耿於懷，無理取鬥，小氣到爆！

究竟點先可以改變依個狀況？係未無奈真係可以解決問題呢？

尋晚忍唔住要睇埋【電車男】既第二集、第三集，真係愈睇愈正！

一路睇就一路代入角色，愈黎愈緊張、興奮，甚至心跳加速。覺得自己就好似電車男其中一個網友，好期待佢既報告，好想知道之後佢會同青山小姐發展成點。當佢成功既時候，會替佢開心，恭喜佢；當佢失落既時候，會感到悲哀，會勉勵佢。

見到電車男開始改變自己逃避問題既性格，成熟起黎，變得主動、積極、大膽，真係有少少感動。

雖然，電車男係現實生活中好可憐，但係一去到網絡世界裡面，佢就有好多網友支持佢、鼓勵佢。感覺到自己同佢都有幾分相似，可能因為咁，所以先可以產生共鳴啦！

電車男！向下一站前進吧！

今日再睇埋第四集，覺得依套戲除左搞笑之外，仲有少少感動位。愈睇愈鐘意啊！

本來今日想去游水，不過突然殺出【十字幫】，搞到有排先做得運動，好無奈啊！咩都無得做，一個人硬蕉蕉係屋企真係好妹啊！

屋企又悶又熱，成個人無晒衝勁，做咩都無黎精力。好想多多喜上身，俾衝勁我啊！

不過，好彩有小寶同金爺既存在，先覺得人生仲係有意義既。

唔想再過住咁樣既日子呀．．．

p.s.成日打好多野都無人留言，反而一兩隻字就有回覆……真係……

後記：

睇完【電車男】第一集之後，覺得自己其實都幾幸福。相反，電車就．．．所以，我都支持你啊！去吧！電車男！加油啊！為左自己，為左我地，打電話啦！

今日睇左一個電視節目，叫School of Rock。感覺：超級興奮！

依一個節目係韓國，可以話係幾受年青人歡迎既節目。而節目係為左拉近學生與歌手間既距離而設既。佢地會係網上發表投票，睇下班學生最想邊位歌手去佢地學校表演。然後，最高票數個位歌手就會去某一間學校做表演嘉賓。

一開始，學校方面就宣佈，叫班學生去禮堂集合。數分鐘之後，禮堂就企滿晒人。由於個禮堂好多人，又無冷氣，個個同學都拎住把扇黎潑涼。

但係佢地真估萬估，都估唔到，一陣之後，會令佢地更加熱血沸騰。

跟著，個校長講左好多野，又有幾個同學上台發表。不過，大家都做過學生。一般情況下，係依一個時間，依一個環境，學生都係好少理個台上既講者講咩，各有各傾偈、講笑。

點知有一個講者講左幾句說話後，就拎左一個張寫住「School of Rock」海報。

然後突然間，個台上既背景板立即轉晒，搖身一變成為一個舞台。

班學生立即知道，佢地就係被選中既幸運校園。於是成班學生失晒控，個個都即刻跑近個舞台，目的就係想近距離見到佢地心愛既偶像。

當大家都估緊邊一位明星出黎之中際，一聲巨響！帆布一落！韓國超級人氣女歌手，小天后寶兒出場喇！班學生簡直係瘋狂，個個都已經喪失理智。佢地唯一可以做既就係，尖叫！而有一班比較有理性既學生就會拎部手機出黎不停影相，但係其他人只識得係度不停揮手、大叫大笑。

小寶勁歌熱舞一輪之後，班學生終於都冷靜番少少。跟著就係互動時間，班學生可以發問問題。小寶答問題既時候表情多多，好鬼可愛！

然後，下一個環節就係學生即場表演。有人跳小寶既My Name，有人就唱小寶既歌。不過，最正就係一隊「口技」組合，佢地用口發出唔同既聲音，再加上輕快既節拍，演奏出一連串既音效，真係好犀利！

最後，小寶仲選左依隊組合做冠軍。於是，佢係即場用「口技」演奏No.1。然後，小寶亦都以No.1黎結束依個令人興奮既特別節目。

嘩！！！個節目真係好正！我一路睇都一路度大叫！簡直好似自己都係現場一樣，睇到我熱血沸騰！如果小寶黎真係黎我間學校，我諗我真係會瘋狂！

好期待可以現場感受一下依一種膨快既心情啊！

如果大家想一齊感受，可以下載依個節目。→依度
註：11分鐘先係真正開始，之前係講廢話

http://s19.yousendit.com/d.aspx?id=0L7ZKC0T0488Z216B72G1V3RO
(plz ignore it)