尋晚幫六姨打字，開頭本來用倉頡＋速成，不過最後都係放棄而轉用九方！結果顯示我既決定係明智既！打字速度倍增，兩個鐘頭左右就搞掂。經過依個經歷，我深深感受到九方既無比威力！
打完字之後就去食宵夜，然後順便去埋六姨屋企訓覺。
可能係訓唔慣，今朝好早就起左身。由於舅父去左旅行，間屋得番佢個工人﹙阿施﹚同兩隻狗狗（Sam & Coco），於是我就同肥鍵一家上去看住佢地，不過其實係上去黐飯食！
一上到舅父屋企，佢兩隻狗就係咁吠，超級嘈！最唔聽話就係Coco，俾佢聞左手手都要繼續吠。不過，佢地一見我地開飯就立即靜晒，仲爬上黎搖搖尾巴，好鬼得意。
之後就感受下舅父既家庭影院，不過食完晏好眼訓，結果一訓就訓到六點幾。跟著又開飯，阿施煮野都唔錯，一邊睇電視一邊食飯，之後仲食埋雪榚，好正啊！簡直當依度係自己屋企一樣！
跟著睇左一套西片就同肥鍵一齊走。
返到屋企就整下我部新電腦。始終都係牌底版虧虧地，IDE插頭得果一個，結果而家要拎走一個CD-ROM先用得番！遲下要叫硬膠霸主黎搞搞先。
p.s.今個某人又打黎煩我，我照舊唔聽佢電話！
Leave a Reply