尋晚開著冷氣黎訓，訓得好好，所以今日一朝早就起左身。跟著就開始學日文，今堂學左日文字既起源，知道左咩叫平假名、片假名、漢字等等。之後就睇H2，套戲既劇情愈黎愈好睇，睇黎棒球隊裡面有內奸。朋友A要小心哦！
下午決定北上尋歡，順便去書城睇下買唔買到想要果幾本書。於是大約一點鐘左右就起程了。由於係假期既開始，所以火車站裡人山人海，車箱亦濟滿左好多北上旅客。經過十約四十五分鐘既車程到左羅湖總站，一貫香港人作風，當車門一開，所有人都快快步衝出車外。雖然人好多，但係香港果邊效率都幾快。本來諗著試下「e道」，可惜太多人喇，結果無用到。
記得以前由香港過大陸要行過一條好臭既橋，而家唔洗再忍臭喇！因為條橋兩旁起左個玻璃幕場，仲有空調嫁。但係大陸果邊既公安做野真係好慢，見咁多大又唔加開櫃位。過左一陣先有個公安慢慢咁行去開個新櫃位，點知佢仲要同隔離位同誌傾下計、吹下水先開始，真係…….
自從上次同壇主北上展開尋「寶」之旅後，都有兩年無上過深圳喇。而家深圳街頭都衛生左，而且又多左公安巡邏，感覺唔同晒。不過唔夠三十分鐘我就改觀喇！因為竟然俾我見到有個細路係街邊便便，佢阿婆仲….太嘔心喇，都係好講。唉，佢地既工民意識仲係唔掂。
上到大陸都不外乎做果幾樣野，首先就去金太陽洗頭同按摩，然後見天色已黑，就去食晚飯。今日果碟好又來羊肉唔錯唔錯，不過間菜館樣樣都大大碟，所以食唔得晒。晚飯過後就去買VCD，留番夜晚消遣。去到第一間影音鋪，果度既電視碟少到爆，於是去左第二間，跟著買左隻「天下無賊」，不過係普通話配音既。
之後就去柏林摩腳，個張凳好舒服。一路睇大長今、一路摩腳，感覺唔錯！發現原來長今都幾好睇嫁，不過都就黎大結局喇，無得追。睇完長今就返蓮塘休息。諗著開隻「天下無賊」，點不知部只係可以播VCD既DVD機唔識大開口，禁極OPEN都唔伸條俐出黎。搞到咩都無得睇，終是只有睇下深圳電視。轉去第二台，佢播緊以前一套無線劇集，但係唔記得叫咩名。不過都唔緊要，因為又係普通話配音，當堂無興趣睇。於是就跳去下一個台，發現播緊阿沙同梁家輝個套咩阿爸真火爆，仲係粵語配音，咁就睇一陣啦。但係由於我地係無裝天線，所以好多雪花，睇睇下隻眼都已經好辛苦。跟著就走去沖涼訓覺 lu…
。
